ଆରପାରିରେ ରାଜପାଲ ଯାଦବଙ୍କ ପିତା, ୨ ଦିନ ପୂର୍ବରୁ ପୁଅକୁ ମିଳିଥିଲା ହତ୍ୟା ଧମକ

ମୁମ୍ଵାଇ ୨୪।୦୧; ଚଳଚ୍ଚିତ୍ର ଅଭିନେତା ରାଜପାଲ ଯାଦବଙ୍କ ପିତାଙ୍କ ଦେହାନ୍ତ । ଗତ କିଛି ଦିନ ସେ ଧରି ଅସୁସ୍ଥ ଥିଲେ। ଏନେଇ ତାଙ୍କୁ ଚିକିତ୍ସା ପାଇଁ ଦିଲ୍ଲୀର ଏମ୍ସ ହସ୍ପିଟାଲରେ ଭର୍ତ୍ତି କରାଯାଇଥିଲା। ରାଜପାଲ ଯାଦବ ଥାଇଲ୍ୟାଣ୍ଡରେ ଥିଲେ। ତାଙ୍କ ବାପାଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ପରେ ସେ ଗତକାଲି ଦିଲ୍ଲୀରେ ପହଞ୍ଚିଥିଲେ। ଏହାର ଦୁଇ ଦିନ ପୂର୍ବରୁ, ଅଭିନେତାଙ୍କୁ ହତ୍ୟା ଧମକ ମିଳିଥିଲା। 

ସୂଚନା ଅନୁସାରେ ତାଙ୍କ ବାପା ଦିଲ୍ଲୀ ଏମ୍ସରେ ଶେଷ ନିଶ୍ୱାସ ତ୍ୟାଗ କରିଥିଲେ। କୁହାଯାଉଛି ଯେ ତାଙ୍କର ଶେଷକୃତ୍ୟ ଶାହଜାହାନପୁରରେ କରାଯିବ। ରାଜପାଲ ଯାଦବଙ୍କୁ ବୁଧବାର ହତ୍ୟା ଧମକ ମିଳିଥିଲା। ରାଜପାଲଙ୍କ ବ୍ୟତୀତ ସୁଗନ୍ଧା ମିଶ୍ରା, ରେମୋ ଡିସୁଜା ଏବଂ କପିଲ ଶର୍ମାଙ୍କୁ ମଧ୍ୟ ହତ୍ୟା ଧମକ ଆସିଛି। ଏହି ଚାରିଜଣଙ୍କୁ ପାକିସ୍ତାନରୁ ଧମକପୂର୍ଣ୍ଣ ମେଲ୍ ମିଳିଛି।

ଧମକପୂର୍ଣ୍ଣ ଇମେଲର ଶେଷରେ 'ବିଷ୍ଣୁ' ଲେଖାଯାଇଛି

ଧମକପୂର୍ଣ୍ଣ ଇମେଲର ଶେଷରେ 'ବିଷ୍ଣୁ' ଲେଖାଯାଇଛି। ଏହି କାରଣରୁ, ସମସ୍ତ ସନ୍ଦେହ ଲରେନ୍ସ ବିଷ୍ଣୋଇ ଗ୍ୟାଙ୍ଗ ଉପରେ ଆସୁଥିବା ନେଇ ମନେ ହେଉଛି। ଏହି ପ୍ରସଙ୍ଗରେ ସେପରି କୌଣସି ଅଫିସିଆଲ ବିବୃତ୍ତି ସାମ୍ନାକୁ ଆସି ନାହିଁ। ଧମକ ପରେ ରାଜପାଲ ଅଭିଯୋଗ ଦାଖଲ କରିଥିଲେ।