କଠୋର ହୁଅନ୍ତୁ ଖାର୍ଗେ, ଉପଦେଶ ଦେଲେ ରାହୁଲ

ନୂଆଦିଲ୍ଲୀ,୩୦।୧୧: ହରିୟାଣା ଓ ମହାରାଷ୍ଟ୍ର ବିଧାନସଭା ନିର୍ବାଚନରେ ପରାଜୟ ପରେ କଂଗ୍ରେସର ଶୀର୍ଷ ନେତାମାନେ ବିଚାରବିମର୍ଶ କରିଛନ୍ତି। କଂଗ୍ରେସ କାର୍ଯ୍ୟକାରିଣୀ କମିଟିରେ ସଂଗଠନ ବିଷୟରେ ଆଲୋଚନା ହୋଇଥିଲା ଏବଂ ନିର୍ବାଚନ ଆୟୋଗର ଭୂମିକା ଉପରେ ପ୍ରଶ୍ନ ଉଠିଥିଲା। ଇଭିଏମ ସମେତ ସମଗ୍ର ନିର୍ବାଚନ ପ୍ରକ୍ରିୟାକୁ ନେଇ ପ୍ରଶ୍ନ ଉଠିଥିବା ନେଇ ଦେଶବ୍ୟାପୀ ଆନ୍ଦୋଳନ ଆରମ୍ଭ କରିବାକୁ ଦଳ ଘୋଷଣା କରିଛି।

ଏହା ବ୍ୟତୀତ ସଂଗଠନର ଉନ୍ନତି ପାଇଁ କଡା ପଦକ୍ଷେପ ନିଆଯିବା ଉଚିତ ବୋଲି କୁହାଯାଇଥିଲା। ସୂଚନାନୁସାରେ, ରାହୁଲ ଗାନ୍ଧୀ ଉତ୍ତରଦାୟିତ୍ୱକୁ ଦୃଷ୍ଟିରେ ରଖି କଠୋର ହେବାକୁ ଦଳର ସଭାପତି ମଲ୍ଲିକାର୍ଜୁନ ଖାର୍ଗେଙ୍କୁ ମଧ୍ୟ କହିଛନ୍ତି।

ବୈଠକରେ ରାହୁଲ ଗାନ୍ଧୀ ନେତାମାନଙ୍କୁ ସାହସ ନ ହରାଇବାକୁ ନିବେଦନ କରିଥିଲେ। ସେ କହିଛନ୍ତି, କେବଳ ଇଭିଏମ ପ୍ରଶ୍ନବାଚୀ ନୁହେଁ, ସମଗ୍ର ନିର୍ବାଚନ ବ୍ୟବସ୍ଥା ସନ୍ଦେହ ଘେରରେ ରହିଛି ଏବଂ ନିର୍ବାଚନ ଆୟୋଗ ନିରପେକ୍ଷ ଭୂମିକା ଗ୍ରହଣ କରୁନାହାଁନ୍ତି।

ସେହିପରି ଦଳକୁ ସୁଦୃଢ଼ କରିବାକୁ ହେଲେ କଠୋର ନିଷ୍ପତ୍ତି ନେବାକୁ ହେବ ଏବଂ ଉତ୍ତରଦାୟିତ୍ୱ ଧାର୍ଯ୍ୟ କରିବାକୁ ପଡ଼ିବ ବୋଲି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି। ନିର୍ବାଚନ ଫଳାଫଳରୁ ଆମକୁ ଶିକ୍ଷା ଗ୍ରହଣ କରିବାକୁ ହେବ ବୋଲି ଏଆଇସିସି ମୁଖ୍ୟାଳୟରେ ଅନୁଷ୍ଠିତ କଂଗ୍ରେସ କାର୍ଯ୍ୟକାରୀ କମିଟି ବୈଠକରେ ଖାର୍ଗେ ମତ ଦେଇଛନ୍ତି। ଇଭିଏମ୍‌ ଯୋଗୁ ନିର୍ବାଚନ ପ୍ରକ୍ରିୟା ଉପରେ ସନ୍ଦେହ ସୃଷ୍ଟି ହୋଇଥିବା ସେ ବିଶ୍ୱାସ କରନ୍ତି। ମୁକ୍ତ ଏବଂ ସ୍ବଚ୍ଛ ନିର୍ବାଚନ ସୁନିଶ୍ଚିତ କରିବା ନିର୍ବାଚନ କମିଶନଙ୍କ ସାମ୍ବିଧାନିକ ଦାୟିତ୍ୱ। ଦଳରେ ଆଭ୍ୟନ୍ତରୀଣ କନ୍ଦଳକୁ ଖାର୍ଗେ ସମାଲୋଚନା କରିଛନ୍ତି।
ଦଳ ଭିତରେ ଏକତାର ଅଭାବ ଏବଂ ନିଜ ନେତାଙ୍କ ବିରୋଧରେ ମନ୍ତବ୍ୟ କଂଗ୍ରେସକୁ କ୍ଷତି ପହଞ୍ଚାଇଥିବା ଖାର୍ଗେ କହିଛନ୍ତି। ଦଳୀୟ ନେତାମାନଙ୍କୁ ଏକାଠି ରହିବା ସହ ପରସ୍ପର ବିରୋଧରେ ସର୍ବସାଧାରଣରେ କିଛି ନ କହିବା ପାଇଁ ସେ ନିବେଦନ କରିଛନ୍ତି। ଆମେ ଯଦି ନିର୍ବାଚନରେ ଏକାଠି ନ ରହିବା ଏବଂ ପରସ୍ପର ବିରୋଧରେ ମନ୍ତବ୍ୟ ଦେବା, ତେବେ ବିରୋଧୀଙ୍କୁ କିପରି ପରାଜିତ କରିବାରେ ସମର୍ଥ ହେବା ବୋଲି ସେ ପ୍ରଶ୍ନ କରିଛନ୍ତି। ସେହିପରି ଜାତୀୟ ପ୍ରସଙ୍ଗକୁ ନେଇ ରାଜ୍ୟ ନିର୍ବାଚନ ଲଢ଼ାଯିବା ଉଚିତ ନୁହେଁ ବୋଲି ଖାର୍ଗେ କହିଛନ୍ତି। ଦଳୀୟ ଶୃଙ୍ଖଳାକୁ କଡ଼ାକଡ଼ି ପାଳନ କରିବା ଗୁରୁତ୍ୱପୂର୍ଣ୍ଣ। ଆମକୁ ସବୁ ପ୍ରକାର ସ୍ଥିତିରେ ଏକ ହୋଇ ରହିବାକୁ ପଡ଼ିବ। ଦଳର ବିଜୟ ଆମର ବିଜୟ ଏବଂ ଦଳର ପରାଜୟ ଆମର ପରାଜୟ ବୋଲି ପ୍ରତ୍ୟେକ ଚିନ୍ତା କରିବା ଆବଶ୍ୟକ ବୋଲି ଖାର୍ଗେ କହିଛନ୍ତି।

The post କଠୋର ହୁଅନ୍ତୁ ଖାର୍ଗେ, ଉପଦେଶ ଦେଲେ ରାହୁଲ appeared first on Dharitri Odia News.