ସୁନୀତା ୱିଲିୟମ୍ସଙ୍କୁ ୨୦୨୫ ଫେବ୍ରୁଆରି ପର୍ଯ୍ୟନ୍ତ ମହାକାଶରେ ରହିବାକୁ ପଡ଼ିପାରେ

ୱାସିଂଟନ: ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସ୍‌ଏସ୍‌)ରେ ଥିବା ଭାରତୀୟ-ଆମେରିକୀୟ ମହାକାଶଚାରୀ ସୁନୀତା ୱିଲିୟମ୍ସ ଓ ବୁଚ୍ ୱିଲ୍‌ମୋର ବୋଇଂର ଷ୍ଟାର୍‌ଲାଇନର୍‌ ପରିବର୍ତ୍ତେ ୨୦୨୫ ଫେବ୍ରୁଆରିରେ ସ୍ପେସ୍ ଏକ୍ସର କ୍ରୁ ଡ୍ରାଗନରେ ପୃଥିବୀକୁ ଫେରିପାରନ୍ତି ବୋଲି ନାସା ଅଧିକାରୀମାନେ ସୂଚନା ଦେଇଛନ୍ତି। ତେବେ ଏକାଧିକ ବୈଷୟିକ ସମସ୍ୟାର ସମ୍ମୁଖୀନ ହୋଇଥିବା ଷ୍ଟାର୍‌ଲାଇନର୍‌ ମହାକାଶଯାନର ଚାଲିଥିବା ସୁରକ୍ଷା ମୂଲ୍ୟାୟନର ଫଳାଫଳ ଉପରେ ଏହି ନିଷ୍ପତ୍ତି ନିର୍ଭର କରେ। ଏହି ଦୁଇ ମହାକାଶଚାରୀଙ୍କୁ ଜୁନ୍ ମାସରେ ବୋଇଂର ଷ୍ଟାର୍‌ଲାଇନର୍ କ୍ୟାପସୁଲ ଦ୍ୱାରା ଆଇଏସ୍‌ଏସ୍‌କୁ ପଠାଯାଇଥିଲା, ଯାହା କି ଏହାର ପ୍ରଥମ କ୍ରୁ ମିସନ ଥିଲା।
ପ୍ରାରମ୍ଭରେ ସେମାନଙ୍କ ମିସନ ପ୍ରାୟ ୮ ଦିନ ଧରି ଚାଲିବ ବୋଲି ଲକ୍ଷ୍ୟ ଧାର୍ଯ୍ୟ କରାଯାଇଥିଲା, କିନ୍ତୁ ଷ୍ଟାର୍‌ଲାଇନର୍‌ରେ ପ୍ରପଲସନ ସିଷ୍ଟମ ସମସ୍ୟା କାରଣରୁ ଏହାକୁ ବୃଦ୍ଧି କରାଯାଇଛି। ଏହି ସବୁ ସମସ୍ୟା ଯୋଜନା ଅନୁଯାୟୀ ସୁରକ୍ଷିତ ଭାବେ ପୃଥିବୀକୁ ଫେରାଇ ଆଣିବାରେ ମହାକାଶଯାନର କ୍ଷମତାକୁ ନେଇ ଚିନ୍ତା ବଢ଼ାଇଛି। ଥ୍ରଷ୍ଟର ବିଫଳତା ଓ ହିଲିୟମ ଲିକ୍ ପରି ସମସ୍ୟାର ସମାଧାନ ପାଇଁ ବୋଇଂ କଠୋର ପରୀକ୍ଷଣ ଅଭିଯାନ ଚଳାଇଛି। ଷ୍ଟାର୍‌ଲାଇନର୍‌ ପ୍ରତ୍ୟାବର୍ତ୍ତନର ସମ୍ଭାବ୍ୟ ବିପଦକୁ ଗ୍ରହଣ କରାଯିବ ନା କ୍ରୁ ଡ୍ରାଗନ୍ ବ୍ୟବହାର କରିବାର ସୁରକ୍ଷିତ ବିକଳ୍ପ ବାଛାଯିବ ସେ ନେଇ ନାସା ମଧ୍ୟରେ ଆଭ୍ୟନ୍ତରୀଣ ମତଭେଦ ସୃଷ୍ଟି ହୋଇଛି।