ସାମ୍ନାକୁ ଆସିଲେ ୟୁଟ୍ୟୁବର ପ୍ରିୟଙ୍କାଙ୍କ ବଡ଼ବାପା, କହିଲେ ଯଦି ଝିଅର କିଛି…

ପୁରୀ,୧୮ା୫: ପୁରୀ ପୋଲିସ ସହାୟତାରେ ଇଣ୍ଟେଲିଜେନ୍ସ ବ୍ୟୁରୋ (ଆଇବି) ସ୍ଥାନୀୟ ୟୁଟ୍ୟୁବର ପ୍ରିୟଙ୍କା ସେନାପତିଙ୍କୁ ପାକିସ୍ତାନ ପାଇଁ ଗୁପ୍ତଚର ଅଭିଯୋଗରେ ଗିରଫ ହୋଇଥିବା ହରିୟାଣାର ଜ୍ୟୋତି ମାଲହୋତ୍ରାଙ୍କ ସହ ସମ୍ପର୍କ ବିଷୟରେ ପଚରାଉଚରା କରିଥିବା ଜଣାପଡ଼ିଛି।

ଝିଆରୀକୁ ପଚରାଉଚରା ନେଇ ପ୍ରତିକ୍ରିୟା ରଖିଛନ୍ତି ବଡ଼ବାପା। ସେ କହିଛନ୍ତି, ଆମ ଝିଅ ଉପରେ ପୂରା ଭରସା ରହିଛି। ସେ ସେପରି ଝିଅ ନୁହେଁ, ଯଦି ହୋଇଥାଏ, କାର୍ଯ୍ୟାନୁଷ୍ଠାନ ହେଉ। ପ୍ରିୟଙ୍କା ପାକିସ୍ତାନ ଯାଇଥିବା କଥା ମୁଁ ଜାଣିଛି। ପାକିସ୍ତାନକୁ ନେଇ ଆମ ରକ୍ତ ଏବେ ବି ତାତିକି ରହିଛି।ସରକାର ପାକିସ୍ତାନ ବିରୋଧରେ ଯେତେ କାର୍ଯ୍ୟାନୁଷ୍ଠାନ ନେବେ ଆମେ ଖୁସି ହେବୁ ବୋଲି ପ୍ରିୟଙ୍କାଙ୍କ ବଡ଼ବାପା କହିଛନ୍ତି।

ରିପୋର୍ଟ ଅନୁଯାୟୀ, ପ୍ରିୟଙ୍କା ୟୁଟ୍ୟୁବ୍‌ ମାଧ୍ୟମରେ ଜ୍ୟୋତିଙ୍କ ସମ୍ପର୍କରେ ଆସିଥିଲେ, ଯାହା ପରେ ଉଭୟ ବନ୍ଧୁ ହୋଇଗଲେ। କେନ୍ଦ୍ରୀୟ ଏଜେନ୍ସି ଏବେ ସେମାନଙ୍କ ସମ୍ପର୍କ ଏବଂ ଯୋଗାଯୋଗର ପ୍ରକୃତି ଯାଞ୍ଚ କରୁଛି, ପ୍ରିୟଙ୍କାଙ୍କର ଜ୍ୟୋତିଙ୍କ କଥିତ ଗୁପ୍ତଚର କାର୍ଯ୍ୟକଳାପରେ କୌଣସି ସିଧାସଳଖ ସମ୍ପୃକ୍ତି କିମ୍ବା ଜ୍ଞାନ ଥିଲା କି ନାହିଁ ତାହା ଜାଣିବା ପାଇଁ ଚେଷ୍ଟା କରୁଛି।

ଉଚ୍ଚପଦସ୍ଥ ସୂତ୍ର ଅନୁଯାୟୀ, ପୁରୀ ଏସପିଙ୍କ ନେତୃତ୍ୱରେ ଏକ ସୱତନ୍ତ୍ର ଦଳ ଗଠନ କରାଯାଇଛି। ଓଡ଼ିଶା ପୋଲିସ ହରିୟାଣା ପୋଲିସ ସହିତ ଯୋଗାଯୋଗରେ ଅଛି। ପ୍ରିୟଙ୍କାଙ୍କୁ ଏକ ଅଜ୍ଞାତ ସ୍ଥାନରେ ପଚରାଉଚରା କରାଯାଉଥିଲା।

ଏହି ସମୟରେ, ପ୍ରିୟଙ୍କା ଇନଷ୍ଟାଗ୍ରାମରେ ସ୍ପଷ୍ଟ କରିଛନ୍ତି ଯେ, ଜ୍ୟୋତିଙ୍କ ବିଦେଶୀ ଗୁପ୍ତଚର ସହିତ କଥିତ ଲିଙ୍କ୍‌ ବିଷୟରେ ତାଙ୍କର କୌଣସି ସମ୍ପର୍କ ନାହିଁ।

‘ଯେହେତୁ ଅନେକ ଲୋକ ପଚାରୁଛନ୍ତି, ପ୍ରଥମେ ମୁଁ ଏହାକୁ ସ୍ପଷ୍ଟ କରିବାକୁ ଚାହେଁ। ଜ୍ୟୋତି କେବଳ ମୋର ଜଣେ ବନ୍ଧୁ ଥିଲେ ଏବଂ ମୁଁ ତାଙ୍କ ସହ YouTube ମାଧ୍ୟମରେ ଯୋଗାଯୋଗରେ ଆସିଥିଲି। ତାଙ୍କ ଉପରେ ଯେଉଁ ଅଭିଯୋଗ ଅଛି ତାହା ବିଷୟରେ ମୁଁ ଜାଣି ନଥିଲି। ଯଦି ମୁଁ ଜାଣିଥାନ୍ତି ଯେ ସେ ଏକ ଶତ୍ରୁ ଦେଶ ପାଇଁ ଗୁପ୍ତଚର କରୁଛନ୍ତି ତେବେ ମୁଁ ତାଙ୍କ ସହିତ ଯୋଗାଯୋଗରେ ନଥାନ୍ତି। ମୁଁ ତାଙ୍କୁ କଣ୍ଟେଣ୍ଟ ସୃଷ୍ଟି ମାଧ୍ୟମରେ ବୃତ୍ତିଗତ ଭାବରେ ଜାଣିଥିଲି ଏବଂ ଏହା ଶୁଣି ବ୍ୟକ୍ତିଗତ ଭାବରେ ଆଶ୍ଚର୍ଯ୍ୟ ହୋଇଥିଲି। ଯଦି କୌଣସି ତଦନ୍ତକାରୀ ସଂସ୍ଥା କ୍ରସ-ପ୍ରଶ୍ନ କରିବାକୁ ଚାହାନ୍ତି, ତେବେ ମୁଁ ପୂର୍ଣ୍ଣ ସହଯୋଗ ପ୍ରଦାନ କରିବି। ରାଷ୍ଟ୍ର ସର୍ବୋପରି। ଜୟ ହିନ୍ଦ୍‌ ଲେଖି ପ୍ରିୟଙ୍କା ଇନଷ୍ଟାଗ୍ରାମରେ ପୋଷ୍ଟ କରିଛନ୍ତି।

The post ସାମ୍ନାକୁ ଆସିଲେ ୟୁଟ୍ୟୁବର ପ୍ରିୟଙ୍କାଙ୍କ ବଡ଼ବାପା, କହିଲେ ଯଦି ଝିଅର କିଛି… appeared first on Dharitri Odia News.