୨୦୨୪ରେ ବଢିବ EV ବିକ୍ରି, ସବସିଡି ବଳରେ ୬୬ ପ୍ରତିଶତ ବୃଦ୍ଧି ସମ୍ଭାବନା

ନୂଆଦିଲ୍ଲୀ: ଭାରତରେ ଇଲେକ୍ଟ୍ରିକ୍ ବାହାନ (ଇଭି)ର ବିକ୍ରି ଚଳିତ ବର୍ଷ ୬୬ ପ୍ରତିଶତ ବଢିବା ନେଇ ଅନୁମାନ କରାଯାଉଛି । ଏନେଇ କାଉଣ୍ଟରପଏଣ୍ଟ ରିସର୍ଚ୍ଚର ଏକ ରିପୋର୍ଟରେ ଦାବି କରାଯାଇଛି ଯେ ରାଜ୍ୟର ସବସିଡି ଏବଂ ସହାୟକ ଭିତ୍ତିଭୂମିର ବିକାଶ କାରଣରୁ ଇଭିର ବିକ୍ରିରେ ବୃଦ୍ଧି ଦେଖିବାକୁ ମିଳିବ । ଏହାସହ ୨୦୨୪ ଶେଷ ବେଶକୁ ଇଭି ମୋଟ ପିଭି ବଜାରର ପ୍ରାୟ ୪ ପ୍ରତିଶତ ହେବ ।

ଏହି ରିପୋର୍ଟରେ ଏହା ଅନୁମାନ କରାଯାଇଛି ଯେ ୨୦୩୦ ସୁଦ୍ଧା ଇଭି ଭାରତର ଘରୋଇ ବାହାନ ବଜାରରେ ପ୍ରାୟ ଏକ ତୃତୀୟାଂଶକୁ କବଜା କରିବ ।

ଯଦି ଆର୍ଥିକ ଡାଟା ଉପରେ ନଜର ପକାଇବା ତେବେ ଭାରତୀୟ ଇଭି ସେକ୍ଟର ଆର୍ଥିକ ବର୍ଷ ୨୦୨୪ରେ ଇଭିର ବିଭିନ୍ନ ପ୍ରକାର ବାହାନରେ ରେକର୍ଡ ବିକ୍ରି ହୋଇଛି । ବିକ୍ରିରେ ବାର୍ଷିକ ୪୧ ପ୍ରତିଶତ ବୃଦ୍ଧି ହୋଇଛି ଏବଂ ୧.୬୬ ମିଲିୟନ ଇଭି ବିକ୍ରି ରେକର୍ଡ କରାଯାଇଛି । ମାର୍ଚ୍ଚ ମାସରେ ହିଁ ୧,୯୭,୦୦୦ରୁ ଅଧିକ ୟୁନିଟ୍ ବିକ୍ରି ସହ ନୂଆ ରେକର୍ଡ ହୋଇଛି । ଅନୁମାନ କରାଯାଉଛି ଯେ ଏହି ରେକର୍ଡ ବିକ୍ରି FAME-୨ ସବସିଡି ଯୋଜନାର ଲାଭ ଉଠାଇବା ପାଇଁ ହୋଇଛି, ଯାହା ଆଂଶିକ ରୂପେ ଶେଷ ହେବାକୁ ଯାଉଛି । 

FAME-୨କୁ ବଦଳାଇବା ପାଇଁ ସରକାର ଇଲେକ୍ଟ୍ରିକ୍ ମୋବିଲିଟି ପ୍ରମୋସନ ସ୍କିମ ୨୦୨୪ ଆରମ୍ଭ କରିଛନ୍ତି । ଯେଉଁଥିରେ ଦୁଇ ଏବଂ ତିନି ଚକିଆ ବାହାନ କ୍ରୟ ପାଇଁ ଲୋକଙ୍କୁ ପ୍ରୋତ୍ସାହିତ କରିବା ଲାଗି ୫୦୦ କୋଟି ଟଙ୍କା ଆବଣ୍ଟିତ କରାଯାଇଛି । ଏହି ଯୋଜନା ଏପ୍ରିଲରୁ ଜୁଲାଇ ଶେଷ ଯାଏ ଏହା ବୈଧ ରହିବ । ଉଲ୍ଲେଖଯୋଗ୍ୟ ଯେ ଭାରତ ୨୦୩୦ ସୁଦ୍ଧା ନିଜର ଅଙ୍ଗାରକାମ୍ଲ ନିର୍ଗମନ ୪୫ ପ୍ରତିଶତ କମ କରିବା ନେଇ ମହାତ୍ୱାକାଂକ୍ଷୀ ଲକ୍ଷ୍ୟ ରଖିଛି ।