ଆମେରିକାରେ ବଢୁଛି ଭାରତ ବିରୋଧୀ ଆତଙ୍କୀ ଗତିବିଧି, ଏଫବିଆଇ ନିକଟରେ ରୋଷ ଝାଡ଼ିଲେ ଭାରତୀୟ ବଂଶୋଦ୍ଭବ

ନୂଆଦିଲ୍ଲୀ: ଆମେରିକାର ସିଲିକନ୍ ଭେଲିରେ ପ୍ରଭାବଶାଳୀ ଭାରତୀୟ ବଂଶୋଦ୍ଭବ ଏଫବିଆଇ, ନ୍ୟାୟ ବିଭାଗ ଏବଂ ପୋଲିସ ସହ ବୈଠକରେ ରୋଷ ବ୍ୟକ୍ତ କରି କହିଛନ୍ତି ଯେ ଆମେରିକା ମାଟିରେ ଭାରତୀଙ୍କ ଉପରେ ଆତଙ୍କୀ ଗତିବିଧି ବଢିଛି । ସେମାନେ ଅଭିଯୋଗ କରିଛନ୍ତି ଯେ କାଲିଫର୍ଣ୍ଣିଆରେ ହିନ୍ଦୁଙ୍କ ବିରୋଧରେ ଘୃଣା ଅପରାଧ ମାମଲା ଲଗାତାର ବଢିବାରେ ଲାଗିଛି । ଭାରତୀୟ ବଂଶୋଦ୍ଭବ ଆମେରିକୀୟ ଅଧିକାରୀଙ୍କ ନିକଟରେ ଏହି ଅସମାନତା ଏବଂ ଭେଦଭାବପୂର୍ଣ୍ଣ ବ୍ୟବହାର ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକିବା ଉପରେ ଅସନ୍ତୋଷ ପ୍ରକାଶ କରିଛନ୍ତି ।

ଭାରତୀୟ ବଂଶୋଦ୍ଭବ ଆମେରିକୀୟ ଅଧିକାରୀଙ୍କୁ କହିଛନ୍ତି ଯେ ଏହା ଅତ୍ୟନ୍ତ ନୈରାସ୍ୟଜନକ ଯେ ଆଇନ ପ୍ରବର୍ତ୍ତନ ଏଜେନ୍ସି ଏହା ଉପରେ ଆଦୌ ଧ୍ୟାନ ଦେଉ ନାହାନ୍ତି । ସମୁଦାୟର ନେତା ଅଜୟ ଜୈନ ଭୁତୋରିଆ ବୈଠକରେ କହିଛନ୍ତି ଯେ ଆମେରିକାରେ ହିନ୍ଦୁ, ଜୈନ ଏବଂ ସେମାନଙ୍କ ଧାର୍ମିକ ସ୍ଥଳ ବିରୋଧରେ ଘୃଣା ଅପରାଧରେ ବୃଦ୍ଧି ଏକ ବଡ଼ ସମସ୍ୟା । ନିକଟ ଅତୀତରେ ଖାଲିସ୍ତାନ ସମର୍ଥକ ଅନେକ ମନ୍ଦିରରେ ଭାଙ୍ଗାରୁଜା କରିବା ସହ ଭାରତୀୟ ବାଣିଜ୍ୟିକ ଦୂତାବାସ ଉପରେ ଆକ୍ରମଣ କରିଥିଲେ । କିନ୍ତୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ ।

ଚଳିତ ସପ୍ତାହରେ ହୋଇଥିବା ବୈଠକରେ ପ୍ରାୟ ଦୁଇ ଡଜନରୁ ଅଧିକ ପ୍ରଭାବଶାଳୀ ଭାରତୀୟ ବଂଶୋଦ୍ଭବ ଏଥିରେ ସାମିଲ ହୋଇଥିଲେ । ଏଥିରେ ନ୍ୟାୟ ବିଭାଗର ସାମୁଦାୟିକ ସମ୍ପର୍କ ସେବାର ଭିସେଣ୍ଟ ପ୍ଲେୟର ବଂ ହରପ୍ରୀତ ସିଂ ମୋଖା, ଏଫବିଆଇ ଅଧିକାରୀଙ୍କ ସହ ସ୍ଥାନୀୟ ପୋଲିସ ସାମିଲ ହୋଇଥିଲେ ।

ପେଣ୍ଟାଗନର ବରିଷ୍ଠ ଅଧିକାରୀ ସିଦ୍ଧାର୍ଥ ଆୟର କହିଛନ୍ତି ଯେ ଭାରତ ଏବଂ ଆମେରିକା ମଧ୍ୟରେ ପ୍ରତିରକ୍ଷା ସମ୍ପର୍କରେ ଅବିଶ୍ୱସନୀୟ ମଜଭୁତି ଆସିଛି । ଦକ୍ଷିଣ ଏସିଆ ପାଇଁ ରକ୍ଷା ନୀତିର ସଚିବ ସିଦ୍ଧାର୍ଥ ଆୟର ଏକ ସମ୍ମିଳନୀରେ ଏହି ଟିପ୍ପଣୀ କରିଛନ୍ତି । ସେ କହିଛନ୍ତି ଯେ ଆମେରିକା ଏବଂ ଭାରତ ମଧ୍ୟରେ ପ୍ରତିରକ୍ଷା ବୁଝାମଣା ପ୍ରଯୁକ୍ତି ସହଯୋଗ ଏବଂ ସାମୁଦ୍ରିକ ରଣନୀତି ଉପରେ ଆଧାରିତ ।