ଆମେରିକାରେ ରୋଜଗାର ବୃଦ୍ଧି ଜୁଲାଇରେ ଆଶାଠାରୁ କମ; ବେରୋଜଗାରୀ ହାର ବଢି ହେଲା ୪.୩%

ନୂଆଦିଲ୍ଲୀ: ଆମେରିକାରେ ବେକାରୀ ହାର ଜୁଲାଇରେ ତିନି ବର୍ଷର ସର୍ବୋଚ୍ଚସ୍ତର ୪.୩ ପ୍ରତିଶତରେ ପହଞ୍ଚିଛି । ନିଯୁକ୍ତିରେ ବଡ଼ ହ୍ରାସ୍ ଏହାର ଏକ ପ୍ରମୁଖ କାରଣ, ଯାହା ଶ୍ରମ ବଜାର ବିଗୁଡ଼ିଥିବା ଏବଂ ଅର୍ଥନୀତିରେ ମାନ୍ଦାବସ୍ଥା ଆସୁଥିବା ଆଶଂକାକୁ ବଢାଉଛି । ଆମେରିକା ଶ୍ରମ ବିଭାଗ ଶୁକ୍ରବାର କହିଛି ଯେ ଜୁନରେ ବେକାରୀ ହାର ୪.୧ ପ୍ରତିଶତ ଥିଲା । ୨୦୨୩ ଏପ୍ରିଲରେ ଏହା ପାଞ୍ଚ ଦଶନ୍ଧିରେ ସର୍ବନିମ୍ନ ସ୍ତର ୩.୪ ପ୍ରତିଶତରେ ଥିଲା । ଆମେରିକାରେ ଛଟେଇ ତୁଳନାରେ କମ ନିଯୁକ୍ତି, ଫେଡେରାଲ୍ ରିଜର୍ଭ ଦ୍ୱାରା ସୁଧ ହାର ବୃଦ୍ଧି ଯୋଗୁଁ ଶ୍ରମ ବଜାରରେ ମନ୍ଥରତା ଆସିଛି ।

ଶ୍ରମ ବିଭାଗର ରିପୋର୍ଟ ଏହା ମଧ୍ୟ ଦର୍ଶାଉଛି ଯେ ଗତ ମାସରେ ବାର୍ଷିକ ବେତନ ବୃଦ୍ଧି ତିନି ବର୍ଷରେ ସବୁଠୁ କମ ଥିଲା । ଏଲପିଏସ୍ ଫାଇନାନସିଆଲ୍ ମୁଖ୍ୟ ଅର୍ଥଶାସ୍ତ୍ରୀ ଜେଫରୀ ରୋଚ୍ କହିଛନ୍ତି ଯେ ଶ୍ରମ ବଜାରର ସଦ୍ୟତମ ରିପୋର୍ଟ ମାନ୍ଦାବସ୍ଥାର ଅନୁରୂପ ଅଟେ, କିନ୍ତୁ ମାନ୍ଦାବସ୍ଥା ହିଁ ଆସିବ ତାହା ଜରୁରି ନୁହେଁ । ତେବେ ପ୍ରାରମ୍ଭିକ ଚେତାବନୀ ଭବିଷ୍ୟତରେ ଦୁର୍ବଳତାର ସଂକେତ ଦେଉଛି । 

ଶ୍ରମ ବିଭାଗର ପରିସଂଖ୍ୟାନ ବ୍ୟୁରୋ କହିଛି ଯେ ଜୁନରେ ସଂଶୋଧିତ ୧,୭୯,୦୦୦ ବୃଦ୍ଧି ପରେ ଗତ ମାସ ଅଣ-କୃଷି ପେରୋଲରେ ୧,୧୪,୦୦୦ ନିଯୁକ୍ତି ବୃଦ୍ଧି ହୋଇଛି । ରୟଟର୍ସ ଦ୍ୱାରା ସର୍ଭେକ୍ଷଣ କରାଯାଇଥିବା ଅର୍ଥଶାସ୍ତ୍ରୀଙ୍କ ଅନୁସାରେ ଜୁନରେ ୨,୦୬,୦୦୦ ବୃଦ୍ଧି ପରେ ପେରୋଲ୍‌ରେ ୧,୭୫,୦୦୦ ନିଯୁକ୍ତି ବୃଦ୍ଧି ହେବ ।