ଅପରେସନ ସିନ୍ଦୁର’ର ସେହି ୨୫ ମିନିଟ୍ – ଦେଖନ୍ତୁ ଭିଡିଓ

ଡେସ୍କ: ଏପ୍ରିଲ ୨୨ ପହଲଗାମ ଆତଙ୍କବାଦୀ ଆକ୍ରମଣର ପ୍ରତିଶୋଧ ନେବା ପାଇଁ ଅପରେସନ ସିନ୍ଦୁର ସମୟରେ ଟାର୍ଗେଟ ହୋଇଥିବା ପାକିସ୍ତାନ ଏବଂ ପାକିସ୍ତାନ ଅଧିକୃତ କଶ୍ମୀର (ପିଓକେ)ରେ ଥିବା ଆତଙ୍କବାଦୀ ଶିବିର ସମ୍ପର୍କରେ ବୁଧବାର ଭାରତ ବିବରଣୀ ପ୍ରକାଶ କରିଛି। ବୈଦେଶିକ ସଚିବ ବିକ୍ରମ ମିସ୍ରି, ଭାରତୀୟ ସେନା ଅଧିକାରୀ ସୋଫିଆ କୁରେଶ ଏବଂ ଭାରତୀୟ ବାୟୁସେନାର ୱିଙ୍ଗକମାଣ୍ଡର ବୟୋମିକା ସିଂହଙ୍କ ଉପସ୍ଥିତିରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏହି ଆକ୍ରମଣର ଭିଡିଓ ଜାରି କରାଯାଇଛି।

ଅପରେସନ ସିନ୍ଦୁର ସମ୍ପର୍କରେ ଏକ ସ୍ୱତନ୍ତ୍ର ସୂଚନା ଦେଇ କର୍ଣ୍ଣେଲ କୁରେଶୀ କହିଛନ୍ତି, ମରକଜ ସୁଭାନ ଆଲ୍ଲା, ଭବନପୁର ଅନ୍ତର୍ଜାତୀୟ ସୀମାଠାରୁ ୧୦୦ କିଲୋମିଟର ଦୂରରେ ଅବସ୍ଥିତ । ଏହା ଜୈଶ-ଏ-ମହମ୍ମଦର ମୁଖ୍ୟାଳୟ ଥିଲା। ଏହା ମଧ୍ୟ ନିଯୁକ୍ତି, ପ୍ରଶିକ୍ଷଣ ଏବଂ ପ୍ରୋତ୍ସାହନ ପାଇଁ ଏକ କେନ୍ଦ୍ର ଥିଲା। ଶୀର୍ଷ ଆତଙ୍କବାଦୀମାନେ ପ୍ରାୟତଃ ଏଠାକୁ ଆସିଥାନ୍ତି। ସେ କହିଛନ୍ତି, କୌଣସି ସାମରିକ ଘାଟିକୁ ଟାର୍ଗେଟ କରାଯାଇ ନାହିଁ ଏବଂ ଏପର୍ଯ୍ୟନ୍ତ କୌଣସି ସାଧାରଣ ନାଗରିକଙ୍କ ମୃତ୍ୟୁ ଖବର ମିଳିନାହିଁ।

ଅପରେସନ ସିନ୍ଦୁର'ର ସେହି ୨୫ ମିନିଟ୍ pic.twitter.com/4NgqVkhjGQ

— Samaja Live (@samajalive) May 7, 2025

ଭାରତୀୟ ସେନା ଅଧିକାରୀ ଆହୁରି ମଧ୍ୟ କହିଛନ୍ତି, ମାର୍କସ୍ ତୈବା ମୁରିତ କ୍ୟାମ୍ପ ଅନ୍ତର୍ଜାତୀୟ ସୀମା (ଆଇବି) ଠାରୁ ୧୮ରୁ ୨୫ କିଲୋମିଟର ଦୂରରେ ଅବସ୍ଥିତ। ୨୦୦୮ ମୁମ୍ବାଇ ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ମଧ୍ୟ ଏଠାରେ ତାଲିମ ଦିଆଯାଇଥିଲା। ଏହି ଶିବିରରେ ଅଜମଲ କସାବ ଓ ଡେଭିଡ ହେଡଲିଙ୍କୁ ପ୍ରଶିକ୍ଷଣ ଦିଆଯାଇଥିଲା। ଅନ୍ୟପକ୍ଷରେ ୱିଙ୍ଗକମାଣ୍ଡର ସିଂହ କହିଛନ୍ତି ଯେ ୯ଟି ଆତଙ୍କବାଦୀ ଶିବିରକୁ ଟାର୍ଗେଟ କରି ସଫଳତାର ସହ ଧ୍ୱଂସ କରାଯାଇଛି। ସେ ଏହା ମଧ୍ୟ ନିଶ୍ଚିତ କରିଛନ୍ତି ଯେ ଅପରେସନ ସିନ୍ଦୁରରେ କୌଣସି ସାଧାରଣ ନାଗରିକଙ୍କ ମୃତ୍ୟୁ ହୋଇନାହିଁ ।

ଜୈଶ-ଏ-ମହମ୍ମଦର ଗଡ଼ ବାହାଓ୍ଵାଲପୁର ଏବଂ ଲସ୍କର-ଇ-ତୋଏବାର ଘାଟି ମୁରିଦ୍କେ ସମେତ ପାକିସ୍ତାନ ଏବଂ ପିଓକେରେ ଥିବା ୯ଟି ଆତଙ୍କୀ ଟାର୍ଗେଟ ଉପରେ ଭାରତୀୟ ସଶସ୍ତ୍ର ବାହିନୀ ବୁଧବାର ସକାଳେ କ୍ଷେପଣାସ୍ତ୍ର ଆକ୍ରମଣ କରିଥିଲା।

ପହଲଗାମ ଆତଙ୍କବାଦୀ ଆକ୍ରମଣର ଦୁଇ ସପ୍ତାହ ପରେ ଏହାର ପ୍ରତିଶୋଧ ସ୍ୱରୂପ ଏହି କ୍ଷେପଣାସ୍ତ୍ର ଆକ୍ରମଣ କରାଯାଇଥିଲା, ଯେଉଁଥିରେ ୨୬ ଜଣ ପର୍ଯ୍ୟଟକ ସହିଦ ହୋଇଥିଲେ।