‘ସୋସିଆଲ୍ ମିଡିଆ ବ୍ୟବହାରଠାରୁ ଜଜ୍ ଦୂରେଇ ରହିବା ଦରକାର’, ସୁପ୍ରିମକୋର୍ଟଙ୍କ ଟିପ୍ପଣୀ

ନୂଆଦିଲ୍ଲୀ: ନ୍ୟାୟଧୀଶମାନେ ସନ୍ନ୍ୟାସୀଙ୍କ ପରି ଜୀବନ ବଞ୍ଚିବା ଦରକାର ଏବଂ ଘୋଡ଼ା ପରି ପରିଶ୍ରମ କରିବା ଦରକାର । ସୁପ୍ରିମକୋର୍ଟ ଗୁରୁବାର ଏହି କଥା କହିଛନ୍ତି । ସର୍ବୋଚ୍ଚ ନ୍ୟାୟାଳୟ ଆହୁରି କହିଛନ୍ତି ଯେ ନ୍ୟାୟଧୀଶ ସୋସିଆଲ୍ ମିଡିଆ ବ୍ୟବହାର ଠାରୁ ଦୂରେଇ ରହିବା ଦରକାର ଏବଂ ନିଷ୍ପତ୍ତି ଉପରେ କୌଣସି ମତ ବ୍ୟକ୍ତ ନକରିବା ଦରକାର ।

ମଧ୍ୟପ୍ରଦେଶ ହାଇକୋର୍ଟର ଦୁଇଜଣ ମହିଳା ନ୍ୟାୟିକ ଅଧିକାରୀଙ୍କୁ ବରଖାସ୍ତ ମାମଲାର ଶୁଣାଣି ସମୟରେ ସର୍ବୋଚ୍ଚ ନ୍ୟାୟାଳୟ ଏହି ମନ୍ତବ୍ୟ ଦେଇଛନ୍ତି । ଜଷ୍ଟିସ ବି.ଭି ନାଗରତ୍ନା ଏବଂ ଏନ.କୋଟିଶ୍ୱର ସିଂଙ୍କ ଖଣ୍ଡପୀଠ କହିଛନ୍ତି ଯେ ନ୍ୟାୟିକ ଅଧିକାରୀମାନେ ଫେସବୁକକୁ ନଯିବା ଉଚିତ ଏବଂ ରାୟ ଉପରେ କୌଣସି ଟିପ୍ପଣୀ ନକରିବା ଦରକାର । କାରଣ ଆସନ୍ତାକାଲି ଯଦି କୌଣସି ରାୟ କଥା କୁହାଯିବ ତେବେ ନ୍ୟାୟାଧୀଶ ପୂର୍ବରୁ ହିଁ କୌଣସି ନା କୌଣସି ମାର୍ଗରେ ନିଜ କଥା ରଖିସାରିଥିବେ ।

ଖଣ୍ଡପୀଠ କହିଛନ୍ତି ଯେ ଜଜମାନଙ୍କୁ ଅନେକ କିଛି ତ୍ୟାଗ କରିବାକୁ ପଡ଼ିଥାଏ ଏବଂ ନିଜ କାମରେ ପୂରା ମନ ଦେବାକୁ ପଡ଼ିଥାଏ । ଏହାସହ ସୁପ୍ରିମକୋର୍ଟ ସୋସିଆଲ୍ ମିଡିଆ ଉପରେ ନ୍ୟାୟିକ କାର୍ଯ୍ୟ ସହ ଜଡ଼ିତ କୌଣସି ପୋଷ୍ଟ ନକରିବା ପାଇଁ ପରାମର୍ଶ ଦେଇଛନ୍ତି । ବରିଷ୍ଠ ଆଇନଜୀବୀ ଆର.ବସନ୍ତ ମଧ୍ୟ ଖଣ୍ଡପୀଠଙ୍କ ଟିପ୍ପଣୀ ଉପରେ ସହମତି ଦେଇଛନ୍ତି । ସେ କହିଛନ୍ତି ଯେ କୌଣସି ନ୍ୟାୟିକ ଅଧିକାରୀ କିମ୍ୱା ନ୍ୟାୟଧୀଶ ଫେସବୁକରେ ନ୍ୟାୟିକ କାର୍ଯ୍ୟ ଉପରେ କୌଣସି ବି ପୋଷ୍ଟ ନକରିବା ଦରକାର ।