ସର୍ବକାଳୀନ ରେକର୍ଡ ସ୍ତର ଛୁଇଁଲା ସୁନା, ମାର୍ଚ୍ଚରେ ବଢିଲାଣି ୪ ହଜାର ଟଙ୍କା

ନୂଆଦିଲ୍ଲୀ ୨୯/୦୩: ଗୁରୁବାର ସୁନା ଦର ସର୍ବକାଳୀନ ରେକର୍ଡ ସ୍ତର ଛୁଇଁଛି । ଇଣ୍ଡିଆ ବୁଲିଅନ ଆଣ୍ଡ ଜୁଏଲର୍ସ ଆସୋସିଏସନ (ଆଇବିଜେଏ) ୱେବ୍‌ସାଇଟ୍‌ ମୁତାବକ,  ୧୦ ଗ୍ରାମ ପିଛା ୨୪ କ୍ୟାରେଟ୍‌ ସୁନା ୧୩୭ ଟଙ୍କା ମହଙ୍ଗା ହୋଇ ୬୬,୯୭୧ ଟଙ୍କା ରହିଛି । ୨୨ କ୍ୟାରେଟ ସୁନା ଦର ୬୧,୩୪୫ ଟଙ୍କା ସ୍ତରରେ ରହିଛି । 

୨୧ ମାର୍ଚ୍ଚରେ ସୁନା ଦର ୬୬,୯୬୮ ଟଙ୍କା ସ୍ତରରେ ଥିଲା । ସେହିଭଳି ରୁପା ଦରରେ ମଧ୍ୟ ସାମାନ୍ୟ ବୃଦ୍ଧି ହୋଇଛି । ଏହା କିଲୋ ପିଛା ୧୪ ଟଙ୍କା ବଢ଼ି ୭୪,୦୧୧ ଟଙ୍କାରେ ବିକ୍ରି ହେଉଛି । ଏହା ପୂର୍ବରୁ କିଲୋ ପିଛା ରୁପା ଦର ୭୩,୯୯୭ ଟଙ୍କା ସ୍ତରରେ ଥିଲା । ଗତ ବର୍ଷ ଡିସେମ୍ବର ୪ରେ ରୁପା ଦର ୭୭,୦୭୩ ଟଙ୍କାର ରେକର୍ଡ ସ୍ତରରେ ଥିଲା । ଚଳିତ ମାସରେ ସୁନା ଦର ବୃଦ୍ଧି ଜାରି ରହିଛି । 

ମାର୍ଚ୍ଚ ପହିଲାରେ ୧୦ ଗ୍ରାମ ପିଛା ସୁନା ୬୨,୫୯୨ ଟଙ୍କା ସ୍ତରରେ ଥିବା ବେଳେ ୨୮ ମାର୍ଚ୍ଚରେ ଏହା ୬୬,୯୭୧ ଟଙ୍କା ଛୁଇଁଛି । ଚଳିତ ମାସ ଅଦ୍ୟାବଧି ସୁନା ଦର ୪,୩୭୯ ଟଙ୍କା ବୃଦ୍ଧି ହେଲାଣି । ସେହିଭଳି ରୁପା ଦର ୬୯,୯୭୭ ଟଙ୍କା ସ୍ତରରୁ ବୃଦ୍ଧି ହୋଇ ୭୪,୦୧୧ ଟଙ୍କା ଛୁଇଁଲାଣି । ସୁନା ଦର ବୃଦ୍ଧି ଲାଗି ବିଶେଷ କରି ୪ କାରଣ ଦାୟୀ । 

୨୦୨୪ରେ ସାରା ବିଶ୍ୱକୁ ମାନ୍ଦାବସ୍ଥା ଆଶଙ୍କା, ବିବାହ ଋତୁ ଚାହିଦା, ଡଲାର ସୂଚକାଙ୍କରେ ଦୁର୍ବଳତା ଏବଂ ସାରା ବିଶ୍ୱର କେନ୍ଦ୍ରୀୟ ବ୍ୟାଙ୍କ ବୃହତ୍‌ ପରିମାଣରେ ସୁନା କିଣିବା ଯୋଗୁ ଦର ବୃଦ୍ଧି ଘଟୁଛି । ୨୦୨୩ ଆରମ୍ଭକୁ ବିଚାରକୁ ନେଲେ ସୁନା ୫୪,୮୬୭ ଟଙ୍କା ସ୍ତରରେ ଥିଲା । ଏହା ଡିସେମ୍ବରରେ ୬୩,୨୪୬ ଟଙ୍କା ଛୁଇଁଲା । 

୨୦୨୩ରେ ସୁନା ୧୬% ବା ୮୩୭୯ ଟଙ୍କା ବୃଦ୍ଧି ହୋଇଛି । ସେହିଭଳି ରୁପା ୬୮,୦୯୨ ଟଙ୍କାରୁ ବୃଦ୍ଧି ହୋଇ ୭୩,୩୯୫ ଟଙ୍କା ଛୁଇଁଛି । ଆଗାମୀ ଦିନରେ ମଧ୍ୟ ସୁନା ଦରରେ ବୃଦ୍ଧି ହୋଇପାରେ । ଫଳରେ ଚଳିତ ବର୍ଷ ୧୦ ଗ୍ରାମ ପିଛା ସୁନା ଦର ୭୦ ହଜାର ଟଙ୍କା ଛୁଇଁପାରେ । ସେହିଭଳି କିଲୋ ପିଛା ରୁପା ଦର ୭୫ ହଜାର ଟଙ୍କା ଯାଏ ବୃଦ୍ଧି ହେବାର ଆଶଙ୍କା ରହିଛି ।