ଓଡ଼ିଶାରେ ହଲଚଲ: ବିଜେଡି ଛାଡି କଂଗ୍ରେସରେ ଯୋଗ ଦେଲେ ବଡ଼ ନେତା

ଭୁବନେଶ୍ୱର, ୧୦।୭: ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ହେମାନନ୍ଦ ବିଶ୍ୱାଳଙ୍କ ଝିଅ ସୁନୀତା ବିଶ୍ୱାଳ ବିଜୁ ଜନତା ଦଳ (ବିଜେଡି) ଛାଡ଼ି ପୁଣି କଂଗ୍ରେସ ଦଳରେ ଯୋଗ ଦେଇଛନ୍ତି। ଏହି ଖବର ରାଜ୍ୟ ରାଜନୀତିରେ ଏକ ହଲଚଲ ସୃଷ୍ଟି କରିଛି। ଯାହା ବିଜେଡି ପାଇଁ ଏକ ବଡ଼ ଝଟକା ବୋଲି କୁହାଯାଉଛି।

ସୁନୀତା ବିଶ୍ୱାଳ, ଯିଏ ଦୀର୍ଘ ଦିନ ଧରି କଂଗ୍ରେସ ଦଳରେ ଥାଇ ରାଜନୀତିରେ ସକ୍ରିୟ ଥିଲେ, କିଛି ବର୍ଷ ପୂର୍ବେ ବିଜେଡିରେ ଯୋଗ ଦେଇଥିଲେ। ତେବେ, ସମ୍ପ୍ରତି ସେ ପୁଣି ତାଙ୍କର ପୂର୍ବତନ ଦଳ କଂଗ୍ରେସକୁ ଫେରିବାକୁ ନିଷ୍ପତ୍ତି ନେଇଛନ୍ତି। ଏହି ନିଷ୍ପତ୍ତି ପଛରେ ତାଙ୍କର ବ୍ୟକ୍ତିଗତ ଓ ରାଜନୈତିକ କାରଣ ରହିଥିବା ଜଣାପଡ଼ିଛି।

ସୁନୀତାଙ୍କ ବାପା ହେମାନନ୍ଦ ବିଶ୍ୱାଳ ଓଡ଼ିଶାରେ କଂଗ୍ରେସର ଜଣେ ବରିଷ୍ଠ ନେତା ଏବଂ ପୂର୍ବତନ ମୁଖ୍ୟମନ୍ତ୍ରୀ ଥିଲେ। ତାଙ୍କର ରାଜନୈତିକ ପରମ୍ପରାକୁ ଆଗେଇ ନେବା ପାଇଁ ସୁନୀତାଙ୍କ କଂଗ୍ରେସକୁ ଫେରିବାକୁ ନେଇ ଚର୍ଚ୍ଚା ଜୋର ଧରିଛି। ଏହି ଘଟଣା ସମ୍ପର୍କରେ ସୁନୀତା ବିଶ୍ୱାଳ କହିଛନ୍ତି, “ମୋର ପିତାଙ୍କ ଆଦର୍ଶ ଓ କଂଗ୍ରେସ ଦଳର ମୂଲ୍ୟବୋଧ ମୋତେ ସବୁବେଳେ ପ୍ରେରଣା ଦେଇଛି। ମୁଁ ପୁଣି କଂଗ୍ରେସ ଦଳରେ ଯୋଗ ଦେଇ ରାଜ୍ୟର ଲୋକଙ୍କ ସେବା କରିବାକୁ ଚାହୁଁଛି।”

ଅନ୍ୟପକ୍ଷରେ, ବିଜେଡି ନେତୃତ୍ୱ ଏହି ନିଷ୍ପତ୍ତିକୁ ନେଇ ତତ୍କାଳ କୌଣସି ପ୍ରତିକ୍ରିୟା ଦେଇନାହାନ୍ତି। ତେବେ, ରାଜନୈତିକ ବିଶ୍ଳେଷକମାନେ କହୁଛନ୍ତି ଯେ, ସୁନୀତାଙ୍କ ଏହି ପଦକ୍ଷେପ ଆଗାମୀ ର୍ନିବାଚନକୁ ଦୃଷ୍ଟିରେ ରଖି କଂଗ୍ରେସ ଦଳକୁ ରାଜ୍ୟରେ ଶକ୍ତିଶାଳୀ କରିବାରେ ସହାୟକ ହୋଇପାରେ। ଏହା ସହିତ, ରାଜ୍ୟରେ କଂଗ୍ରେସ ଦଳ ସୁନୀତା ବିଶ୍ୱାଳଙ୍କୁ ସ୍ବାଗତ କରିଛି। ରାଜ୍ୟ କଂଗ୍ରେସ ସଭାପତି କହିଛନ୍ତି, “ସୁନୀତା ବିଶ୍ୱାଳଙ୍କ ଫେରିବା ଦଳ ପାଇଁ ଏକ ବଡ଼ ସଫଳତା। ତାଙ୍କର ଅଭିଜ୍ଞତା ଓ ନେତୃତ୍ୱ ରାଜ୍ୟରେ କଂଗ୍ରେସକୁ ଆହୁରି ମଜବୁତ କରିବ।

The post ଓଡ଼ିଶାରେ ହଲଚଲ: ବିଜେଡି ଛାଡି କଂଗ୍ରେସରେ ଯୋଗ ଦେଲେ ବଡ଼ ନେତା appeared first on Dharitri Odia News.