ହିନ୍ଦି ଫିଲ୍ମ ‘ଟ୍ୟୁଏଲଥ ଫେଲ୍‌’କୁ ଜିଏସଟିମୁକ୍ତ ଘୋଷଣା କଲେ ଓଡ଼ିଶା ସରକାର

ଭୁବନେଶ୍ୱର(ଓଡ଼ିଶା ରିପୋର୍ଟର): ପ୍ରତିଷ୍ଠିତ ନିର୍ଦ୍ଦେଶକ ବିଧୂବିନୋଦ ଚୋପ୍ରାଙ୍କ ଦ୍ୱାରା ଏକ ସତ୍ୟ ଘଟଣା ଉପରେ ଆଧାରିତ ଫିଲ୍ମ ‘ ଟ୍ୟୁଏଲଥ ଫେଲ’ (12TH FAIL )କୁ ଓଡ଼ିଶା ସରକାର ଜିଏସଟିମୁକ୍ତ କରିଛନ୍ତି । ରାଜ୍ୟରେ ଅଧିକ ସଂଖ୍ୟକ ଲୋକେ ଏହି ହିନ୍ଦି ଫିଲ୍ମ ଦେଖିବାକୁ ପ୍ରୋତ୍ସାହିତ କରିବା ନିମନ୍ତେ ରାଜ୍ୟ ସରକାର ଏଭଳି ପଦକ୍ଷେପ ନେଇଥିବା ଜଣାପଡ଼ିଛି ।

ରାଜ୍ୟ ଅର୍ଥ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ, ବୃହତର ସ୍ୱାର୍ଥକୁ ଦୃଷ୍ଟିରେ ରଖି ରାଜ୍ୟ ସରକାର ଏହି ହିନ୍ଦି ଫିଲ୍ମକୁ ପ୍ରୋତ୍ସାହିତ କରିବା ନିମନ୍ତେ ରାଜ୍ୟ ଜିଏସଟିମୁକ୍ତ କରିବାକୁ ନିଷ୍ପତ୍ତି ନେଇଛନ୍ତି । ଯାହାଫଳରେ ରାଜ୍ୟର ସିନେମା ହଲ୍ ଓ ମଲଟିପ୍ଲେକ୍ସରେ  ଏହି ଫିଲ୍ମ ପ୍ରଦର୍ଶନ ପାଇଁ କୌଣସି ଏଂଟ୍ରି ଫି’ ବୃଦ୍ଧି କରିପାରିବେ ନାହିଁ କିମ୍ବା ବିଭିନ୍ନ ବର୍ଗର ସିଟ୍ ଗୁଡ଼ିକର ସଂଖ୍ୟା ମଧ୍ୟ ବଢ଼ାଇ ପାରିବେ ନାହିଁ ବୋଲି ସରକାର ତାଙ୍କ ନିର୍ଦ୍ଦେଶରେ ଉଲ୍ଲେଖ କରିଛନ୍ତି । ଏହି ଫିଲ୍ମର ଟିକେଟ୍ ବିକ୍ରି ଉପରେ ରାଜ୍ୟ ଜିଏସଟି ରହିବ ନାହିଁ । ତେଣୁ ଶସ୍ତା ଦରରେ ଏହି ଫିଲ୍ମ ଟିକେଟ୍ ଉପଲବ୍ଧ ହେବ ।

ଏହି ହିନ୍ଦି ଫିଲ୍ମରେ ବିକ୍ରାନ୍ତ ମସୀ ମୁଖ୍ୟ ଭୂମିକାରେ ଅଭିନୟ କରୁଛନ୍ତି । ଚମ୍ବଲର ମନୋଜ ଶର୍ମା କିଭଳି ଜଣେ ସଚ୍ଚୋଟ ପୁଲିସ ଅଫିସର (ମହାରାଷ୍ଟ୍ର କ୍ୟାଡ଼ରର ୨୦୦୫ ବ୍ୟାଚ୍ ଆଇପିଏସ୍ ଅଫିସର) ହେଲେ ସେହି ରିଏଲ ଲାଇଫ୍ କାହାଣୀ ଉପରେ ଏହି ଫିଲ୍ମଟି ପ୍ରସ୍ତୁତ ହୋଇଥିବା ଜଣାପଡ଼ିଛି ।