ସୋନମଙ୍କୁ ମିଳିବ କି ରାଜାଙ୍କ ସମ୍ପତ୍ତିରେ ଅଧିକାର? ପୁଣି ଆସିଲା ସାଂଘାତିକ ଖବର

ସୋନମଙ୍କୁ ମିଳିବ କି ରାଜାଙ୍କ ସମ୍ପତ୍ତିରେ ଅଧିକାର? ପୁଣି ଆସିଲା ସାଂଘାତିକ ଖବର
ଇନ୍ଦୋରର,୧୧।୬: ଇନ୍ଦୋରରୁ ଆସିଥିବା ଏକ ଚାଞ୍ଚଲ୍ୟକର ଖବର ସାରା ଦେଶରେ ଚହଳ ସୃଷ୍ଟି କରିଛି। ନୂଆ ବିବାହିତ ଦମ୍ପତି ରାଜ ରଘୁବଂଶୀ ଏବଂ ସୋନମ ରଘୁବଂଶୀଙ୍କ ହନିମୁନ ମର୍ଡର ମିଷ୍ଟ୍ରି ଏବେ ରହସ୍ୟରେ ପରିଣତ ହୋଇଛି। ମେଘାଳୟ ପୋଲିସ ଅନୁସାରେ, ସୋନମ ରଘୁବଂଶୀ ତାଙ୍କ ସ୍ବାମୀ ରାଜାଙ୍କୁ ହତ୍ୟା କରିବା ପାଇଁ ଏକ ଷଡଯନ୍ତ୍ର ରଚନା କରିଥିଲେ ବୋଲି ଅଭିଯୋଗ ରହିଛି। ଏହି ମାମଲାରେ ସୋନମଙ୍କ ସହ ତାଙ୍କ ପ୍ରେମିକ ରାଜ କୁଶୱାହା ଏବଂ ତିନି ଜଣ ଅନ୍ୟ ଅଭିଯୁକ୍ତ ଅକାଶ ରାଜପୁତ, ବିଶାଲ ସିଂ ଚୌହାନ ଏବଂ ଆନନ୍ଦ କୁର୍ମୀଙ୍କୁ ଗିରଫ କରାଯାଇଛି।

ରାଜା ଏବଂ ସୋନମଙ୍କ ବିବାହ ମେ ୧୧ ତାରିଖରେ ଇନ୍ଦୋରରେ ସମ୍ପନ୍ନ ହୋଇଥିଲା। ଏହାର ମାତ୍ର କିଛି ଦିନ ପରେ ମଇ ୨୧ରେ ସେମାନେ ହନିମୁନ ପାଇଁ ମେଘାଳୟ ଗସ୍ତ କରିଥିଲେ। ମଇ ୨୩ରେ ଉଭୟଙ୍କୁ ନିଖୋଜ ବୋଲି ରିପୋର୍ଟ କରାଯାଇଥିଲା। ଜୁନ ୨ରେ ମେଘାଳୟର ଇଷ୍ଟ ଖାସୀ ହିଲସ ଜିଲ୍ଲାରେ ଥିବା ଏକ ଗଭୀର ଖାଇ ନିକଟରେ ରାଜାଙ୍କ ମୃତଦେହ ମିଳିଥିଲା। ପୋଲିସ ଅନୁସନ୍ଧାନରୁ ଜଣାପଡ଼ିଛି ଯେ ଏହା ଏକ ପୂର୍ବ ଯୋଜନାବଦ୍ଧ ହତ୍ୟା ଥିଲା, ଯେଉଁଥିରେ ସୋନମ ଏବଂ ରାଜ କୁଶୱାହା ମୁଖ୍ୟ ଭୂମିକା ଗ୍ରହଣ କରିଥିଲେ।

ଏହି ଘଟଣା ପରେ ଏକ ପ୍ରମୁଖ ପ୍ରଶ୍ନ ଉଠିଛି: ସୋନମ ରଘୁବଂଶୀ ତାଙ୍କ ସ୍ବାମୀ ରାଜାଙ୍କ ସମ୍ପତ୍ତିରେ ଅଧିକାର ପାଇବେ କି? ବିଶେଷଜ୍ଞଙ୍କ ମତ ଅନୁଯାୟୀ, ଯଦି ସୋନମଙ୍କ ବିରୋଧରେ ହତ୍ୟାର ଅଭିଯୋଗ ପ୍ରମାଣିତ ହୁଏ, ତେବେ ସେ ରାଜାଙ୍କ ସମ୍ପତ୍ତିରେ କୌଣସି ଅଧିକାର ଦାବି କରିପାରିବେ ନାହିଁ। ଭାରତୀୟ ଆଇନ ଅନୁଯାୟୀ, ଯଦି ଜଣେ ବ୍ୟକ୍ତି ଅପରାଧୀ ସାବ୍ୟସ୍ତ ହୁଏ, ତେବେ ସେ ସମ୍ପତ୍ତି ଉତ୍ତରାଧିକାରୀ ହେବାରୁ ବଞ୍ଚିତ ହୋଇପାରନ୍ତି। ତେବେ, ଏହି ମାମଲାର ଅନ୍ତିମ ନିଷ୍ପତ୍ତି ଅଦାଲତରେ ର୍ନିଭର କରୁଛି।

ସୂଚନା ଅନୁଯାୟୀ, ସୋନମ ତାଙ୍କ ବିବାହ ପୂର୍ବରୁ ନିଜ ମାତାଙ୍କୁ ରାଜ କୁଶୱାହାଙ୍କ ସହ ପ୍ରେମ ସମ୍ପର୍କ ବିଷୟରେ କହିଥିଲେ। ସେ ରାଜାଙ୍କୁ ବିବାହ କରିବାକୁ ଚାହୁଁ ନଥିଲେ ଏବଂ ବାଧ୍ୟ କଲେ ପରିଣାମ ଭୟଙ୍କର ହେବ ବୋଲି ଚେତାବନୀ ଦେଇଥିଲେ। ତଥାପି, ପରିବାର ତାଙ୍କୁ ରାଜାଙ୍କ ସହ ବିବାହ ପାଇଁ ବାଧ୍ୟ କରିଥିଲେ। ପୋଲିସ ସୂଚନା ଅନୁସାରେ, ସୋନମ ଏବଂ ରାଜ କୁଶୱାହା ମିଶି ହତ୍ୟାର ଯୋଜନା କରିଥିଲେ। ସୋନମ ନିଜେ ଘଟଣାସ୍ଥଳରେ ଉପସ୍ଥିତ ଥିଲେ ଏବଂ ହତ୍ୟାକାରୀମାନଙ୍କୁ ୨୦ ଲକ୍ଷ ଟଙ୍କା ଦେଇଥିବା ଅଭିଯୋଗ ରହିଛି।

ଏହି ମାମଲା ସାମାଜିକ ଗଣମାଧ୍ୟମରେ ମଧ୍ୟ ବେଶ ଚର୍ଚ୍ଚାରେ ରହିଛି। ଅନେକ ଲୋକ ଏହି ଘଟଣାକୁ ନେଇ ସୋନମଙ୍କୁ ନିନ୍ଦା କରୁଛନ୍ତି, ଆଉ କେହି କେହି ଏହାର ସିବିଆଇ ତଦନ୍ତ ଦାବି କରୁଛନ୍ତି। ରାଜାଙ୍କ ମାତା ଉମା ରଘୁବଂଶୀ ଦୋଷୀମାନଙ୍କୁ ମୃତ୍ୟୁଦଣ୍ଡ ଦିଆଯାଉ ବୋଲି କହିଛନ୍ତି, ଯେତେବେଳେ ସୋନମଙ୍କ ପିତା ନିଜ ଝିଅକୁ ର୍ନିଦ୍ଦୋଷ ବୋଲି ଦାବି କରିଛନ୍ତି।

ସୋନମଙ୍କୁ ଉତ୍ତରପ୍ରଦେଶର ଗାଜିପୁରରୁ ଗିରଫ କରାଯାଇଛି ଏବଂ ତାଙ୍କୁ ମେଘାଳୟ ପୋଲିସ ଶିଲଙ୍ଗକୁ ଅଣାଯାଇଛି। ଅନୁସନ୍ଧାନ ଜାରି ରହିଛି, ଏବଂ ଏହି ମାମଲାରେ ଆହୁରି ଅନେକ ରହସ୍ୟ ଉନ୍ମୋଚନ ହେବାକୁ ବାକି ଅଛି।

The post ସୋନମଙ୍କୁ ମିଳିବ କି ରାଜାଙ୍କ ସମ୍ପତ୍ତିରେ ଅଧିକାର? ପୁଣି ଆସିଲା ସାଂଘାତିକ ଖବର appeared first on Dharitri Odia News.