ହାଇକୋର୍ଟରେ ପଦ୍ମଶ୍ରୀ ପୁରସ୍କାର ବିବାଦ, ଦୁଇ ଜଣ ବ୍ୟକ୍ତି ପଦ୍ମଶ୍ରୀ ପୁରସ୍କାର ନିଜର ବୋଲି ଦାବି କଲେ

କଟକ : ହାଇକୋର୍ଟରେ ପଦ୍ମଶ୍ରୀ ପୁରସ୍କାର ବିବାଦ । ସମାନ ନାମ ଥାଇ ଦୁଇ ଜଣ ବ୍ୟକ୍ତି ସାହିତ୍ୟ କ୍ଷେତ୍ରରେ ଘୋଷିତ ହୋଇଥିବା ପଦ୍ମଶ୍ରୀ ପୁରସ୍କାର ନିଜର ବୋଲି ଦାବି ରଖିଛନ୍ତି । ମାମଲା ହାଇକୋର୍ଟରେ ପହଞ୍ଚିବା ପରେ ଉଭୟଙ୍କୁ ହାଇକୋର୍ଟରେ ଆସନ୍ତା ୨୪ ତାରିଖରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି ଡକ୍ଟର ଜଷ୍ଟିସ ସଞ୍ଜୀବ କୁମାର ପାଣିଗ୍ରାହୀଙ୍କ ଖଣ୍ଡପୀଠ । ୨୦୨୩ ମସିହାରେ ଅନ୍ତର୍ଯ୍ୟାମୀ ମିଶ୍ରଙ୍କ ନାମ ସାହିତ୍ୟ କ୍ଷେତ୍ରରେ କୃତିତ୍ବ ପାଇଁ ପଦ୍ମଶ୍ରୀ ପୁରସ୍କାର ଘୋଷଣା ହୋଇଥିଲା । ଅନ୍ତର୍ଯ୍ୟାମୀ ମିଶ୍ର ନାମକ ଜଣେ ସାମ୍ବାଦିକ ଏହି ପୁରସ୍କାର ଗ୍ରହଣ କରିଥିଲେ ।

ତେବେ ସେ ପ୍ରକୃତ ଅନ୍ତର୍ଯ୍ୟାମୀ ମିଶ୍ର ନୁହେଁ ବୋଲି ହାଇକୋର୍ଟରେ ଏକ ପିଟିସନ କରିଥିଲେ ଅନ୍ତର୍ଯ୍ୟାମୀ ମିଶ୍ର ନାମକ ଜଣେ ଡାକ୍ତର । ତାଙ୍କର ୨୯ ଟି ଓଡ଼ିଆ ପୁସ୍ତକ ଓ ଅନ୍ୟ ଭାଷାର ପୁସ୍ତକ ପ୍ରକାଶିତ ହୋଇଛି । ଏ ନେଇ ସେ କେନ୍ଦ୍ର ସରକାର ପଦ୍ମଶ୍ରୀ ପୁରସ୍କାର ଗ୍ରହଣ କରିଥିବା ଅନ୍ତର୍ଯ୍ୟାମୀ ମିଶ୍ରଙ୍କୁ ପକ୍ଷ କରି ଏହି ମାମଲା କରିଥିଲେ । ପଦ୍ମଶ୍ରୀ ଘୋଷଣା ପୂର୍ବରୁ ରାଜ୍ୟ ସରକାରଙ୍କ ଦ୍ଵାରା ସମସ୍ତ ପ୍ରକାର ତନଖି କାର୍ଯ୍ୟ ହେଉଥିବାରୁ ଏଭଳି ଦାବି ପ୍ରସଙ୍ଗରେ ହାଇକୋର୍ଟ ମାମଲାର ଶୁଣାଣି ସମୟରେ ଆଶ୍ଚର୍ଯ୍ୟ ପ୍ରକଟ କରିଥିଲେ । ତେଣୁ ଆସନ୍ତା ୨୪ ତାରିଖ ଅପରାହ୍ନ ୨ ଟାରେ ଉଭୟ ଅନ୍ତର୍ଯ୍ୟାମୀ ମିଶ୍ର ନିଜ ନିଜର ସାହିତ୍ୟ କୃତୀ ସହିତ କୋର୍ଟରେ ବ୍ୟକ୍ତିଗତ ଉପସ୍ଥିତ ହେବାକୁ ନିର୍ଦ୍ଦେଶ ଦେଇଛନ୍ତି ।

The post ହାଇକୋର୍ଟରେ ପଦ୍ମଶ୍ରୀ ପୁରସ୍କାର ବିବାଦ, ଦୁଇ ଜଣ ବ୍ୟକ୍ତି ପଦ୍ମଶ୍ରୀ ପୁରସ୍କାର ନିଜର ବୋଲି ଦାବି କଲେ appeared first on KNews Odisha.