ଇଂଲଣ୍ଡରେ ଭାରତୀୟ ମହିଳା ଦଳର ଐତିହାସିକ ଶୃଙ୍ଖଳା ବିଜୟ

ମାଞ୍ଚେଷ୍ଟର: ଭାରତୀୟ ମହିଳା ଦଳ ୨୦୨୨ରେ ଇଂଲଣ୍ଡରେ ୩–୦ରେ ଦିନିକିଆ ଶୃଙ୍ଖଳା ଜିତି ଇତିହାସ ପ୍ରତିଷ୍ଠା କରିଥିଲା। ଏହାର ୩ ବର୍ଷ ପରେ ଘରୋଇ ଇଂଲଣ୍ଡ ବିପକ୍ଷ​‌େ​‌ର ଟ୍ବେଣ୍ଟି୨୦ ଶୃଙ୍ଖଳା ଜିତି ଆଉ ଏକ ଇତିହାସ ରଚିଛି ଭାରତୀୟ ମହିଳା କ୍ରିକେଟ୍‌ ଦଳ। ବର୍ଷକରୁ କମ୍‌ ସମୟ ମଧ୍ୟରେ ମହିଳା ଟ୍ବେଣ୍ଟି୨୦ ବିଶ୍ବକପ୍‌ ଖେଳିବାକୁ ଇଂଲଣ୍ଡ ଆସିବାକୁ ଥିବା ଆମ ମହିଳା ଦଳ ପାଇଁ ଏହି ଶୃଙ୍ଖଳା ବିଜୟ ବେଶ୍‌ ଗୁରୁତ୍ବପୂର୍ଣ୍ଣ। ବୁଧବାର ରାତିରେ ୪ର୍ଥ ଟ୍ବେଣ୍ଟି୨୦ ମ୍ୟାଚ୍‌ରେ ଇଂଲଣ୍ଡ ମହିଳା ଦଳକୁ ୬ ୱିକେଟ୍‌ରେ ଭାରତ ପରାସ୍ତ କରିଛି। ଫଳରେ ୫ ମ୍ୟାଚ୍‌ର ଟ୍ବେଣ୍ଟି୨୦ ଶୃଙ୍ଖଳାରେ ଭାରତ ୩–୧ରେ ଆଗୁଆ ରହି ଏହାକୁ ଜିତିନେଇଛି। ସ୍ପିନରଙ୍କ ଚମତ୍କାର ପ୍ରଦର୍ଶନ ବଳରେ ପ୍ରଥମେ ବ୍ୟାଟିଂକରି ଇଂଲଣ୍ଡ ୭ ୱିକେଟ୍‌ରେ ୧୨୬ ରନ୍‌ କରିଥିଲା। ପ୍ରଥମ ୪ ବ୍ୟାଟରଙ୍କ ସଫଳତା ବଳରେ ୧୭ ଓଭରରେ ୪ ୱିକେଟ୍‌ ହରାଇ ଭାରତ ଜିତି ନେଇଥିଲା।

ଇଂଲଣ୍ଡ ମହିଳା ଦଳ ଟସ୍ ଜିତି ବ୍ୟାଟିଂ କରିଥିଲା। ଘରୋଇ ଦଳର କୌଣସି ବ୍ୟାଟର ବଡ଼ ସ୍କୋର୍‌ କରି ପାରିନଥିଲେ। ସୋଫିଆ ଡଙ୍କଲି ୧୯ ବଲ୍‌ରୁ ୨୨ ଓ ଆଲିସ୍‌ କାପ୍‌ସି ୨୧ ବଲରୁ ୧୮ ରନ୍‌ କରିଥିଲେ। ଆମି ଜୋନ୍‌ସ ୯ ରନ୍‌ କରିଥିଲେ। ଅଧିନାୟିକା ଟାମି ବ୍ୟୁମଣ୍ଟ ୧୯ ବଲ୍‌ରୁ ୨୦ ଓ ପେଚ୍‌ ସ୍କୋଫିଲ୍‌ଡ ୧୮ ବଲ୍‌ରୁ ୧୬ ରନ୍‌ କରିଥିଲେ। ଶେଷ ୩ ଓଭରରୁ ଇଂଲଣ୍ଡ ୨୫ ରନ୍‌ କରିଥିଲା। ସୋଫି ଇକ୍ଲେଷ୍ଟୋନ୍‌ ୧୦ ବଲ୍‌ରୁ ୧୬ ଓ ଇସି ୱଙ୍ଗ୍‌ ୧୦ ବଲ୍‌ରୁ ୧୧ ରନ୍‌କରି ଅପରାଜିତ ଥିଲେ। ଦୁଇ ବାମହାତି ସ୍ପିନର ଶ୍ରୀ ଚରଣି ଓ ରାଧା ଯାଦବ ୨ଟି ଲେଖାଏଁ ୱିକେଟ୍‌ ନେଇଥିଲେ। ଭାରତ ୧୨୭ ରନ୍‌ ବିଜୟଲକ୍ଷ୍ୟର ପିଛା କରିଥିବା ବେଳେ ଦୁଇ ଓପ୍‌ନର ସ୍ମୃତି ମାନ୍ଧାନା ଓ ଶେଫାଳି ବର୍ମା ଆକ୍ରମଣାତ୍ମକ ବ୍ୟାଟିଂ କରିଥିଲେ। ଇଂଲଣ୍ଡ ପୂରା ଇନିଂସରେ ୮ଟି ଚୌକା ମାରିଥିବା ବେଳେ ଭାରତ ପ୍ରଥମ ୪ ଓଭରରୁ ୯ଟି ଚୌକା ମାରି ପାରିଥିଲା। ୭ ଓଭରରେ ୫୬ ରନ୍‌ର ଭାଗୀଦାରି ପରେ ଶେଫାଳି ବର୍ମା ୧୯ ବଲ୍‌ରୁ ୬ଟି ଚୌକା ସହ ୩୧ ରନ୍‌କରି ଆଉଟ୍‌ ହୋଇଥିଲେ। ମାନ୍ଧାନା ୩୧ ବଲ୍‌ରୁ ୫ଟି ଚୌକା ସହ ୩୨ ରନ୍‌ କରିଥିଲେ। ଜେମିମା ରଡ୍ରିଗ୍ବେଜ୍‌ ଓ ଅଧିନାୟିକା ହରମନପ୍ରୀତ କୌର ୩ୟ ୱିକେଟ୍‌ ପାଇଁ ୪୮ ରନ୍‌ ଯୋଡ଼ିଥିଲେ। ହରମନପ୍ରୀତ ୨୫ ବଲ୍‌ରୁ ୩ଟି ଚୌକା ସହ ୨୬ ରନ୍‌ କରିଥଲେ। ଜେମିମା ୨୨ ବଲ୍‌ରୁ ଗୋଟିଏ ଚୌକା ସହ ୨୪ ରନ୍‌କରି ଅପରାଜିତ ଥିଲେ। ମାତ୍ର ୧୫ ରନ୍‌ଦେଇ ୨ଟି ୱିକେଟ୍‌ ନେଇଥିବା ରାଧା ଯାଦବ ପ୍ଲେୟର ଅଫ୍ ଦି ମ୍ୟାଚ୍‌ ହୋଇଥିଲେ।