Artificial Intelligence: ୨୦୨୫ ଶେଷ ସୁଦ୍ଧା ଭାରତ ବିକଶିତ କରିବ ନିଜସ୍ୱ AI ମଡେଲ୍, କେନ୍ଦ୍ରମନ୍ତ୍ରୀଙ୍କ ଘୋଷଣା

ନୂଆଦିଲ୍ଲୀ: ଚୀନର ଏଆଇ ଡିପ୍‌ସିକ୍‌ ମଡେଲ୍ ସାରା ଦୁନିଆରେ ଚର୍ଚ୍ଚାର ବିଷୟ ହୋଇରହିଛି । ଏହାକୁ ନେଇ ଭାରତରେ ବି ଚର୍ଚ୍ଚା ବଢିଛି । ଏହାରି ଭିତରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ବଡ଼ ଘୋଷଣା କରିଛନ୍ତି । ସରକାରଙ୍କ ଯୋଜନା ଅନୁସାରେ, ଭାରତ ନିଜର (ଲାର୍ଜ ଲାଙ୍ଗୁଏଜ୍ ମୋଡେଲ୍-ଏଲ୍‌ଏଲ୍‌ଏମ୍) ବିକଶିତ କରିବ । ଏହାଦ୍ୱାରା ଓପନ୍ ଏଆଇର ଚାଟ୍‌ଜିପିଟି, ଗୁଗଲର ଜେମିନି ଏବଂ ଚୀନର ଡିପ୍‌ସିକ୍ R1 ପରି ବିଦେଶୀ ମଡେଲ୍ ଉପରେ ନିର୍ଭରତା କମ ରହିବ । କେନ୍ଦ୍ରମନ୍ତ୍ରୀ କହିଛନ୍ତି ଯେ ଅନ୍ୟ ଦେଶ ଦ୍ୱାରା ନିର୍ମିତ ଏଆଇ ମଡେଲ୍ ଉପରେ ନିର୍ଭର କରିବା ପରିବର୍ତ୍ତେ ଭାରତ ନିଜର ଏକ ନିଜସ୍ୱ ଏଆଇ ମଡେଲ ବିକଶିତ କରିବ ।

ଏହି ପ୍ରୋଜେକ୍ଟର ଉଦ୍ଦେଶ୍ୟ-ଏପରି ଏକ ଏଆଇ ମଡେଲ୍ ନିର୍ମାଣ କରିବା, ଯାହା ଭାରତର ସଂସ୍କୃତି, ଭାଷା ଏବଂ ଆବଶ୍ୟକତାକୁ ଦୃଷ୍ଟିରେ ରଖି ବିକଶିତ କରାଯିବ । କେନ୍ଦ୍ର ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ପ୍ରୋଜେକ୍ଟକୁ ସବୁଜ ସଂକେତ ଦେଇ କହିଛନ୍ତି, ଭାରତର ଏହି ଏଆଇ ମଡେଲ୍ ସମସ୍ତ ପକ୍ଷପାତିତାରୁ ମୁକ୍ତ ରହିବ ଏବଂ ଭାରତୀୟ ଭାଷା ଉପରେ ଗଭୀର ଜ୍ଞାନ ରଖିବ ।

ସରକାର ଏହି ଲକ୍ଷ୍ୟକୁ ହାସଲ କରିବା ପାଇଁ ଏକ ବିଶାଳ ଏଆଇ ଭିତ୍ତିଭୂମି ନିର୍ମାଣ କରୁଛନ୍ତି । ଏଥିରେ ୧୮,୦୦୦ ଗ୍ରାଫିକ୍ସ ପ୍ରୋସେସିଂ ୟୁନିଟ୍ସ (GPUs)ର ଏକ ଅତ୍ୟାଧୁନିକ ଡାଟା ସେଣ୍ଟର ସାମିଲ ହେବ । ଏହି ହାର୍ଡୱେର ଏଆଇର ପ୍ରଶିକ୍ଷଣ ଏବଂ ଏହାକୁ କାର୍ଯ୍ୟକାରୀ କରିବା ପାଇଁ ଆବଶ୍ୟକ ହୋଇଥାଏ । ଭାରତ ଚଳିତ ବର୍ଷ ଶେଷ ସୁଦ୍ଧା ନିଜର ଏଆଇ ଡାଟା ସେଣ୍ଟର ଆରମ୍ଭ କରିବା ପାଇଁ ଲକ୍ଷ୍ୟ ରଖିଛି । ଏହାସହ ସରକାର ୧୦ ମାସ ଭିତରେ ନିଜର ଲାର୍ଜ ଲାଙ୍ଗୁଏଜ୍ (LLM) ପ୍ରସ୍ତୁତ କରିବା ପାଇଁ ମହାତ୍ୱାକାଂକ୍ଷୀ ଲକ୍ଷ୍ୟ ରଖିଛି । ଭାରତର ଏହି ଏଆଇ ମିଶନରେ ଓଡ଼ିଶାରେ ଏକ ବଡ଼ ଏଆଇ ଡାଟା ସେଣ୍ଟର ସ୍ଥାପନା ସାମିଲ ଥିବା ଫାଇନାନସିଆଲ୍ ଏକ୍ସପ୍ରେସ୍ ରିପୋର୍ଟରେ ଉଲ୍ଲେଖ କରିଛି । ଏହି କେନ୍ଦ୍ର ବୈଷୟିକ ମଜଭୁତକୁ କରିବା ସହ ଡାଟା ସେପ୍ଟି ଉପରେ ମଧ୍ୟରେ ଅଧିକ ଧ୍ୟାନ ଦେବ ।