ଅମୃତିଆ ଶିଶୁ ମନ୍ଦିରରେ ଜନ୍ମାଷ୍ଟମୀ, କୁନି ପିଲାଙ୍କ କଂସ ବଦ୍ଧ ନାଟକ ସମସ୍ତଙ୍କ ମନ ମୋହିଲା ‌

ଯାଜପୁର : ଯାଜପୁର ଜିଲ୍ଲାରେ ଥିବା ଅମୃତିଆ ସରସ୍ଵତୀ ଶିଶୁ ବିଦ୍ୟା ମନ୍ଦିରର ପିଲାମାନେ ଖୁବ୍ ଧୁମଧାମରେ ଜନ୍ମାଷ୍ଟମୀ ଉତ୍ସବ ପାଳନ କରିଛନ୍ତି । ସବୁଥର ପରି ଏଥର ମଧ୍ୟ ବହୁ ଆଡମ୍ବରରେ ଜନ୍ମାଷ୍ଟମୀ ପାଳନ କରାଯାଇଛି। ବିଦ୍ୟାଳୟ ପକ୍ଷରୁ ନିକଟସ୍ତ ବନ୍ଦାଳୋ ପଞ୍ଚାୟତରେ ଥିବା ପ୍ରସିଦ୍ଧ ଶନିମନ୍ଦିର ପ୍ରାଙ୍ଗଣରେ ଜନ୍ମାଷ୍ଟମୀ ଅବସରରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା ।

ଅମୃତିଆ ସରସ୍ଵତୀ ଶିଶୁ ବିଦ୍ୟା ମନ୍ଦିରର ସବୁ ପିଲା, ଗୁରୁଜୀ-ଗୁରୁମା, ପ୍ରଧାନ ଆଚାର୍ଯ୍ୟା ପ୍ରମୁଖ ମନ୍ଦିର ପ୍ରାଙ୍ଗଣରେ ଏକାଠି ହେବା ପରେ ସଭିଙ୍କୁ ସ୍ଵାଗତ କରାଯାଇଥିଲା । ଏହା ପରେ ପ୍ରାଙ୍ଗଣରେ ଥିବା ରାଧାକୃଷ୍ଣଙ୍କ ମନ୍ଦିରରେ ପୂଜାପାଠ କରାଯାଇଥିଲା । ପୂଜାର୍ଚ୍ଚନା ପରେ କୃଷ୍ଣଙ୍କ ଭଜନରେ ପ୍ରକମ୍ପିତ ହୋଇ ଉଠିଥିଲା ପରିବେଶ । ସ୍ଥାନୀୟ ଅଞ୍ଚଳର ବିଭିନ୍ନ ଗାଁ ବୁଲିଥିଲେ କୁନି କୁନି ରାଧାକୃଷ୍ଣ ‌।

କିଏ କୃଷ୍ଣ ବେଶ ତ କିଏ ରାଧା ବେଶ ତ ପୁଣି ଆଉ କିଏ କଂସ । ଏପରି ଭିନ୍ନ ଭିନ୍ନ ବେଶରେ ସଜେଇ ହୋଇଥିବା କୁନି କୁନି ପିଲା ଯେବେ ଗାଁ ଦାଣ୍ଡରେ ଚାଲୁଥିଲେ , ଗାଁ ଲୋକେ ଘଡ଼ିଏ ଚାହିଁ ରହୁଥିଲେ । ରାଧାକୃଷ୍ଣଙ୍କ ପରି ଠାଣି, ଚାହାଣୀ ମନ ହରି ନେଉଥାଏ ସଭିଙ୍କର । ଗାଁ ରାସ୍ତାରେ କୁନି କୁନି ପିଲା ଓ ଗୁରୁମାଙ୍କ ଭଜନରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହେଉଥାଏ ।

ଗାଁ ଦାଣ୍ଡରେ ରାଧାକୃଷ୍ଣଙ୍କୁ ଦେଖି ବିଭିନ୍ନ ସ୍ଥାନରେ ମାଆ ମାଉସୀମାନେ ବନ୍ଦାପନା ଓ ପୂଜାର୍ଚ୍ଚନା କରିଥିଲେ ‌। ଆଉ ସବୁଠାରୁ ଆକର୍ଷଣୀୟ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ । ପିଲାଙ୍କ ନୃତ୍ୟ ସହ କୁନି ପିଲାମାନଙ୍କ କଂସ ବଦ୍ଧ ନାଟକ ସମସ୍ତଙ୍କ ମନ ମୋହିଥିଲା ‌। ସାଂସ୍କୃତିକ କାର୍ଯ୍ୟକ୍ରମ ପରେ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା ।

କାର୍ଯ୍ୟକ୍ରମରେ ଅମୃତିଆ ସରସ୍ଵତୀ ଶିଶୁ ବିଦ୍ୟା ମନ୍ଦିରର ପ୍ରଧାନ ଆଚାର୍ଯ୍ୟା, ଗୁରୁଜୀ ଗୁରୁମା, କୋଷାଧ୍ୟକ୍ଷ, ପରିଚାଳନା କମିଟିର ସଦସ୍ୟ,ମାତୃ ଭାରତୀ ସଦସ୍ୟା, ବହୁ ଅଭିଭାବକ , ସ୍ଥାନୀୟ ପଞ୍ଚାୟତର ସରପଞ୍ଚ, ସମିତି ସଭ୍ୟ, ସ୍ବେଛାସେବୀ ସଂଗଠନ ଜୟ ମହାକାଳ ଫାଉଣ୍ଡେସନର ବହୁ ସଦସ୍ୟ ସଦସ୍ୟା ଓ ସ୍ଥାନୀୟ ବାସିନ୍ଦା ଆଦି ଉପସ୍ଥିତ ଥିଲେ ।

The post ଅମୃତିଆ ଶିଶୁ ମନ୍ଦିରରେ ଜନ୍ମାଷ୍ଟମୀ, କୁନି ପିଲାଙ୍କ କଂସ ବଦ୍ଧ ନାଟକ ସମସ୍ତଙ୍କ ମନ ମୋହିଲା ‌ appeared first on KNews Odisha.