ଇସ୍ରାଏଲକୁ ଇରାନର ଧମକ; ପରମାଣୁ ଅସ୍ତ୍ର ବନେଇବୁ, ଆକ୍ରମଣ କରିବୁ

ତେହରାନ,୧୩/୦୫: ଇରାନ ପରମାଣୁ ଅସ୍ତ୍ରକୁ ସାମ୍ନାକୁ ଆଣି ଇସ୍ରାଏଲକୁ ଧମକ ଦେଇଛି । ଇସ୍ରାଏଲ ସହ ବିବାଦ ବଢ଼ି ଚାଲିଥିବାବେଳେ ଦେଶର ଆଣବିକ ଅଭିଳାଷ ବାବଦରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ଜଣେ ପରାମର୍ଶଦାତାଙ୍କ ବୟାନ ଚିନ୍ତା  ବଢ଼ାଇଛି ।

ଆୟାତୋଲ୍ଲାଙ୍କ ପରାମର୍ଶଦାତା କମଲ ଖାରଜ୍ଜି  କହିଛନ୍ତି, ଏବେ ନ୍ୟୁକ୍ଲିୟର ବୋମା ପ୍ରସ୍ତୁତ କରିବାରେ ଇରାନର କୌଣସି ଉଦ୍ଦେଶ୍ୟ ନାହିଁ । ଯଦି ଦେଶର ଅସ୍ତିତ୍ୱ ଇସ୍ରାଏଲ ଯୋଗୁ ବିପଦରେ ପଡ଼େ ତେବେ ଇରାନ ଆଣବିକ ଅସ୍ତ୍ର ତିଆରି କରିବା ଦିଗରେ ଦିଗରେ ଏ ଯାଏ ଥିବା  ସିଦ୍ଧାନ୍ତକୁ ବଦଳାଇପାରିବ । ଇସ୍ରାଏଲ ଇରାନର ନ୍ୟୁକ୍ଲିୟର ସାଇଟ୍‌ରେ ଆକ୍ରମଣ କଲେ ଇରାନ ନିଜର ରକ୍ଷା ପାଇଁ ଏ  ଦିଗରେ ଆଗକୁ ବଢ଼ିବ । ୨୦୦୩ରେ ଇରାନ ସୁପ୍ରିମ ଲିଡର ଖାମେନେଇ ପରମାଣୁ ଅସ୍ତ୍ର ସମେତ ବ୍ୟାପକ ଧ୍ୱଂସଲୀଳା ରଚିବାର କ୍ଷମତା ଥିବା ଅସ୍ତ୍ର ବନାଇବା ବିରୋଧରେ ଫତୱା ଜାରି କରିଥିଲେ । 

କିନ୍ତୁ ୨୦୨୧ରେ ଇରାନର ତତ୍କାଳୀନ ଗୁଇନ୍ଦା ମନ୍ତ୍ରୀ  କହିଥିଲେ ଯେ, ପାଶ୍ଚାତ୍ୟ ଦେଶଗୁଡ଼ିକ ପକ୍ଷରୁ ଚାପ ପଡ଼ୁଥିବାରୁ ଇରାନ ଆବଶ୍ୟକ ପଡ଼ିଲେ ଏହି ଫତୱାକୁ  ପଲଟାଇପାରେ । ରିପୋର୍ଟ ଅନୁସାରେ, ଇରାନ ୬୦%  ପର୍ଯ୍ୟନ୍ତ ଏନ୍‌ରିଚ ବା ଏହାର ଗଣବତ୍ତା ବୃଦ୍ଧି କରାଉଛି । ସେହିପରି ଯୁଦ୍ଧାସ୍ତ୍ରରେ ବ୍ୟବହୃତ ୟୁରାନିୟମକୁ ୯୦%  ପର୍ଯ୍ୟନ୍ତ ଏନ୍‌ରିଚ କରାଉଛି । ପରମାଣୁ ଅସ୍ତ୍ରଶସ୍ତ୍ର ଉପରେ  ନଜର ରଖୁଥିବା ଏଜେନ୍ସି ଆଇଏଇଏ ଅନୁସାରେ, ଯଦି   ୟୁରାନିୟମକୁ ଅଧିକ ଏନ୍‌ରିଚ୍‌ କରାଯାଏ ତେବେ ତାହା  ୨ ପରମାଣୁ ଅସ୍ତ୍ରର ଆବଶ୍ୟକତା ପୂରଣ କରିବା ସହ  ସମାନ ହୋଇଯିବ । 

ଗତ ଜାନୁଆରୀରେ ଜାତିସଂଘର  ନ୍ୟୁକ୍ଲିୟର ନୀରିକ୍ଷକ ଡେଭିଡ୍‌ ଅଲ୍‌ବ୍ରାଇଟ ଦାବି କରିଥିଲେ  ଯେ, ଇରାନ ପାଖରେ ପରମାଣୁ ବୋମା ବନାଇବାର   ଟେକ୍ନୋଲୋଜି ମହଜୁଦ ଅଛି । ଏଥିପାଇଁ ଆବଶ୍ୟକ   ପରିମାଣର ୟୁରାନିୟମ ମଧ୍ୟ ରହିଛି । ଜରୁରି ପଡ଼ିଲେ  ଇରାନ ୫ରୁ ୧୨ ମାସ ଭିତରେ ପରମାଣୁ ବୋମା ପ୍ରସ୍ତୁତ  କରିପାରିବ ।   ଗତ ଏପ୍ରିଲ ୧ରେ ଇସ୍ରାଏଲ ସିରିଆରେ ଥିବା ଇରାନ   ଦୂତାବାସ କୋଠା ଉପରେ ଆକ୍ରମଣ କରିବା ଫଳରେ   ଇରାନର ଦୁଇ ଶୀର୍ଷ କମାଣ୍ଡରଙ୍କ ସମେତ ୧୩ ଜଣଙ୍କ   ମୃତ୍ୟୁ ଘଟିଥିଲା । ଏହାକୁ ନେଇ ଇରାନ ଓ ଇସ୍ରାଏଲ  ଭିତରେ ସଦ୍ୟ ବିବାଦ ଉପୁଜିଛି । ଏହାର ଜବାବରେ  ଇରାନ ଏପ୍ରିଲ ୧୩ରେ ଇସ୍ରାଏଲ ଉପରେ ୩ ଶହରୁ  ଅଧିକ ମିସାଇଲ ଏବଂ ଡ୍ରୋନ୍‌ରେ ଆକ୍ରମଣ କରିଥିଲା ।