୪୦୬୭ କୋଟି ଟଙ୍କାର ୨୨ଟି ପ୍ରକଳ୍ପକୁ ସିଙ୍ଗଲୱିଣ୍ଡୋ ମଞ୍ଜୁରୀ

ରାଜ୍ୟରେ ଆଉ ୪୦୬୬.୭୧ କୋଟି ଟଙ୍କାର ୨୨ଟି ପ୍ରକଳ୍ପକୁ ଆଜି ରାଜ୍ୟସ୍ତରୀୟ ସିଙ୍ଗଲୱିଣ୍ଡୋ କ୍ଲିଅରାନ୍ସ ଅଥରିଟି ବୈଠକରେ ଅନୁମୋଦନ ମିଳିଛି। ଏହି ପୁଞ୍ଜିନିବେଶ ଦ୍ୱାରା ରାଜ୍ୟରେ ଅତିରିକ୍ତ ୨୫୫୨୫ଜଣଙ୍କ ପାଇଁ ପ୍ରତ୍ୟକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ । ଏହି ସମସ୍ତ ୨୨ଟି ପ୍ରକଳ୍ପ ରାଜ୍ୟର ୧୨ଟି ଜିଲ୍ଲାରେ ସ୍ଥାପନ ହେବ। ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ରାଜ୍ୟର ଅର୍ଥନୀତିକ ବିକାଶରେ ଉଲ୍ଲେଖନୀୟ ଯୋଗଦାନ ମିଳିବ ବୋଲି ସରକାରଙ୍କ ପକ୍ଷରୁ କୁହାଯାଇଛି। ଅକ୍ଷୟ ଶକ୍ତି ଉପକରଣ, ରସାୟନିକ, ବୟନ ଓ ପୋଷାକ, ଇସ୍ପାତ, ଲୌହ ଓ ଫେରୋ ଆଲଏଜ୍‌, ଆଲୁମିନିୟମ ଡାଉନଷ୍ଟ୍ରିମ, ଖାଦ୍ୟ ପ୍ରକ୍ରିୟାକରଣ, ଆଇଟି ଭିତ୍ତିଭୂମି ଓ ଲଜିଷ୍ଟିକ ଆଦି କ୍ଷେତ୍ରରେ ଏହି ପ୍ରକଳ୍ପ ସ୍ଥାପନ ହେବ ।

ଗ୍ରୀନ୍ ଏନର୍ଜି କ୍ଷେତ୍ରରେ ୱାରିକ୍ଲିନ୍ ଏନର୍ଜି ସଲ୍ୟୁସନ୍ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧାରେ ତା’ର ଇଲୋକ୍ଟ୍ରୋଲାଇଜର ଉତ୍ପାଦନ କାରଖାନା ସ୍ଥାପନ କରିବ। ଯେଉଁଥିରେ ୪୩୫କୋଟି ଟଙ୍କାର ପ୍ରକଳ୍ପ ବ୍ୟୟ ଅଟକଳ କରାଯାଇଛି । ସେହିପରି ବାଲେଶ୍ୱରର ଶାଲିମାର ପେଂଟସ୍ ଲିମିଟେଡ୍ ୧୩୫କୋଟି ଟଙ୍କା ବିନିଯୋଗରେ ବାର୍ନିସ୍ ରଙ୍ଗ ଓ ଏହାର ପ୍ରୟୋଗାତ୍ମକ ଉତ୍ପାଦ ପ୍ରକଳ୍ପ ନିର୍ମାଣ କରିବ । ଏହାଦ୍ୱାରା ୨୦୦ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ । ସେହିପରି ରିଲାଏନ୍ସ ବାୟୋ ଏନର୍ଜିଂ ଲିମିଟେଡ୍ ଦ୍ୱାରା ଢେଙ୍କାନାଳ ଓ କଟକରେ ବାୟୋଗ୍ୟାସ୍‌, ଫର୍ମେଣ୍ଟେଡ୍ ଅର୍ଗାନିକ ସାର ଆଦି କ୍ଷେତ୍ରରେ ୨୪୨.୪୨କୋଟି ଟଙ୍କା ବିନିଯୋଗ କରି ୨ଟି ପ୍ରକଳ୍ପ ନିର୍ମାଣ କରିବ । ଏଥିରେ ମୋଟ ୧୩୮ଜଣଙ୍କୁ ନିଯୁକ୍ତି ସୁଯୋଗ ମିଳିବ । ସେହିପରି ଓଏଫ ବିଟେକ୍ ପ୍ରାଇଭେଟ ଲିମିଟେଡ୍ ଦ୍ୱାରା ଖୋର୍ଦ୍ଧାରେ ସବୁ ବର୍ଗର ଲୋକଙ୍କ ପାଇଁ ପୋଷାକ ଓ ଚମଡ଼ା ଉତ୍ପାଦ ପାଇଁ ୮୫୭କୋଟି ଟଙ୍କା ବିନିଯୋଗରେ ଏକ ପ୍ରକଳ୍ପ ନିର୍ମାଣ ହେବ । ଯେଉଁଥିରେ ୧୫ହଜାର ଲୋକଙ୍କୁ ନିଯୁକ୍ତି ସୁଯୋଗ ମିଳିବ ବୋଲି ଜଣାପଡ଼ିଛି ।