ଏମିତି ଏକ ଦେଶ, ୯୫ ବର୍ଷରୁ ଏଠାରେ ଜନ୍ମ ହୋଇନାହାଁନ୍ତି ଛୁଆ

ନୂଆଦିଲ୍ଲୀ ୧୮।୦୩: ଦୁନିଆରେ ଅନେକ ଦେଶ ରହିଛି, ଯେଉଁଠାରେ ଭିନ୍ନ ଭିନ୍ନ କଥା ଦେଖିବାକୁ ମିଳିଥାଏ । କିନ୍ତୁ ଏପରି ଏକ ଦେଶ ରହିଛି ଯେଉଁଠି ଦୀର୍ଘ ୯୫ ବର୍ଷରୁ ଅଧିକ ଦିନ ହେଲାଣି ଜନ୍ମ ହୋଇନାହାଁନ୍ତି କୌଣସି ଶିଶୁ । କିନ୍ତୁ ଏହାର କାରଣ କଣ ?  ଏଠାରେ କାହିଁକି ଜନ୍ମ ହୋଇପାରିବେନି ପିଲାମାନେ ? ଆସନ୍ତୁ ଜାଣିବା… 

ଦେଶଟିର ନାଁ ହେଉଛି ଭାଟିକାନ୍ ସିଟି। ଏହା ଦୁନିଆର ସବୁଠାରୁ ଛୋଟ ଦେଶ । ୯୫ ବର୍ଷ ତଳେ ଅର୍ଥାତ୍‌ ୧୯୨୯ ମସିହାରେ ଦେଶ ଗଠନ ହୋଇଥିଲା । ଏହି ଦେଶର ଜନସଂଖ୍ୟା ମାତ୍ର ୮୦୦ । ବାସ୍ତବରେ ଦେଶ ଗଠନ ସମୟରେ ସ୍ପଷ୍ଟ ହୋଇଥିଲା ଯେ ଏହା କେବଳ ରୋମାନ କ୍ୟାଥୋଲିକ ଖ୍ରୀଷ୍ଟିଆନ୍‌ଙ୍କ ପାଇଁ କାମ କରିବ । 

ବିଶ୍ୱର ସମସ୍ତ କ୍ୟାଥୋଲିକ୍‌ ଚର୍ଚ୍ଚ ଓ ପାଦ୍ରୀ ଏବଂ ଖ୍ରୀଷ୍ଟଧର୍ମଗୁରୁଙ୍କୁ ଏହିଠାରୁ ନିୟନ୍ତ୍ରିତ କରାଯାଏ । ଦେଶ ଗଠନ ପରଠୁ ହସ୍‌ପିଟାଲ ନିର୍ମାଣ ଲାଗି ଦାବି ହୋଇଛି କିନ୍ତୁ ପ୍ରତିଥର ଖାରଜ କରି ଦିଆଯାଇଛି । ଏଠାରେ ଲୋକେ ରୋଗର ଶିକାର ହେଲେ କିମ୍ବା ମହିଳା ଗର୍ଭବତୀ ହେଲେ, ତାଙ୍କୁ ରୋମ୍‌ର ହସ୍‌ପିଟାଲକୁ ପଠାଇ ଦିଆଯାଏ ଅଥବା ପାଖ ଦେଶକୁ ପଠାଇବାର ବ୍ୟବସ୍ଥା କରାଯାଏ । 

ସବୁଠାରୁ ବଡ କଥା ହେଲା ଦେଶରେ କୌଣସି ମହିଳା ଗର୍ଭବତୀ ହେଲେ, ପ୍ରସବ ସମୟ ନିକଟତର ହେବା ପରେ ନିୟମ ଅନୁସାରେ ସନ୍ତାନ ପ୍ରସବ ନ ହେବା ପର୍ଯ୍ୟନ୍ତ ତାଙ୍କୁ ଦେଶ ବାହାରେ ରଖାଯାଏ । ଏହି ନିୟମ ଅତ୍ୟନ୍ତ କଡ଼ାକଡ଼ି ପାଳନ କରାଯାଏ । ବାସ୍ତବରେ ଭାଟିକାନ୍ ସିଟିରେ କେହି ସ୍ଥାୟୀ ନାଗରିକତା ପାଆନ୍ତିନି । ଏଠାରେ ରହୁଥିବା ସମସ୍ତ ଲୋକ କେବଳ ସେମାନଙ୍କ କାର୍ଯ୍ୟକାଳ ପର୍ଯ୍ୟନ୍ତ ରହିଥାନ୍ତି, ସେପର୍ଯ୍ୟନ୍ତ ସେମାନେ ଅସ୍ଥାୟୀ ନାଗରିକତା ପାଆନ୍ତି । ଏହି କାରଣରୁ ଏଠାରେ କୌଣସି ଜନ୍ମ ନାହିଁ ଯେଉଁଠାରୁ ଭବିଷ୍ୟତରେ କେହି ସ୍ଥାୟୀ ନାଗରିକତା ଦାବି କରିପାରିବେ।  

ଭାଟିକାନ୍ ସିଟି ନିଶ୍ଚିତ ଭାବରେ ଏକ ସାର୍ବଭୌମ ଦେଶ କିନ୍ତୁ ଏହା ଇଟାଲୀ ମଧ୍ୟରେ ଏକ ଛୋଟ ଅଞ୍ଚଳ। ଏହି ଦେଶରେ ପୋପ୍‌ଙ୍କ ପବିତ୍ର ସରକାର ଚାଲିଛନ୍ତି। ଏହା ସମଗ୍ର ବିଶ୍ୱରେ ରୋମାନ୍ କ୍ୟାଥୋଲିକ୍ ଖ୍ରୀଷ୍ଟିଆନମାନଙ୍କର ପବିତ୍ର ସ୍ଥାନ। ଭାଟିକାନ୍ ସିଟି ବୋଧହୁଏ ଏକମାତ୍ର ଦେଶ ଯେଉଁଠାରେ ଜେଲ ନାହିଁ । ତଥାପି ଦେଶରେ ଅପରାଧ ହାର ଅଧିକ । ଚୋରି, ଛିନ୍‌ତାଇ ଏଠାରେ ଏକ ସାଧାରଣ ଅପରାଧ । 

ଦୋଷୀ ପ୍ରମାଣିତ ବ୍ୟକ୍ତି ଲେଟରନ୍‌ ସନ୍ଧି ଅନୁସାରେ ଇଟାଲୀୟ ଜେଲରେ କାଳ କାଟନ୍ତି । ଏହାର ଖର୍ଚ୍ଚ ଭାଟିକାନ ସିଟି ସରକାର ବହନ କରନ୍ତି । ବିଶ୍ୱର ଅନ୍ୟ ସମସ୍ତ ଦେଶ ତୁଳନାରେ ଏଠାକାର ଲୋକ ଅଧିକ ମଦ୍ୟପାନ କରନ୍ତି । ଦେଶର ହାରାହାରି ବାସିନ୍ଦା ବର୍ଷକୁ ୭୪ ଲିଟର ୱାଇନ୍‌ ପିଉଥିବା ଆକଳନ କରାଯାଇଛି । ଏହି ଦେଶରେ ବିଶ୍ୱର ସବୁଠୁ ଛୋଟ ରେଳ ଷ୍ଟେସନ୍‌ ବି ଅଛି ।