ଆୟ ବଢିଗଲେ ଦେଶ ଛାଡ଼ୁଛନ୍ତି ଧନୀ; ଜାଣନ୍ତୁ ବିଶ୍ୱର କେଉଁ ଦେଶକୁ ସବୁଠୁ ଅଧିକ ସ୍ଥାନାନ୍ତର ହେଉଛନ୍ତି ?

ନୂଆଦିଲ୍ଲୀ,୨୫ା୬: ହେନଲୀ ଆଣ୍ଡ ପାର୍ଟନର୍ସ, ଏକ ବିଶ୍ୱସ୍ତରୀୟ ନିବାସ ଓ ନାଗରିକତ୍ୱ ପରାମର୍ଶଦାତା ସଂସ୍ଥାର ରିପୋର୍ଟ ଅନୁଯାୟୀ, ୨୦୨୫ ମସିହାରେ ପ୍ରାୟ ୧୪୨,୦୦୦ କୋଟିପତି ନୂଆ ଦେଶକୁ ସ୍ଥାନାନ୍ତର ହେବାର ସମ୍ଭାବନା ରହିଛି। ହେନଲୀ ପ୍ରାଇଭେଟ ଓ୍ୱେଲଥ ମାଇଗ୍ରେସନ ରିପୋର୍ଟ ୨୦୨୫ ଅନୁସାରେ, ୨୦୨୬ରେ ଏହି ସଂଖ୍ୟା ୧୬୫,୦୦୦କୁ ବୃଦ୍ଧି ପାଇବ।

ଧନୀମାନଙ୍କ ପସର ଗନ୍ତବ୍ୟସ୍ଥଳ
ସଂଯୁକ୍ତ ଆରବ ଏମିରେଟ୍ସ (UAE) ବିଶ୍ୱର ସବୁଠାରୁ ଆକର୍ଷଣୀୟ ଧନ-ଗନ୍ତବ୍ୟସ୍ଥଳ ଭାବେ ନିଜର ସ୍ଥାନ ବଜାୟ ରଖିଛି। ୨୦୨୫ରେ ରେକର୍ଡ ୯,୮୦୦ କୋଟିପତି ଏହି ଦେଶରେ ନାଗରିକତା ପାଇବାର ଆଶା ରହିଛି, ଯାହା ଗତ ବର୍ଷ ତୁଳନାରେ (୬,୭୦୦) ଅଧିକ। ଆମେରିକା ଦ୍ୱିତୀୟ ସ୍ଥାନରେ ରହିଛି, ଯେଉଁଠାରେ ୭,୫୦୦ ନୂଆ ମିଲିୟନେୟାରଙ୍କୁ ଆକର୍ଷଣ କରିବାର ପୂର୍ବାନୁମାନ ରହିଛି। ଇଟାଲୀ ତୃତୀୟ ଓ ସ୍ୱିଜରଲ୍ୟାଣ୍ଡ ଚତୁର୍ଥ ସ୍ଥାନରେ ରହିଛି।

ସାଉଦି ଆରବ ମଧ୍ୟ ଦ୍ରୁତ ଗତିରେ ଆଗେଇ ଚାଲିଛି। ୨୦୨୫ରେ ଏହା ୨,୪୦୦ରୁ ଅଧିକ କଟୀପତିଙ୍କୁ ଆକର୍ଷଣ କରିବ ବୋଲି ଆଶା କରାଯାଉଛି, ଯାହା ଗତ ବର୍ଷ ତୁଳନାରେ ଆଠ ଗୁଣ ବୃଦ୍ଧି।

ଧନ ହରାଉଥିବା ଦେଶଗୁଡ଼ିକ
ବ୍ରିଟେନ ଏକ ବର୍ଷରେ ସବୁଠାରୁ ଅଧିକ ଧନୀ ଛାଡି ଚାଲିଯିବାର ସମ୍ମୁଖୀନ ହେବ, ଯେଉଁଠାରୁ ୧୬,୫୦୦ କୋଟିପତି ଅନ୍ୟ ଦେଶକୁ ସ୍ଥାନାନ୍ତର ହେବେ। ଏହି ତାଳିକାରେ ଚାଇନା ଦ୍ୱିତୀୟ ସ୍ଥାନରେ ରହିଛି, ଯେଉଁଠାରୁ ୭,୮୦୦ କୋଟିପତି ଅନ୍ୟ ଦେଶକୁ ଯିବାର ସମ୍ଭାବନା ରହିଛି।

ଏସିଆରେ, ଦକ୍ଷିଣ କୋରିଆରୁ ୨,୪୦୦ ଏବଂ ଭାରତରୁ ୩,୫୦୦ କୋଟିପତି ଦେଶ ଛାଡିବାର ପୂର୍ବାନୁମାନ ରହିଛି। ୟୁରୋପୀୟ ସଂଘର ପ୍ରମୁଖ ଦେଶଗୁଡ଼ିକ ଯେପରିକି ଫ୍ରାନ୍ସ (-୮୦୦), ସ୍ପେନ (-୫୦୦), ଏବଂ ଜର୍ମାନୀ (-୪୦୦) ମଧ୍ୟ ୨୦୨୫ରେ ଧନୀ ନିର୍ଗମନର ସମ୍ମୁଖୀନ ହେବେ। ଆୟାରଲ୍ୟାଣ୍ଡ (-୧୦୦), ନରୱେ (-୧୫୦), ଏବଂ ସ୍ୱୀଡେନ (-୫୦) ମଧ୍ୟ ନୂଆ ଧନୀ ନିର୍ଗମନ ଦେଖିବେ।

ଧନ ସ୍ଥାନାନ୍ତର କାହିଁକି ଗୁରୁତ୍ୱପୂର୍ଣ୍ଣ?
ରିପୋର୍ଟ ଅନୁଯାୟୀ, “ଏହା ଅର୍ଥନୈତିକ ପ୍ରଭାବରେ ଏକ ଗଭୀର ପରିବର୍ତ୍ତନ ସୃଷ୍ଟି କରୁଛି, କାରଣ ଦେଶଗୁଡ଼ିକ କେବଳ ପ୍ରତିଭା ନୁହେଁ, ସେମାନଙ୍କ ସହ ଆସୁଥିବା ସମ୍ପତ୍ତି ପାଇଁ ମଧ୍ୟ ପ୍ରତିଯୋଗିତା କରୁଛନ୍ତି।” UAE ପ୍ରାୟ ୬୩୦୦ କୋଟି ଡଲାରର ସମୁଦାୟ ନିବେଶଯୋଗ୍ୟ ଧନ ସହ ଏକ ଆଞ୍ଚଳିକ କେନ୍ଦ୍ରରୁ ବିଶ୍ୱସ୍ତରୀୟ ଧନ-କେନ୍ଦ୍ରକୁ ପରିଣତ ହୋଇଛି।

ବିଶେଷଜ୍ଞଙ୍କ ମତରେ, “ସ୍ଥାନାନ୍ତର” ଶବ୍ଦଟି କିଛି ମାତ୍ରାରେ ଭୁଲ ବୋଲି ବିବେଚନା କରାଯାଇପାରେ, କାରଣ ଅନେକ ଧନୀ ବ୍ୟକ୍ତି ଏହି କାର୍ଯ୍ୟକ୍ରମଗୁଡ଼ିକୁ “ପ୍ଲାନ B” ଭାବେ ବ୍ୟବହାର କରନ୍ତି। ସେ କହିଛନ୍ତି, “ଏହି ଲୋକମାନେ ପ୍ରକୃତରେ UK ଛାଡ଼ୁ ନାହାନ୍ତି। ସେମାନେ କେବଳ ବିଭିନ୍ନ ଦେଶରେ କାଗଜପତ୍ର ପ୍ରସ୍ତୁତ କରୁଛନ୍ତି, କିନ୍ତୁ ସମ୍ପୂର୍ଣ୍ଣ ସ୍ଥାନାନ୍ତର ହେଉ ନାହାନ୍ତି।”

The post ଆୟ ବଢିଗଲେ ଦେଶ ଛାଡ଼ୁଛନ୍ତି ଧନୀ; ଜାଣନ୍ତୁ ବିଶ୍ୱର କେଉଁ ଦେଶକୁ ସବୁଠୁ ଅଧିକ ସ୍ଥାନାନ୍ତର ହେଉଛନ୍ତି ? appeared first on Dharitri Odia News.