ଆମେ ତତ୍କାଳ ଯୁଦ୍ଧ ବିରତି ପାଇଁ ପ୍ରସ୍ତୁତ...ୟୁକ୍ରେନ ସାମନାରେ ରୁଷ ରାଷ୍ଟ୍ରପତି ପୁଟିନଙ୍କ ଦୁଇଟି ସର୍ତ୍ତ

ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଅଢେଇ ବର୍ଷରୁ ଚାଲିଥିବା ୟୁକ୍ରେନ ଯୁଦ୍ଧକୁ ତତ୍କାଳ ରୋକିବା ଏବଂ ଯୁଦ୍ଧବିରତି ନେଇ ଘୋଷଣା ପାଇଁ ପ୍ରତିଶ୍ରୁତି ଦେଇଛନ୍ତି । ତେବେ, ସେ ଏଥିପାଇଁ ୟୁକ୍ରେନ ସାମନାରେ ଦୁଇଟି ସର୍ତ୍ତ ରଖିଛନ୍ତି । ଶୁକ୍ରବାର ପୁଟିନ କହିଛନ୍ତି ଯେ ଯଦି କିଭ୍ ରୁଷ କବଜାରେ ଥିବା ୟୁକ୍ରେନ କ୍ଷେତ୍ରରୁ ନିଜ ସୈନିକଙ୍କୁ ଫେରାଇ ଆଣେ ଏବଂ ନାଟୋରେ ସାମିଲ ହେବା ଯୋଜନାରୁ ଓହରେ ତେବେ ଆମେ ୟୁକ୍ରେନରେ ତତ୍କାଳ ଯୁଦ୍ଧବିରତି ନେଇ ପ୍ରତିଶ୍ରୁତି ଦେଉଛୁ । ସମାଚାର ଏଜେନ୍ସି ଆସୋସିଏଟ୍ ପ୍ରେସ୍ ଏହି ଖବର ଦେଇଛି ।

ରୁଷ ରାଷ୍ଟ୍ରପତି ପୁଟିନ ମସ୍କୋରେ ବିଦେଶ ମନ୍ତ୍ରଣାଳୟର ଏକ ବୈଠକକୁ ସମ୍ୱୋଧିତ କରି ଏହି ଘୋଷଣା କରିଛନ୍ତି । ତାଙ୍କର ଏହି ବୟାନ ଏପରି ଏକ ସମୟରେ ଆସିଛି, ଯେତେବେଳେ ଇଟାଲୀରେ ଜି-7ର ଗୁରୁତ୍ୱପୂର୍ଣ୍ଣ ବୈଠକ ହେଉଛି । ୭୧ ବର୍ଷୀୟ ପୁଟିନ ସ୍ୱିଜରଲାଣ୍ଡରେ ଆୟୋଜିତ ହେବାକୁ ଥିବା ସେହି ଶିଖର ସମ୍ମିଳନୀର ପୂର୍ବ ସଂଧ୍ୟାରେ ଏହି ବୟାନ ଦେଇଛନ୍ତି, ଯେଉଁଠି ୯୦ରୁ ଅଧିକ ଦେଶ ସଂଗଠନ ୟୁକ୍ରେନରେ ଶାନ୍ତି ଫେରାଇବା ଦିଗରେ ସମ୍ଭାବିତ ମାର୍ଗ ଉପରେ ଚର୍ଚ୍ଚ କରିପାରନ୍ତି ।

ଏହାରି ଭିତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଇଟାଲୀର ଅପୁଲିଆ କ୍ଷେତ୍ରରେ ଜି-7 ଶିଖର ସମ୍ମିଳନୀ ବାହାରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ସହ ଆଲୋଚନା କରିଛନ୍ତି । କୁହାଯାଉଛି ଯେ ଜେଲେନସ୍କି ପିଏମ୍ ମୋଦୀଙ୍କୁ ରୁଷ-ୟୁକ୍ରେନ ସଂଘର୍ଷର ବିଭିନ୍ନ ଦିଗ ଉପରେ ସୂଚନା ଦେଇଛନ୍ତି । ପିଏମ୍ ମୋଦୀ ଗତ ବର୍ଷ ମେ ମାସରେ ମଧ୍ୟ ହିରୋଶିମାରେ ଆୟୋଜିତ ଜି-7 ଶିଖର ସମ୍ମିଳନୀ ବାହାରେ ଜେଲେନସ୍କିଙ୍କ ସହ କଥା ହୋଇଥିଲେ । ଉଲ୍ଲେଖଯୋଗ୍ୟ ଯେ ଭାରତ ସବୁବେଳେ କହି ଆସିଛି ଯେ ୟୁକ୍ରେନରେ ଜାରି ସଂଘର୍ଷକୁ ଆଲୋଚନା ଏବଂ କୂଟନୀତି ଜରିଆରେ ସମାଧାନ କରାଯିବା ଦରକାର ।