ଇରାନକୁ ଇସ୍ରାଏଲ ଦେଲା ଜବରଦସ୍ତ ଝଟକା! ୫ ଦିନରେ ଦ୍ୱିତୀୟ CDS ମୃତ

ଜେରୁଜେଲମ,୧୭।୬: ଇସ୍ରାଏଲୀ ସେନା ମଙ୍ଗଳବାର ଏକ ବଡ଼ କାର୍ଯ୍ୟାନୁଷ୍ଠାନରେ ଇରାନର ଶୀର୍ଷ ସେନା ଅଧିକାରୀ ଅଲି ଶାଦମାନୀଙ୍କୁ ହତ୍ୟା କରିଥିବା ସୂଚନା ଦେଇଛି।
ଅଲି ଶାଦମାନୀ ଇରାନୀ ସେନାର ଜରୁରୀକାଳୀନ କମାଣ୍ଡର ଥିଲେ। ସମ୍ପ୍ରତି ତାଙ୍କୁ ସମଗ୍ର ସେନାର କମାଣ୍ଡ ଦିଆଯାଇଥିଲା, କାରଣ ପୂର୍ବ କମାଣ୍ଡର ଆଲା ଅଲି ରସିଦ ଆକ୍ରମଣରେ ମୃତ୍ୟୁବରଣ କରିସାରିଛନ୍ତି।
ଅଲି ଶାଦମାନୀ ଇରାନୀ ସେନା ଏବଂ ରିଭୋଲ୍ୟୁସନାରୀ ଗାର୍ଡ (IRGC) ଉଭୟର ନେତୃତ୍ୱ ନେଇଥିଲେ। ତାଙ୍କୁ ଇରାନର ସବୁଠାରୁ ଗୁରୁତ୍ୱପୂର୍ଣ୍ଣ ସାମରିକ ନେତାଙ୍କ ମଧ୍ୟରୁ ଜଣେ ବୋଲି ବିବେଚନା କରାଯାଉଥିଲା। ତାଙ୍କ ମୃତ୍ୟୁକୁ ଇରାନୀ ସେନା ପାଇଁ ଏକ ବଡ଼ ଧକ୍କା ବୋଲି ବିବେଚନା କରାଯାଉଛି।
ମଙ୍ଗଳବାର ଅର୍ଥାତ୍‌ ଜୁନ ୧୭, ୨୦୨୫ରେ ତେଲ ଅଭିଭ ଏବଂ ଜେରୁଜେଲମରେ ଜୋରଦାର ବିସ୍ଫୋରଣ ଶୁଣାଯାଇଥିଲା। ଏଏଫପି ଅନୁଯାୟୀ, ଇସ୍ରାଏଲର ଅନେକ ସ୍ଥାନରେ ସାଇରନ ବାଜିବା ଆରମ୍ଭ ହୋଇଥିଲା, ଯାହା ପରେ ସେନା କହିଛି ଯେ ଇରାନରୁ କ୍ଷେପଣାସ୍ତ୍ର ମାଡ଼ କରାଯାଇଛି।
ଇସ୍ରାଏଲୀ ସେନା ଏକ ବିବୃତ୍ତିରେ କହିଛି, ‘କିଛି ସମୟ ପୂର୍ବରୁ, ଇରାନରୁ ଇସ୍ରାଏଲ ଆଡକୁ କ୍ଷେପଣାସ୍ତ୍ର ଆସିବାର ରିପୋର୍ଟ ପରେ ଅନେକ ଅଞ୍ଚଳରେ ସାଇରନ ବାଜିଥିଲା। ସେନା ଏହା ମଧ୍ୟ କହିଛି ଯେ ବାୟୁସେନା କ୍ଷେପଣାସ୍ତ୍ରଗୁଡ଼ିକୁ ପ୍ରତିହତ କରିବାରେ ଏବଂ ଆବଶ୍ୟକ ହେଲେ ପ୍ରତିଶୋଧ ନେବାରେ ନିୟୋଜିତ ଅଛି।’
ପ୍ରାୟ ୨୦ ମିନିଟ ପରେ, ସେନା ଆଉ ଏକ ବିବୃତ୍ତି ଜାରି କଲା, ଯେଉଁଥିରେ କୁହାଯାଇଥିଲା ଯେ ଏବେ ଲୋକମାନେ ଅନେକ ଅଞ୍ଚଳର ସୁରକ୍ଷିତ ସ୍ଥାନରୁ ବାହାରକୁ ଆସିପାରିବେ।
ସେନା ଏହା ମଧ୍ୟ କହିଛି ଯେ ଯେଉଁ ସ୍ଥାନରୁ କ୍ଷେପଣାସ୍ତ୍ର ପଡ଼ିବାର ରିପୋର୍ଟ ମିଳିଛି, ସେଠାକୁ ସନ୍ଧାନ ଏବଂ ଉଦ୍ଧାର ଦଳ ପଠାଯାଇଛି।

The post ଇରାନକୁ ଇସ୍ରାଏଲ ଦେଲା ଜବରଦସ୍ତ ଝଟକା! ୫ ଦିନରେ ଦ୍ୱିତୀୟ CDS ମୃତ appeared first on Dharitri Odia News.