ୟୁଜିସି ନେଟ୍ ତାରିଖ ଘୋଷଣା; ଅଗଷ୍ଟ ୨୧ରୁ ହେବ ବାତିଲ୍ ହୋଇଥିବା ପରୀକ୍ଷା

ନୂଆଦିଲ୍ଲୀ:  ୟୁଜିସି ନେଟ୍ ତାରିଖ ଘୋଷଣା । ବାତିଲ୍ ହୋଇଥିବା ପରୀକ୍ଷା ପୁଣି ଥରେ ହେବ । ଏନେଇ ବିଶ୍ୱବିଦ୍ୟାଳୟ ଅନୁଦାନ ଆୟୋଗ ପରୀକ୍ଷା ତାରିଖ ଘୋଷଣା କରିଛି । ଆସନ୍ତା ଅଗଷ୍ଟ ୨୧ରୁ ସେପ୍ଟେମ୍ବର ୪ ତାରିଖ ମଧ୍ୟରେ ଏହି ଅକ୍ସଜାମ୍ ହେବ । ଏଥିସହ ଜଏଣ୍ଟ ସିଏସ୍‌ଆଇଆର୍‌ ୟୁଜିସି-ନେଟ୍‌ ତାରିଖ ମଧ୍ୟ ଘୋଷଣା ହୋଇଛି ।   ଜୁଲାଇ ୨୫ରୁ ୨୭ ତାରିଖ ମଧ୍ୟରେ ପରୀକ୍ଷା   କରାଯିବ । ସ୍ୱଚ୍ଛତା ପାଇଁ କମ୍ପ୍ୟୁଟର ବେସ୍‌ଡ ଟେଷ୍ଟ ବା ସିବିଟି ଫର୍ମାଟରେ ଉଭୟ ପରୀକ୍ଷା କରାଯିବ । ଏନେଇ ଜାତୀୟ ପରୀକ୍ଷା ଏଜେନ୍ସି ପକ୍ଷରୁ ବିଜ୍ଞପ୍ତି ଜାରି କରାଯାଇଛି ।

ଗତ ୧୮ ତାରିଖରେ ଏନ୍‌ଟିଏ ପରିଚାଳିତ  ୟୁଜିସି-ନେଟ୍‌ ହୋଇଥିଲା । ବିଶ୍ୱବିଦ୍ୟାଳୟ ଓ  କଲେଜର ସହକାରୀ ପ୍ରଫେସର ପଦବୀ, ଜୁନିଅର ରିସର୍ଚ୍ଚ ଫେଲୋସିପ୍‌ ଯୋଗ୍ୟତା ନିର୍ଦ୍ଧାରଣ ପାଇଁ  ଏହି ପରୀକ୍ଷା ହୋଇଥିଲା । ଏଥିରେ ପାଖାପାଖି ୯   ଲକ୍ଷରୁ ଅଧିକ ପରୀକ୍ଷାର୍ଥୀ ଅଂଶଗ୍ରହଣ କରିଥିଲେ ।  ମାତ୍ର ପେପର ଲିକ୍ ଅଭିଯୋଗ ହେବା ପରେ ମାତ୍ର  ୨ ଦିନ ପରେ ପରୀକ୍ଷା ବାତିଲ କରାଯାଇଥିଲା । ଗୃହ ମନ୍ତ୍ରଣାଳୟ ଅଧୀନ ଭାରତୀୟ ସାଇବର ଅପରାଧ   ସମନ୍ୱୟ କେନ୍ଦ୍ର  ନ୍ୟାସନାଲ ସାଇବର  କ୍ରାଇମ ଥ୍ରେଟ୍‌ ଆନାଲିଟିକ୍ସ ୟୁନିଟ୍‌ ପରୀକ୍ଷାରେ  ଅନିୟମିତତା ହୋଇଥିବା ସୂଚନା ଦେଇଥିଲେ ।  ପରେ ଶିକ୍ଷା ମନ୍ତ୍ରଣାଳୟ ପରୀକ୍ଷା ବାତିଲ  କରିଥିଲା ।

ଦେଶର ୩୧୭ଟି ସହରର ୧୨୦୫  ପରୀକ୍ଷା କେନ୍ଦ୍ରରେ ୧୧,୨୧,୨୨୫ ପରୀକ୍ଷାର୍ଥୀ ଏହି  ପରୀକ୍ଷା ଦେଇଥିଲେ । ସେହିପରି ଜୁନ୍‌ ୨୫ରୁ ୨୭  ତାରିଖ ମଧ୍ୟରେ ହେବାକୁ ଥିବା ସିଏସ୍‌ଆଇଆର୍‌  ୟୁଜିସି ନେଟ୍‌ ପରୀକ୍ଷାକୁ ଗତ ୨୧ ତାରିଖରେ  ଏନ୍‌ଟିଏ ପକ୍ଷରୁ ସ୍ଥଗିତ କରାଯାଇଥିଲା । ଅନିବାର୍ଯ୍ୟ  କାରଣ ପାଇଁ ଏହି ପରୀକ୍ଷା ବାତିଲ କରାଯାଇଥିବା କୁହାଯାଇଥିଲା । ଏନ୍‌ଟିଏର ବିଜ୍ଞପ୍ତି   ଅନୁଯାୟୀ, ଏନ୍‌ସିଇଟି ୨୦୨୪ ପରୀକ୍ଷା ଜୁଲାଇ  ୧୦ରେ ଅନୁଷ୍ଠିତ ହେବ । ସେହିପରି ଜୁଲାଇ  ୬ରେ ଅଲ୍‌ ଇଣ୍ଡିଆ ଆୟୁଷ ପୋଷ୍ଟ ଗ୍ରାଜୁଏଟ୍‌  ପ୍ରବେଶିକା ପରୀକ୍ଷା-୨୦୨୪ ଅନୁଷ୍ଠିତ ହେବ ।