ଏକନାଥ ସିନ୍ଦେଙ୍କ ଶିବସେନାରୁ ନିର୍ବାଚନ ଲଢିପାରନ୍ତି ଗୋବିନ୍ଦା, ୨୦୦୪ରେ ଅଟଳଙ୍କ ମନ୍ତ୍ରୀଙ୍କୁ ହରାଇଥିଲେ

ନୂଆଦିଲ୍ଲୀ: ବଲିଉଡର ଚର୍ଚ୍ଚିତ ଅଭିନେତା ଗୋବିନ୍ଦା ଦ୍ୱିତୀୟ ଥର ପାଇଁ ନିଜର ରାଜନୀତିକ ଇନିଂସ ଆରମ୍ଭ କରିବାକୁ ଚାହୁଁଛନ୍ତି । ସେ କିଛି ଦିନ ପୂର୍ବେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସହ ଆଲୋଚନା କରିଥିଲେ । ସେବେଠାରୁ ଚର୍ଚ୍ଚା ଜୋର ଧରିଛି ଯେ ସେ ଉତ୍ତର ପଶ୍ଚିମ ମୁମ୍ୱାଇ ଆସନରୁ ଲୋକସଭା ନିର୍ବାଚନ ଲଢିପାରନ୍ତି । ଏହି ଆସନ ଉପରେ ଏକନାଥ ସିନ୍ଦେଙ୍କ ଗୋଷ୍ଠୀ ଦାବିବାର ଏବଂ ସିଟ୍ ଭାଗବଣ୍ଟାରେ ଏହି ଆସନ ତାଙ୍କୁ ମିଳିପାରେ । ଏପରି ସ୍ଥିତିରେ ଏକନାଥ ସିନ୍ଦେ ଏହି ଆସନରୁ ଗୋବିନ୍ଦାଙ୍କୁ ମୈଦାନକୁ ଓହ୍ଲାଇପାରେ । ବର୍ତ୍ତମାନ ଏହି ଆସନରେ ଶିନ୍ଦେ ଗୋଷ୍ଠୀର ହିଁ ଗଜାନନ କୀର୍ତ୍ତିକାର ସାଂସଦ ଅଛନ୍ତି । କିନ୍ତୁ ଶିବସେନା ପୁଣି ଥରେ ତାଙ୍କୁ ଏହି ଆସନରୁ ଟିକେଟ୍ ଦେଇ ନପାରେ ।

ଗଜାନନ କୀର୍ତ୍ତିକରଙ୍କୁ ରିପିଟ୍ ନକରାଯିବା ସ୍ଥିତିରେ ବିଜେପି ଚାହୁଁଥିଲା ଯେ ତା ଭାଗରେ ଏହି ଆସନ ପଡ଼ୁ । କିନ୍ତୁ ଏବେ ଚିତ୍ର ବଦଳୁଛି । ଶିବସେନା ଏହି ଆସନ ପାଇଁ ପୁଣି ଥରେ ଦାବି କରୁଛି । ଯଦି ଗୋବିନ୍ଦା ନିର୍ବାଚନ ଲଢନ୍ତି, ତେବେ ରାଜନୀତିରେ ଏହା ତାଙ୍କର ଦ୍ୱିତୀୟ ଇନିଂସ ହେବ । ଏହା ପୂର୍ବରୁ ୨୦୦୪ରେ ସେ କଂଗ୍ରେସରୁ ଟିକେଟ୍ ପାଇଥିଲେ ଏବଂ ତତ୍କାଳୀନ ପେଟ୍ରୋଲିୟମ ମନ୍ତ୍ରୀ ରାମ ନାଇକଙ୍କୁ ହରାଇଥିଲେ । ଲଗାତାର ୫ ଥରର ସାଂସଦ ଥିବା ରାମ ନାଇକଙ୍କୁ ହରାଇ ଗୋବିନ୍ଦା ବେଶ ଚର୍ଚ୍ଚାରେ ରହିଥିଲେ ।   

ତେବେ ଗୋବିନ୍ଦାଙ୍କ ରାଜନୀତିରେ ପ୍ରଥମ ଇନିଂସ ଭଲ କଟି ନଥିଲା । ସେ ଲୋକସଭା କ୍ଷେତ୍ରରେ ଅଧିକ ସମୟ ଦେଇନଥିଲେ । ଏହି କାରଣରୁ ତାଙ୍କ ବିରୋଧରେ ଅନେକ ଅଭିଯୋଗ ମଧ୍ୟ ଆସିଥିଲା । ଏହାପରେ ଗୋବିନ୍ଦା କହିଥିଲେ ଯେ ରାଜନୀତିକୁ ଆସିବା ତାଙ୍କର ଭୁଲ ଥିଲା ଏବଂ ଏହି କାରଣରୁ ତାଙ୍କ ଫିଲ୍ମ କ୍ୟାରିୟର ଉପରେ ବିପରୀତ ପ୍ରଭାବ ପଡ଼ିଥିଲା । ଶେଷରେ ରାଜନୀତି ଛାଡ଼ିବା ପାଇଁ ସେ ଘୋଷଣା କରିଥିଲେ ।