ଏସ୍‌ଆର୍‌ଏମ୍‌-ସିସିଟିଆର୍‌ ସହ ପତଞ୍ଜଳିର ଚୁକ୍ତି

ଭୁବନେଶ୍ୱର,୪।୫(ଅନୁରାଧା ମହାରଣା): ପତଞ୍ଜଳି ରିସର୍ଚ୍ଚ ଫାଉଣ୍ଡେଶନ (ପିଆର୍‌ଏଫ୍‌) ଏବଂ ଚେନ୍ନାଇର ଏସ୍‌ଆର୍‌ଏମ୍‌ ସେଣ୍ଟର ଫର୍‌ କ୍ଲିନିକାଲ ଟ୍ରାଏଲ ଆଣ୍ଡ ରିସର୍ଚ୍ଚ ବା ଏସ୍‌ଆର୍‌ଏମ୍‌-ସିସିଟିଆର୍‌ ମଧ୍ୟରେ ଏକ ଚୁକ୍ତି ନିକଟରେ ସ୍ବାକ୍ଷରିତ ହୋଇଯାଇଛି। ଏହି ଅବସରରେ ପିଆର୍‌ଏଫର ଆଚାର୍ଯ୍ୟ ବାଲକ୍ରିଷ୍ଣାଙ୍କ ସମେତ ପିଆର୍‌ଏଫ୍‌ର ମୁଖ୍ୟ ବୈଜ୍ଞାନିକ ଅନୁରାଗ ବୈର୍ଷ୍ଣୟ, ଏସ୍‌ଆର୍‌ଏମ୍‌-ସିସିଟିଆର ପକ୍ଷରୁ ନୀତିନ ଏମ୍‌. ନାଗରକର, ଡା. ସତ୍ୟଜିତ ମହାପାତ୍ର ଏବଂ ଡା. ସରସ୍ବତୀ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ। ଏହି ଚୁକ୍ତିନାମା ସ୍ବାକ୍ଷର ହେବା ଅବସରରେ ଆଚାର୍ଯ୍ୟ ବାଲକ୍ରିଷ୍ଣା କହିଛନ୍ତି, ଏହି ଚୁକ୍ତି ଆୟୁର୍ବେଦ ଇତିହାସରେ ଏକ ମାଇଲଖୁଣ୍ଟ ହେବ। ଏହି ମିଳିତ ପ୍ରୟାସ ଆୟୁର୍ବେଦର ପୁନର୍ଜୀବନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ସେ କହିଛନ୍ତି। ସେ କହିଛନ୍ତି , ଆୟୁର୍ବେଦରୁ ଭାରତୀୟ ସନାତନ ଜ୍ଞାନ ଉପରେ ଆଧାରିତ ପ୍ରମାଣଭିତ୍ତିକ ଔଷଧକୁ କ୍ଲିନିକାଲ ପରୀକ୍ଷଣ ମାଧ୍ୟମରେ ବିଶ୍ୱସ୍ତରରେ ପହଞ୍ଚାଇବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଭାରତର ଏହି ଦୁଇଟି ଅଗ୍ରଣୀ ଅନୁଷ୍ଠାନ ଆୟୁର୍ବେଦିକ ଔଷଧର ପ୍ରଭାବ ସମ୍ପର୍କରେ ସମଗ୍ର ବିଶ୍ୱରେ ଉପସ୍ଥାପନ କରିବ। ଡା. ନୀତିନ ଏମ୍‌. ନାଗରକର କହିଛନ୍ତି, ଭାରତୀୟ ପ୍ରାଚୀନ ଚିକିତ୍ସା ବିଜ୍ଞାନ ଆୟୁର୍ବେଦକୁ ବିଶ୍ୱସ୍ତରୀୟ ମାନ୍ୟତା ଦେବାରେ ଏହି ଚୁକ୍ତି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଡା. ଅନୁରାଗ କହିଛନ୍ତି, ଏହି ଏମ୍‌ଓୟୁ ସାହାଯ୍ୟରେ ଉଭୟ ଅନୁଷ୍ଠାନ ମିଳିତ ଭାବରେ ଆୟୁର୍ବେଦିକ ଔଷଧର ପ୍ରଭାବକୁ ପ୍ରମାଣଭିତ୍ତିକ ଉପାୟରେ ଉପସ୍ଥାପନ କରିବେ ଏବଂ ବିଭିନ୍ନ ରୋଗରେ ସେମାନଙ୍କର ଉପଯୋଗିତା ପ୍ରମାଣ କରିବେ।

The post ଏସ୍‌ଆର୍‌ଏମ୍‌-ସିସିଟିଆର୍‌ ସହ ପତଞ୍ଜଳିର ଚୁକ୍ତି appeared first on Dharitri Odia News.