କଂଗ୍ରେସ ଟୁକଡେ ଟୁକଡେ ଗ୍ୟାଙ୍ଗର ସୁଲତାନ: ମୋଦି

ମୈଶୂର,୧୪।୪: ଏବେ ଲୋକ ସଭା ନିର୍ବାଚନ ଆରମ୍ଭ ହେବାକୁ ଆଉ କିଛି ଦିନ ବାକି ଅଛି। ଏଭଳି ପରିସ୍ଥିତିରେ ସମସ୍ତ ରାଜନୈତିକ ଦଳ ଭୋଟରଙ୍କ ଦୃଷ୍ଟି ଆକର୍ଷଣ କରିବା ଏବଂ ସେମାନଙ୍କ ବିରୋଧୀଙ୍କୁ ଘୃଣା କରିବା ପାଇଁ କୌଣସି ବାଟ ଛାଡି ନାହାଁନ୍ତି। ଇତିମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କର୍ନାଟକର ମୈଶୂରରେ ଏକ ସାଧାରଣ ସଭାକୁ ସମ୍ବୋଧିତ କରିଥିଲେ। ଏହି ସମୟରେ ସେ କଂଗ୍ରେସକୁ ଟୁକଡେ ଟୁକଡେ ଗ୍ୟାଙ୍ଗର ସୁଲତାନ ବୋଲି କହିଥିଲେ। କେବଳ ଏତିକି ନୁହେଁ ବରଂ କଂଗ୍ରେସ ଦେଶକୁ ବିଭାଜନ ଏବଂ ଦୁର୍ବଳ କରିଥିବା ଅଭିଯୋଗ କରିଛନ୍ତି ମୋଦି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଂଗ୍ରେସକୁ ଟାର୍ଗେଟ କରି କହିଛନ୍ତି ଯେ ଆଜି କଂଗ୍ରେସ ଦଳ ଟୁକଡେ ଟୁକଡେ ଗ୍ୟାଙ୍ଗର ସୁଲତାନ ପରି ବୁଲୁଛି। ଦେଶକୁ ବିଭାଜନ, ଭାଙ୍ଗିବା ଏବଂ ଦୁର୍ବଳ କରିବା ପାଇଁ କଂଗ୍ରେସର ବିପଜ୍ଜନକ ଉଦ୍ଦେଶ୍ୟ ଆଜି ମଧ୍ୟ ସମାନ ରହିଛି। ବର୍ତ୍ତମାନ କଂଗ୍ରେସ ଦେଶ ପାଇଁ ଘୃଣାର ସମସ୍ତ ସୀମା ଅତିକ୍ରମ କରିଛି। ସେ କହିଛନ୍ତି ଯେ କର୍ନାଟକର ଲୋକମାନେ ଏହାର ସାକ୍ଷୀ ଅଟନ୍ତି ଯେ ଯିଏ ଭାରତ ବିରୋଧରେ କଥା ହୁଏ, କଂଗ୍ରେସ ତାଙ୍କୁ ପୁରସ୍କାର ସ୍ବରୂପ ନିର୍ବାଚନ ଟିକେଟ ଦେଇଥାଏ।
ଏହି ସମୟରେ ପ୍ରଧାନମନ୍ତ୍ରୀ କହିଛନ୍ତି ଯେ କଂଗ୍ରେସ ଦେଶକୁ ଘୃଣା କରିବାର ସମସ୍ତ ସୀମା ଅତିକ୍ରମ କରିଛି। ସେ କହିଛନ୍ତି ଯେ ନିର୍ବାଚନ ଲଢିବା ପାଇଁ ଭାରତ ବିରୋଧରେ କହୁଥିବା ଲୋକଙ୍କୁ କଂଗ୍ରେସ ଟିକେଟ ଦେଇଥାଏ। ସେ ଆହୁରି ମଧ୍ୟ କହିଛନ୍ତି ଯେ ଏହା ହେଉଛି କଂଗ୍ରେସର ପତନର ଶିଖର କାରଣ ଦଳର ନେତାମାନେ ପ୍ରଥମେ ବନ୍ଦେ ମାତରମଙ୍କୁ ବିରୋଧ କରିଥିଲେ ଏବଂ ବର୍ତ୍ତମାନ ଭାରତ ମାତା କି ଜୟ କହିବାରେ ଦ୍ୱିଧା କରୁଛନ୍ତି। କ୍ଷମତା ପାଇଁ ନିଆଁ ସହ ଖେଳୁଥିବା କଂଗ୍ରେସକୁ ଅଭିହିତ କରି ସେ କହିଛନ୍ତି ଯେ ଯେଉଁ ସମୟରେ ବିଶ୍ୱରେ ଭାରତର ସ୍ଥିତି ବଢୁଛି, ସେତେବେଳେ କଂଗ୍ରେସ ନେତାମାନେ ବିଦେଶ ଯାଇ ଭାରତର ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ କୌଣସି ସୁଯୋଗ ଛାଡୁ ନାହାଁନ୍ତି। ପ୍ରଧାନମନ୍ତ୍ରୀ ଏହା ମଧ୍ୟ ଅଭିଯୋଗ କରିଛନ୍ତି ଯେ ଭାରତୀୟ ସେନା ପକ୍ଷରୁ ସର୍ଜିକାଲ ଷ୍ଟ୍ରାଇକର ପ୍ରମାଣ କଂଗ୍ରେସ ଦାବି କରିଛି।
ଏହି ସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଜନତା ଦଳ ସେକ୍ୟୁଲାରର ସଂରକ୍ଷକ ତଥା ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବେ ଗୌଡା ମଧ୍ୟ ଉପସ୍ଥିତ ଥିଲେ। ସୂଚନାଯୋଗ୍ୟ, ଜନତା ଦଳ ସେକ୍ୟୁଲାର ସେପ୍ଟେମ୍ବର ୨୦୨୩ରେ ନ୍ୟାସନାଲ ଡେମୋକ୍ରାଟିକ ଆଲାଇନ୍ସରେ ଯୋଗ ଦେଇଥିଲେ। କର୍ନାଟକର ମୋଟ ୨୮ଟି ଲୋକ ସଭା ଆସନ ମଧ୍ୟରୁ ଭାଜପା ୨୫ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଥିବାବେଳେ ଜେଡି (ଏସ) ୩ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି।

The post କଂଗ୍ରେସ ଟୁକଡେ ଟୁକଡେ ଗ୍ୟାଙ୍ଗର ସୁଲତାନ: ମୋଦି appeared first on Dharitri Odia News.