ଓଡ଼ିଶାରେ ବିକ୍ରି ହେଉଛି ନକଲି ସମ୍ବଲପୁରୀ ଶାଢ଼ି, ନକଲିକୁ ଅସଲି କହି ଚଢ଼ା ଦରରେ ବିକୁଛନ୍ତି ବ୍ୟବସାୟୀ

ଭୁବନେଶ୍ବର ୪।୧୨: ଓଡ଼ିଶାରେ ବିକ୍ରି ହେଉଛି ନକଲି ସମ୍ବଲପୁରୀ ଶାଢ଼ି । ନକଲି ଶାଢ଼ିକୁ ଅସଲି କହି ଚଢ଼ା ଦରରେ ବିକ୍ରି କରୁଛନ୍ତି ବ୍ୟବସାୟୀ । ଯାହା ଫଳରେ କ୍ଷତି ସହୁଛନ୍ତି ସମ୍ବଲପୁରୀ ଶାଢ଼ି ବୁଣାକାର ଓ ବ୍ୟବସାୟୀ । ଏକଥା କହିଛନ୍ତି ଖୋଦ ହସ୍ତତନ୍ତ ଓ ବୟନଶିଳ୍ପ ମନ୍ତ୍ରୀ ପ୍ରଦୀପ ବଳ ସାମନ୍ତ । 

ତେବେ ନକଲି ସମ୍ବଲପୁରୀ ଶାଢି ଓଡ଼ିଶା ବଜାରକୁ ଆସିବା ପରେ ବୁଣାକାରଙ୍କ ଉପରେ ପଡ଼ିଛି ବଡ଼ ପ୍ରଭାବ । ରାଜ୍ୟ ସରକାର ବଜାରରେ ବିକ୍ରି ହେଉଥିବା ନକଲି ସମ୍ବଲପୁରୀ ଶାଢ଼ି ଉପରେ ନଜର ରଖିଥିବା କହିଛନ୍ତି ହସ୍ତତନ୍ତ ଓ ବୟନ ଶିଳ୍ପ ମନ୍ତ୍ରୀ । ନକଲି ସମ୍ବଲପୁରୀ ଶାଢ଼ି ବିକ୍ରି ନେଇ ଅଭିଯୋଗ ପରେ ସରକାର ତତ୍ପରତା ଦେଖାଇଛନ୍ତି ଏବଂ ସଂପୃକ୍ତ ବ୍ୟବସାୟୀଙ୍କ ନାମରେ କେସ୍ କରିବା ସହ କୋର୍ଟ ଦ୍ବାରା କରିଛନ୍ତି ସମନ ।

କେବଳ ଓଡ଼ିଶା ନୁହେଁ, ଓଡ଼ିଶା ବାହାରେ ମଧ୍ୟ ସମ୍ବଲପୁରୀ ଶାଢ଼ିର ବେଶ୍ ଲୋକପ୍ରିୟତା ଏବଂ ଚାହିଦା ବଢ଼ିଛି । ଆଉ ତା ସାଙ୍ଗକୁ ବି ବଢ଼ିଛି ନକଲି ଶାଢ଼ିର କାରବାର।ସମ୍ବଲପୁରୀ ଶାଢ଼ି ପରି ଅବିକଳ, ନକଲି ଶାଢୀ ଦେଖାଯାଉଥିବାରୁ ଓ କମ ଦାମରେ ମିଳୁଥିବାରୁ ତାହା ବୁଣାକାର ଓ ବସ୍ତ୍ର ବ୍ୟବସାୟୀଙ୍କ ଉପରେ ସିଧାସଳଖ ପ୍ରଭାବ ପକାଉଛି । ଖାଲି ସେତିକି ନୁହେଁ, ଗୁଜରାଟ, ଉତ୍ତରପ୍ରଦେଶ, କର୍ଣ୍ଣାଟକ ଓ ରାଜସ୍ଥାନ ଆଦି ରାଜ୍ୟରେ ପାୱାରଲୁମ ମାଧ୍ୟମରେ ଶିଲ୍କ, ପଲିଷ୍ଟର ଶାଢ଼ିରେ ସମ୍ବଲପୁରୀ ଶାଢ଼ିର ଡ଼ିଜାଇନ ଓ ବାନ୍ଧ କଳାର ଛବିକୁ ପ୍ରିଣ୍ଟ କରି ଅତି କମ୍ ଦାମରେ ବିକ୍ରି କରାଯାଉଥିବାରୁ ବୁଣାକାର ଓ ବ୍ୟବସାୟୀ କ୍ଷତି ସହୁଛନ୍ତି । ଏହାକୁ ନେଇ ମଧ୍ୟ ବାରମ୍ଵାର ଦାବି କରି ଆସୁଥିଲେ ବୁଣାକାର ସଂଘ । ନକଲି ସମ୍ବଲପୁରୀ ଶାଢ଼ି ବିକ୍ରିକୁ ନେଇ ସରକାର ପଦକ୍ଷେପ ନେବା ପରେ, ଏହାକୁ ସ୍ବାଗତ କରିଛନ୍ତି ଉଭୟ ବୁଣାକାର ଓ ଗ୍ରାହକ । 

You Can Read:

ସାଇକେଲ ଧରି ଛିଡା ହୋଇଥିଲେ ଦୁଇ ଛାତ୍ର, ଧକ୍କା ଦେଲା ପିକଅପ୍, ଚାଲିଗଲା ଦୁଇ ଜଣଙ୍କ ଜୀବନ