ଅପରେଶନ ସିନ୍ଦୂରରେ ଶହୀଦ ମେଜର ପବନ କୁମାରଙ୍କୁ ଭାବପ୍ରବଣ ଶ୍ରଦ୍ଧାଞ୍ଜଳି: ବାପା କହିଲେ…

ଶ୍ରୀନଗର,୧୭।୫: ଅପରେଶନ ସିନ୍ଦୂରରେ ଶହୀଦ ହୋଇଥିବା ମେଜର ପବନ କୁମାରଙ୍କୁ ଜେନେରାଲ ଅଫିସର କମାଣ୍ଡିଂ (GoC) ହ୍ବାଇଟ ନାଇଟ କର୍ପସ ଲେଫ୍ଟନାଣ୍ଟ ଜେନେରାଲ ପି.କେ ମିଶ୍ର ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ତାଙ୍କ ଶୋକସନ୍ତପ୍ତ ପରିବାର ସହିତ ଏକତା ପ୍ରକାଶ କରିଛନ୍ତି।

ଜମ୍ମୁ ଏବଂ କଶ୍ମୀରର ପୁଞ୍ଚ ଜିଲାରେ ପାକିସ୍ତାନ ଦ୍ୱାରା ଗୁଳିବର୍ଷଣରେ ସୁବେଦାର ମେଜର କୁମାରଙ୍କ ମୃତ୍ୟୁ ହୋଇଥିଲା। ହିମାଚଳ ପ୍ରଦେଶର କାଙ୍ଗଡ଼ା ଜିଲାରେ ତାଙ୍କ ଜନ୍ମଭୂମିରେ ପୂର୍ଣ୍ଣ ରାଷ୍ଟ୍ରୀୟ ସମ୍ମାନ ସହିତ ତାଙ୍କର ଅନ୍ତିମ ସଂସ୍କାର କରାଯାଇଛି।

ସେନାରେ ୩୨ ବର୍ଷ ପୂରଣ କରିବା ପରେ ସୁବେଦାର ମେଜର ପବନ କୁମାର ଅଗଷ୍ଟ ୩୧ ତାରିଖରେ ଅବସର ନେବାର ଥିଲା। ତାଙ୍କ ବାପା ଗରାଜ ସିଂହ କହିଛନ୍ତି, ମୋ ପୁଅ ୯୩ ବ୍ରିଗେଡରେ ଡ୍ୟୁଟିରେ ଥିଲା। ମୁଁ ଦୁଃଖିତ କିନ୍ତୁ ମୁଁ ଖୁସି ମଧ୍ୟ। ମୋ ପୁଅ ଦେଶ ସେବା କରିଛି।

ସୁବେଦାର ମେଜରଙ୍କ ପରିବାରରେ ତାଙ୍କ ମାଆବାପା, ସ୍ତ୍ରୀ ସୁଷମା ଦେବୀ ଏବଂ ଦୁଇ ପିଲା – ୨୨ ବର୍ଷୀୟ ପୁଅ ଅଭିଷେକ ଏବଂ ୨୧ ବର୍ଷୀୟା ଝିଅ ଅନାମିକା ଅଛନ୍ତି।

ବାପା କହିଛନ୍ତି, କିଛି ମାସ ପୂର୍ବେ, ତାଙ୍କୁ ତାଙ୍କର ଶେଷ ପୋଷ୍ଟିଂ ବାଛିବାର ବିକଳ୍ପ ଦିଆଯାଇଥିଲା। ସେ ସୀମାନ୍ତ ସହରରେ ପୋଷ୍ଟିଂ କରିବାକୁ ବାଛିଥିଲେ। ଆମେ ସମସ୍ତେ ତାଙ୍କ ଫେରିବା ପାଇଁ ଯୋଜନା କରୁଥିଲୁ, କିଏ ଭାବିଥିଲା ଯେ ସେ ତ୍ରିରଙ୍ଗାରେ ଘୋଡ଼ାଇ ହୋଇ ଘରକୁ ଫେରିବେ।

ଗରାଜ ସିଂହ ମଧ୍ୟ ସେନାରେ ରହିସାରିଛନ୍ତି। ୧୯ ବର୍ଷ ଧରି ଦେଶ ସେବା କରିବା ପରେ, ସେ ହାବିଲଦାର ପଦବୀରୁ ଅବସର ନେଇଥିଲେ।

ପବନ କୁମାରଙ୍କୁ ପୁଞ୍ଚରେ ଆଗ ଧାଡ଼ିରେ ନିୟୋଜିତ କରାଯାଇଥିଲା। ପାକିସ୍ତାନରୁ ଗୁଳିମାଡ଼ରେ ସେ ଗୁରୁତର ଆହତ ହୋଇଥିଲେ। ଚିକିତ୍ସା ସମୟରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ।

The post ଅପରେଶନ ସିନ୍ଦୂରରେ ଶହୀଦ ମେଜର ପବନ କୁମାରଙ୍କୁ ଭାବପ୍ରବଣ ଶ୍ରଦ୍ଧାଞ୍ଜଳି: ବାପା କହିଲେ… appeared first on Dharitri Odia News.