୧୨ହଜାର ଟଙ୍କା ଦରମା ସହ ପଦୋନ୍ନତି ଦାବିନେଇ ଗାଁ ସାଥୀଙ୍କ ଧାରଣା

ଚିପିଲିମା,ଏମଜିଆରଇଜିଏସ କାମର ସୁପରିଚାଳନା ପାଇଁ ପ୍ରତି ପଞ୍ଚାୟତ ମାନଙ୍କରେ ଗାଁ ସାଥି ନିଯୁକ୍ତ କରାଯାଇଥିବାବେଳେ,କମ ପାରିଶ୍ରମିକ ଦେଇ ସରକାର ସେମାନଙ୍କୁ ଶୋଷଣ କରିଆସୁଛନ୍ତି l ଏନେଇ ସେମାନଙ୍କ ମଧ୍ୟରେ ଅସନ୍ତୋଷ ଲାଗିରହିଛି l ଯୋଗ୍ୟତା ଭିତ୍ତିରେ ସେମାଙ୍କୁ ସ୍ଥାୟୀ ନିଯୁକ୍ତି ପ୍ରଦାନ ସହ ଅତିକମରେ ୧୨ ହଜାର ଟଙ୍କା ଦରମା ପ୍ରଦାନ କରିବାକୁ ଗାଁସାଥି (ମେଟ )କ୍ରିୟାନୁଷ୍ଠାନ କମିଟି ପକ୍ଷରୁ ସମ୍ବଲପୁର ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଗାଁସାଥି ଧାରଣାରେ ବସିଥିଲେ l ଏନେଇ ସେମାନେ ସମସ୍ୟାର ସମାଧାନ ପାଇଁ ଏକ ଦାବିପତ୍ର ଦେଇଥିଲେ l ପ୍ରକାଶ ଥାଉକି ଗତ ୨୦୦୮ ମସିହାରୁ ତିନୋଟି ପର୍ଯ୍ୟାୟରେ ଗାଁସାଥି ନିଯୁକ୍ତି ହୋଇଥିଲେ ହେଁ ଅଦ୍ୟାବଧୂ ସେମାନଙ୍କ ସ୍ଥିତିରେ କୌଣସି ସୁଧାର ଆସିନାହିଁ l ଏପରି ସ୍ଥିତିରେ ଯୁକ୍ତ ଦୁଇ ଶିକ୍ଷାଗତ ଥିବା ଗାଁସାଥୀଙ୍କୁ ସରକାରୀ ମାନ୍ୟତା ସହ ପଦୋନ୍ନତି ଦିଆଯିବା ସହ ନିମ୍ନ ଯୋଗ୍ୟତା ଗାଁସାଥୀଙ୍କୁ ମାସିକ ସର୍ବନିମ୍ନ ୧୨ ହଜାର ଟଙ୍କା ପ୍ରଦାନ କରିବାକୁ ଦାବିହୋଇଛି l ପ୍ରକାଶ ଥାଉକି ମୁଖ୍ୟମନ୍ତ୍ରୀ ମୋହନ ମାଝୀ ବିରୋଧୀ ଦଳର ମୁଖ୍ୟ ସଚେତକ ଥିବା ସମୟରେ ସେ ସ୍ଥାୟୀ ନିଯୁକ୍ତି ଦାବିକୁ ସମର୍ଥନ ଜଣାଇଥିଲେ l ବର୍ତ୍ତମାନ ଡବଲ ଇଂଜିନ ସରକାର ଥିବାବେଳେ ମୁଖ୍ୟମନ୍ତ୍ରୀ ପୂର୍ବରୁ ଦେଇଥିବା ସମର୍ଥନକୁ କାର୍ଯ୍ୟକାରୀ କରିବାର ସମୟ ଆସିଥିବାବେଳେ, ସରକାର ଦାବି ପୂରଣ କରନ୍ତୁ ବୋଲି ନେତୃବୃନ୍ଦ କହିଛନ୍ତି l ଏନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ଦାବିପତ୍ର ଦିଆଯାଇଛି l କେନ୍ଦ୍ର ଓ ରାଜ୍ୟ ସରକାର ଦାବି ପୂରଣ ଦିଗରେ ପଦକ୍ଷେପ ନନେଲେ ଆଗାମୀ ଦିନରେ ଆନ୍ଦୋଳନକୁ ଆଗକୁ ଅଧିକ ତୀବ୍ରତର କରାଯିବ ବୋଲି କହିଛନ୍ତି ନେତା ସଂଜୀବ କୁମାର ପାଣିଗ୍ରାହୀ ଓ ଦେବେନ୍ଦ୍ର ଓରାମ l

The post ୧୨ହଜାର ଟଙ୍କା ଦରମା ସହ ପଦୋନ୍ନତି ଦାବିନେଇ ଗାଁ ସାଥୀଙ୍କ ଧାରଣା appeared first on Odisha.News.