ସୁନ୍ଦରଗଡ଼ ବାଙ୍କୋ ଅଞ୍ଚଳରୁ ଲୁଟ୍ ବିସ୍ଫୋରକ ଜବତ, ଝାଡ଼ଖଣ୍ଡ ସୀମାରୁ ମିଳିଥିଲା ସୂଚନା

ରାଉରକେଲା ୩୦।୫: ସୁନ୍ଦରଗଡ଼ ବାଙ୍କୋ ଅଞ୍ଚଳରୁ ଲୁଟ୍ ହୋଇଥିବା ବିସ୍ଫୋରକ ଜବତ ହୋଇଛି । ମାଓବାଦୀ ହିଁ ନେଇଥିଲେ ବିସ୍ଫୋରକ । ୪ ଦିନ ପରେ ସରଣ୍ଡା ଜଙ୍ଗଲରୁ ମିଳିଛି ଲୁଟ୍‌ ବିସ୍ଫୋରକର ପ୍ରାୟ ୭୦ ପ୍ରତିଶତ । ତିରଲପୋଷି ଜଙ୍ଗଲରେ ମାଓବାଦୀଙ୍କ ସହ ଗୁଳିବିନିମୟ ଜାରି ରହିଛି । IED ବିସ୍ଫୋରଣରେ ଜଣେ ଯବାନ ଗୁରୁତର ହୋଇଥିବା ବେଳେ ତାଙ୍କୁ ରାଞ୍ଚି ଏୟାର ଲିଫ୍ଟ କରାଯାଇଛି । ସୁନ୍ଦରଗଡ଼ କେ.ବଲାଙ୍ଗ ଥାନା ବାଙ୍କୋ ପଥର ଖଣିରୁ ୨୦୦ ପେଟି ବିସ୍ଫୋରକ ଲୁଟ୍ ହୋଇଥିଲା । 

ଗତ ୨୭ ତାରିଖରେ ପଥର ଖଣି ପାଇଁ ଏକ ମିନି ଟ୍ରକରେ ୪ ଟନ୍ ବିସ୍ଫୋରକ ନିଆଯାଉଥିବା ବେଳେ ସୁନ୍ଦରଗଡ଼ କେ.ବଲାଙ୍ଗ ଥାନା ବାଙ୍କୋ ନିକଟରେ ଏହି ବିସ୍ଫୋରକକୁ ଲୁଟି ନେଇଥିଲେ ୩୦ରୁ ୪୦ଜଣ ବନ୍ଧୁକଧାରୀ । ଏହା କେବଳ ମାଓବାଦୀଙ୍କ କାମ ହୋଇପାରେ ବୋଲି ଅନୁମାନ କରାଯାଉଥିଲା  । ଟ୍ରକ୍‌ ଚାଳକର ପତ୍ତା ମିଳିବା ପରେ ଗଲା ୩ ଦିନ ହେଲା ଝାଡଖଣ୍ଡ ସହ ଓଡ଼ିଶା ସୁରକ୍ଷାକର୍ମୀ ସର୍ଚ୍ଚ ଅପରେସନ ଚଳାଇଥିଲେ । ସରଣ୍ଡା ଜଙ୍ଗଲରେ ଦୁଇଟି CISF ଟିମ୍‌ ସହ ଓଡ଼ିଶା ପୋଲିସର ଦୁଇଟି ଡଗ୍ ସ୍କ୍ବାଡ୍ ସହ ସାଇଣ୍ଟିଫିକ୍ ଟିମ୍‌ ସରଣ୍ଡା ଜଙ୍ଗଲରେ ଛାନଭିନ୍‌ କରିଥିଲେ । ରାଉରକେଲା ଆଡିସନାଲ ଏସ୍‌ପିଙ୍କ ନେତୃତ୍ବରେ ଗଠିତ SIT ମଧ୍ୟ ଘଟଣାର ଯାଞ୍ଚ ଚଳାଇଥିଲେ । ତେବେ ଓଡ଼ିଶା ସୀମାନ୍ତ ଝାଡ଼ଖଣ୍ଡ ସରଣ୍ଡା ଜଙ୍ଗଲ ତିରଲପୋଷି ଜଙ୍ଗଲରେ ସର୍ଚ୍ଚ ଅପରେସନ ବେଳେ ଲୁଟ୍‌ ବିସ୍ଫୋରକ ମିଳିଥିବା ବେଳେ ସେଠାରେ ଲୁଚି ରହିଥିବା ମାଓବାଦୀଙ୍କ ସହ ସୁରକ୍ଷାକର୍ମୀଙ୍କ ଗୁଳି ବିନିମୟ ଜାରି ରହିଛି । 

ଲୁଟ୍ ଘଟଣାର ତଦନ୍ତ ପାଇଁ ଗଠନ ହୋଇଥିଲା SIT ଟିମ୍ । ରାଉରକେଲା ଆଡ଼ିସନାଲ ଏସ୍‌ପିଙ୍କ ନେତୃତ୍ବରେ ଟିମ୍‌ ଗଠନ ହୋଇଥିଲା । ଟିମ୍‌ରେ ଥିଲେ ୪ ଜଣ ଅଫିସର । ରାଉରକେଲା ଆଡିସନାଲ ଏସ୍‌ପି, ବଣାଇ SDPO ଏବଂ ଦୁଇ ପୋଲିସ ଇନ୍ସପେକ୍ଟର ଟିମ୍‌ରେ ସାମିଲ ଥିଲେ ।

ଝାଡ଼ଖଣ୍ଡ-ଓଡ଼ିଶା ସୀମାନ୍ତ  ସରଣ୍ଡା ଜଙ୍ଗଲରେ ଲଗାତାର ଚାଲିଥିଲା ସର୍ଚ୍ଚ ଅପରେସନ । ଗ୍ରାଉଣ୍ଡ ଜିରୋରେ ଅପରେସନ ଆଇଜି ଦୀପକ କୁମାରଙ୍କ ସହ ଗୁଇନ୍ଦା ଡିଆଇଜି ବିଶାଳ କନଓ୍ବର ସିଂ ପହଞ୍ଚି ତଦନ୍ତ କରିଥିଲେ । ଏହା ଭିତରେ ଏଣ୍ଟ୍ରି ମାରିଥିଲା NIA । ଗୁରୁବାର NIA ବିସ୍ଫୋରକ ଗୋଦାମ ମାଲିକଙ୍କୁ ମାରାଥନ ଜେରା କରିଥିଲା । ସେହିଭଳି ୩ ଦିନ ହେଲା ଗ୍ରାଉଣ୍ଡ ଜିରୋରେ ସିଆର୍‌ପିଏଫ୍ ଆଇଜି ଅମିତେନ୍ଦ୍ର ନାଥ ସିଂହା ଛାନଭିନ୍ ଚଳାଇଥିଲା  ।

ଉଲ୍ଲେଖଯୋଗ୍ୟ ଯେ, ୨୦୦୯ ମସିହାରେ ସମାନ ଢଙ୍ଗରେ ଚାନ୍ଦିପୋଷ ଥାନା ଅଞ୍ଚଳରୁ ମାଓବାଦୀ ଲୁଟି ନେଇଥିଲେ ବିସ୍ଫୋରକ ବୋଝେଇ ଟ୍ରକ୍ । ପୁଣି ତାର ପୁନରାବୃତ୍ତି ହୋଇଛି ୨୦୨୫ ମସିହା ମେ’ ୨୭ ତାରିଖରେ ।

You Can Read:

ଲୋଇସିଂହାର ପ୍ରଥମ ମହିଳା ଜମିଦାରଙ୍କ ରାଜ୍ୟାଭିଷେକ, ଗାଦି ସମ୍ଭାଳିବେ ଅର୍ଚ୍ଚନା ଦେବୀ ସିଂହ ରାଏ