ଆଦିତ୍ୟ ରୟ କପୁରଙ୍କ ଠାରୁ ସାରା ଅଲି ଖାନ୍ ଯାଏଁ, ୮୫ କୋଟିର ଫିଲ୍ମରେ କାହାକୁ ମିଳିଛି ସବୁଠୁ ଅଧିକ ଫି’?

ମୁମ୍ଵାଇ ୧୪।୦୭; ଏହା ମଧ୍ୟରେ ବିତିଯାଇଛି ୧୮ ବର୍ଷ ।  ୨୦୦୭ ମସିହାରେ ‘ଲାଇଫ୍‌ ଇନ୍‌ ଏ  ମେଟ୍ରୋ’ ଫିଲ୍ମଟିକୁ ଚଳଚ୍ଚିତ୍ରପ୍ରେମୀ  ଯଥେଷ୍ଟ ଭଲପାଇବା ଦେଇଥିଲେ । ଦୀର୍ଘ ବର୍ଷ ଅତିକ୍ରମ କଲା ପରେ ପୁଣି ଥରେ ସେହି ଫିଲ୍ମର ସିକ୍ୟୁଏଲ୍‌  ‘ମେଟ୍ରୋ ଇନ ଦିନୋ’ ମୁକ୍ତି ପାଇଛି ।   ପ୍ରଥମ ସିନେମା ସହିତ ଯୁକ୍ତ ଗାୟକ କେକେ ଏବଂ ଅଭିନେତା ଇରଫାନ ଖାନ  ଦୁଇଜଣ ଏବେ ଏ ଦୁନିଆରେ ନାହାନ୍ତି ।  ତେବେ ତାରକାଖଚିତ ଏହି ନୂଆ  ସିନେମାଟିରେ ବଲିଉଡର ବହୁ ନାମୀ  ଅଭିନେତା-ଅଭିନେତ୍ରୀଙ୍କୁ ଦେଖିବାକୁ  ମିଳିଛି । 

୨୦୦୭ ମସିହାରେ ଅନୁରାଗ   ବସୁଙ୍କ ନିର୍ଦ୍ଦେଶନାରେ ମୁକ୍ତି ପାଇଥିବା   ‘ଲାଇଫ୍‌ ଇନ୍‌ ଏ ମେଟ୍ରୋ’ରେ ସଙ୍ଗୀତ ନିର୍ଦ୍ଦେଶନା  ଦେଇଥିଲେ ପ୍ରୀତମ ଚକ୍ରବର୍ତ୍ତୀ । ୧୮ ବର୍ଷ ପରେ  ମୁକ୍ତିପ୍ରାପ୍ତ ସିକ୍ୟୁଏଲରେ ବି ଏହି ଦୁଇଜଣ ସମାନ  ଦାୟିତ୍ୱ ନେଇଛନ୍ତି । ତେବେ ଅଭିନେତାମାନଙ୍କ  ତାଲିକାରେ ପ୍ରାୟ ନୂଆ ଚେହେରା ଦେଖିବାକୁ ମିଳିଛି ।  ଅର୍ଥାତ ୧୮ ବର୍ଷ ତଳର ‘ଲାଇଫ୍‌ ଇନ୍‌ ଏ ମେଟ୍ରୋ’  ସିନେମାର ଅଭିନେତା, ଅଭିନେତ୍ରୀମାନଙ୍କ ମଧ୍ୟରୁ  କେହି ସିକ୍ୟୁଏଲରେ ଦେଖିବାକୁ ମିଳିନାହାନ୍ତି । କେବଳ  ଜଣେ ଅଭିନେତ୍ରୀ ଭାବେ କୋଙ୍କନା ଶର୍ମା ସିକ୍ୟୁଏଲରେ  ଅଭିନୟ କରିଛନ୍ତି । ଏହି ନୂଆ ଫିଲ୍ମରେ ପାରିଶ୍ରମିକ  ଦୃଷ୍ଟିରୁ କିଏ ଆଗରେ କିଏ ପଛରେ ଆସନ୍ତୁ ନଜର  ପକାଇବା । ବିଭିନ୍ନ ସର୍ବଭାରତୀୟ ଗଣମାଧ୍ୟମରେ  ପ୍ରକାଶିତ ରିପୋର୍ଟ ଅନୁସାରେ, ପାରିଶ୍ରମିକ ଦୃଷ୍ଟିରୁ   ପଙ୍କଜ ତ୍ରିପାଠୀଙ୍କ ଅପେକ୍ଷା ଅନେକ ପଛରେ ଅଛନ୍ତି  କୋଙ୍କନା । 

‘ମେଟ୍ରୋ ଇନ ଦିନୋ’ ଫିଲ୍ମରେ ଅଭିନୟ  କରିବାକୁ ଆନୁମାନିକ ଭାବେ ୭୫ରୁ ୧ କୋଟି ଟଙ୍କା  ନେଇଛନ୍ତି କୋଙ୍କନା ।  ବଲିଉଡର ଏକାଂଶ ଦାବି କରନ୍ତି, ଏହି ସିନେମାରେ  ଅଭିନୟ କରିବା ପାଇଁ ପଙ୍କଜ ତ୍ରିପାଠୀଙ୍କୁ ମିଳିଛି ୪  କୋଟି ଟଙ୍କା । ଅର୍ଥାତ୍‌ କୋଙ୍କନାଙ୍କ ତୁଳନାରେ ୪ଗୁଣ  ଅଧିକ ପାରିଶ୍ରମିକ ପାଇଛନ୍ତି ପଙ୍କଜ । ଏହି ଫିଲ୍ମ   ଜରିଆରେ ବହୁ ବର୍ଷ ପରେ ଆଦିତ୍ୟ ରୟ କପୁରଙ୍କୁ   ରୋମାଣ୍ଟିକ୍‌ ଚରିତ୍ରରେ ଦେଖିବାକୁ ମିଳିଛି । ‘ଆସିକି  ୨’ରେ ଅଭିନୟ ପରେ ରୋମାଣ୍ଟିକ ଚରିତ୍ରରେ  ଦର୍ଶକମାନେ ତାଙ୍କୁ ପସନ୍ଦ କରିଥିଲେ ।  କୁହାଯାଉଛି ‘ମେଟ୍ରୋ ଇନ ଦିନୋ’  ଫିଲ୍ମରେ ଅଭିନୟ କରିବାକୁ ୫ରୁ ୬  କୋଟି ଟଙ୍କାର ପାରିଶ୍ରମିକ ନେଇଛନ୍ତି  ଆଦିତ୍ୟ । ଏହି ଫିଲ୍ମରେ ଆଦିତ୍ୟଙ୍କ  ବିପକ୍ଷରେ ଦେଖିବାକୁ ମିଳିଛନ୍ତି ସାରା  ଅଲ୍ଲୀ ଖାନ । ତେବେ ପାରିଶ୍ରମିକ ଦୃଷ୍ଟିରୁ  ଆଦିତ୍ୟଙ୍କ ତୁଳନାରେ ପଛରେ ରହିଛନ୍ତି  ସାରା ।

 ‘ମେଟ୍ରୋ ଇନ ଦିନୋ’ରେ  ଅଭିନୟ କରି ସାରା ପାଇଛନ୍ତି ୩  କୋଟି ଟଙ୍କା । ଏହି ଫିଲ୍ମରେ ଗାୟକ  ଚରିତ୍ରରେ ଅଭିନୟ କରିଛନ୍ତି ଅଲ୍ଲୀ  ଫଜଲ ଯାହାଙ୍କୁ ମିଳିଛି ୩୦ ଲକ୍ଷ ଟଙ୍କା ।  ଅଲ୍ଲୀଙ୍କ ବିପକ୍ଷରେ ନାୟିକା ସାଜିଥିବା  ସନା ଫାତିମା ଶେଖଙ୍କୁ ମିଳିଛି ୧ କୋଟି  ଟଙ୍କା । ଅନୁରାଗ ବାସୁଙ୍କ ଏହି ସିକ୍ୟୁଏଲରେ ଅଭିନୟ  କରିଛନ୍ତି ଅନୁପମ ଖେର । ଜାଣିବାକୁ ମିଳିଛି ଏହି  ଫିଲ୍ମ ପାଇଁ ପ୍ରଯୋଜନା ସଂସ୍ଥା ତରଫରୁ ଅନୁପମଙ୍କୁ  ୫ କୋଟି ଟଙ୍କା ପାରିଶ୍ରମିକ ଦିଆଯାଇଥିଲା । ତେବେ  ଏଥିରେ ଅଭିନୟ କରିଥିବା ନୀନା ଗୁପ୍ତାଙ୍କୁ ଯଥେଷ୍ଟ  କମ ପାରିଶ୍ରମିକ ମିଳିଛି । ତାଙ୍କୁ ମାତ୍ର ୨୦ ଲକ୍ଷ  ଟଙ୍କାରେ ସନ୍ତୁଷ୍ଟ ରହିବାକୁ ହୋଇଛି । ଏହାର ଓଟିଟି   ସତ୍ତ୍ୱ କିଣିଛି ନେଟ୍‌ଫ୍ଲିକ୍ସ ।