ଆମର ଯାହା ମନ ହେବ, ଆମେ କରିବୁ: ପୁଣି ଖୋଲା ଧମକ ହେଲେ ଟ୍ରମ୍ପ

ଓ୍ବାଶିଂଟନ,୨୮।୬: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟାରିଫ୍‌କୁ ନେଇ ଚେତାବନୀ ଦେଇଛନ୍ତି। ସେ ସ୍ପଷ୍ଟ କରିଛନ୍ତି, ଜୁଲାଇ ୯ର ଟାରିଫ୍‌ ସମୟସୀମା ଏକ ସ୍ଥିର ତାରିଖ ନୁହେଁ। ଆମେରିକା ଏହାକୁ ବୃଦ୍ଧି କରିପାରିବ କିମ୍ବା ହ୍ରାସ କରିପାରିବ, ଏହା ସବୁକିଛି ଅନ୍ୟ ଦେଶ ସହିତ ବ୍ୟବସାୟିକ ଆଲୋଚନା କିପରି ହେବ ତାହା ଉପରେ ନିର୍ଭର କରିବ।
ଟ୍ରମ୍ପ ଏକ ଖୋଲା ଚେତାବନୀ ଦେଇଛନ୍ତି,ଆମେ ଯେତେବେଳେ ଚାହିଁବୁ ନିଷ୍ପତ୍ତି ପରିବର୍ତ୍ତନ କରିପାରିବୁ। ଆମେ ଏହାକୁ ବୃଦ୍ଧି କରିପାରିବୁ କିମ୍ବା ତ୍ୱରାନ୍ବିତ କରିପାରିବୁ। ମୁଁ ଏହାକୁ ତ୍ୱରାନ୍ବିତ କରିବାକୁ ଚାହୁଁଛି ଏବଂ ସମସ୍ତଙ୍କୁ ସିଧାସଳଖ ଚିଠି ପଠାଇବାକୁ ଚାହୁଁଛି – ଅଭିନନ୍ଦନ, ଏବେ ଆପଣ ୨୫ ପ୍ରତିଶତ ଟିକସ ଦେଉଛନ୍ତି। ଗତ ସପ୍ତାହରେ ଆମେରିକା ଇରାନ ଉପରେ ଆକ୍ରମଣ ଏବଂ ଟିକସ ବିଲ ବିଷୟରେ କଥା ହେଉଥିଲା, ଏବେ ଟ୍ରମ୍ପ ପ୍ରଶାସନ ବାଣିଜ୍ୟ ଉପରେ ଧ୍ୟାନ ବୃଦ୍ଧି କରିଛି।
ଆମେରିକା ୟୁରୋପୀୟ ସଂଘକୁ ଏକ ନୂତନ ବାଣିଜ୍ୟ ପ୍ରସ୍ତାବ ପଠାଇଛି। ଭାରତ ବାଣିଜ୍ୟ ଆଲୋଚନା ପାଇଁ ୱାଶିଂଟନକୁ ନିଜର ପ୍ରତିନିଧିମଣ୍ଡଳ ପଠାଇଛି। ସେହି ସମୟରେ, ଆମେରିକାର ଅର୍ଥମନ୍ତ୍ରୀ ସ୍କଟ ବେସାଣ୍ଟ କହିଛନ୍ତି, ବାଣିଜ୍ୟ ଚୁକ୍ତିନାମା ପାଇଁ କିଛି ସମୟ ଲାଗିପାରେ, କିନ୍ତୁ ଶ୍ରମ ଦିବସ (ସେପ୍ଟେମ୍ବର ଆରମ୍ଭ) ସୁଦ୍ଧା ଅନେକ ଗୁରୁତ୍ୱପୂର୍ଣ୍ଣ ଚୁକ୍ତିନାମା ସମାପ୍ତ ହେବ।

ବେସାଣ୍ଟ କହିଛନ୍ତି, ଆମେ ଅନେକ ଦେଶରୁ ପ୍ରସ୍ତାବ ପାଉଛୁ। ଆମର ୧୮ଟି ଗୁରୁତ୍ୱପୂର୍ଣ୍ଣ ବାଣିଜି୍ୟକ ଅଂଶୀଦାର ଅଛନ୍ତି। ଯଦି ଆମେ ଏଥିମଧ୍ୟରୁ ୧୦ କିମ୍ବା ୧୨ଟି ସହିତ ଚୁକ୍ତିନାମା ଚୂଡ଼ାନ୍ତ କରୁ ଏବଂ ଆମେ ବଡ଼ ଅର୍ଥନୀତି ଥିବା ଆହୁରି ୨୦ଟି ଦେଶ ସହିତ ଆଲୋଚନା କରୁ, ତେବେ ଏହା ସମ୍ଭବ ଯେ ଆମେ ଶ୍ରମ ଦିବସ ସୁଦ୍ଧା ବାଣିଜ୍ୟ ପ୍ରକ୍ରିୟା ସମାପ୍ତ କରିପାରିବା।

ସୂଚନାଯୋଗ୍ୟ ଯେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏପ୍ରିଲ ୨୦୨୫ରେ ପ୍ରାୟ ସମସ୍ତ ବିଦେଶୀ ଆମଦାନୀ ଉପରେ ପାରସ୍ପରିକ ଟାରିଫ୍‌ ବ୍ୟବସ୍ଥା କାର୍ଯ୍ୟକାରୀ କରିବାକୁ ଘୋଷଣା କରିଥିଲେ। ଏହା ଅଧୀନରେ, ଯେଉଁ ସାମଗ୍ରୀଗୁଡ଼ିକ ଉପରେ ୧୦%ରୁ ଅଧିକ ଟାରିଫ୍‌ ଲାଗୁ ହେବାକୁ ଥିଲା ସେମାନଙ୍କୁ ୯୦ ଦିନର ଛାଡ଼ ଦିଆଯାଇଥିଲା ଯାହାଦ୍ୱାରା ଦେଶଗୁଡ଼ିକ ପାରସ୍ପରିକ ଆଲୋଚନା ମାଧ୍ୟମରେ ଚୁକ୍ତିନାମାରେ ପହଞ୍ଚିପାରିବେ। ଏହି ଛାଡ଼ ଜୁଲାଇ ୮ରେ ଶେଷ ହେଉଛି।

ତଥାପି, ମେ ଶେଷ ସୁଦ୍ଧା, ଟ୍ରମ୍ପଙ୍କ ଆଭିମୁଖ୍ୟ ଅଧିକ କଠୋର ହୋଇଗଲା। ସେ ୟୁରୋପୀୟ ସଂଘରୁ ଆସୁଥିବା ସାମଗ୍ରୀ ଉପରେ ୫୦% ପର୍ଯ୍ୟନ୍ତ ଆମଦାନୀ ଶୁଳ୍କ ଲାଗୁ କରିବାକୁ ଚେତାବନୀ ଦେଇଥିଲେ। ୟୁରୋପୀୟ ସଂଘ ପୂର୍ବରୁ ଅନେକ ପର୍ଯ୍ୟାୟରେ ଆମେରିକା ଟାରିଫ୍‌ର ସମ୍ମୁଖୀନ ହୋଇସାରିଛି।

The post ଆମର ଯାହା ମନ ହେବ, ଆମେ କରିବୁ: ପୁଣି ଖୋଲା ଧମକ ହେଲେ ଟ୍ରମ୍ପ appeared first on Dharitri Odia News.