କଣ୍ଟେନର ବୋଝେଇ ଜାହାଜରେ ବଡ଼ ବିସ୍ଫୋରଣ: ଉପକୂଳବର୍ତ୍ତୀ ଲୋକଙ୍କୁ ସତର୍କ କରାଇଲା ପ୍ରଶାସନ

ନୂଆଦିଲ୍ଲୀ: କେରଳ ଉପକୂଳରେ ଥିବା ସିଙ୍ଗାପୁର କଣ୍ଟେନର ଜାହାଜରେ ବିସ୍ଫୋରଣ। ଏଥିରେ ଥିବା ୪ ଜଣ କ୍ରିୟୁ ମେମ୍ବର ନିଖୋଜ ଅଛନ୍ତି। ୨୨ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ମୁମ୍ବାଇ ସ୍ଥିତ ମେରାଇନ୍ ଅପରେସନ୍ସ ସେଣ୍ଟର (MOC) ପକ୍ଷରୁ ସକାଳ ପ୍ରାୟ ୧୦.୩୦ ସମୟରେ କୋଚିସ୍ଥିତ ଏହାର ପ୍ରତିପକ୍ଷ କେନ୍ଦ୍ରକୁ ଏହି ସୂଚନା ଦିଆଯାଇଛି। 

ସୂଚନା ଅନୁଯାୟୀ, MV Wan Hai 503 ଜାହାଜର ତଳ ଡେକରେ ବିସ୍ଫୋରଣ ହୋଇଥିଲା। ଜାହାଜଟି ୨୭୦ ମିଟର ଲମ୍ବା ଏବଂ ଏହାର ଡ୍ରାଫ୍ଟ ୧୨.୫ ମିଟର ବୋଲି କୁହାଯାଉଛି। ଜାହାଜଟି ୭ ଜୁନରେ କଲମ୍ବୋରୁ ବାହାରିଥିଲା ଏବଂ ୧୦ ଜୁନରେ ମୁମ୍ବାଇ ପହଞ୍ଚିବା ଆଶା କରାଯାଉଥିଲା। ଘଟଣା ସମୟରେ ଜାହାଜଟି କେରଳ ଉପକୂଳ ନିକଟରେ ସମୁଦ୍ରରେ ଥିଲା। ଏପର୍ଯ୍ୟନ୍ତ କୌଣସି କ୍ଷତିର ରିପୋର୍ଟ ନାହିଁ, କିନ୍ତୁ ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ସତର୍କତା ବୃଦ୍ଧି କରାଯାଇଛି।

ପ୍ରତିରକ୍ଷା PROଙ୍କ ଅନୁଯାୟୀ, ପରିସ୍ଥିତିର ଗମ୍ଭୀରତାକୁ ଅନୁଭବ କରି, ଭାରତୀୟ ନୌସେନା ତୁରନ୍ତ ପଦକ୍ଷେପ ନେଇଥିଲା ଏବଂ କୋଚିରେ ଅବସ୍ଥିତ INS ସୁରଟକୁ ଘଟଣାସ୍ଥଳ ଆଡକୁ ବୁଲାଇ ଦିଆଯାଇଥିଲା। ଯାହାଦ୍ୱାରା ଜାହାଜକୁ ତୁରନ୍ତ ସହାୟତା ମିଳିପାରିବ। ପଶ୍ଚିମ ନୌସେନା କମାଣ୍ଡ ସକାଳ ୧୧ଟାରେ ଏହି ନିଷ୍ପତ୍ତି ନେଇଥିଲା।

ଏହା ସହିତ, ନୌସେନା କୋଚିର INS ଗରୁଡ଼ ନୌସେନା ବାୟୁସେନା ଷ୍ଟେସନରୁ ଏକ ଡୋର୍ନିୟର ବିମାନ ଉଡ଼ାଣ କରିବାକୁ ମଧ୍ୟ ଯୋଜନା କରୁଛି, ଯାହା ଘଟଣାସ୍ଥଳରେ ପହଞ୍ଚି ପରିସ୍ଥିତି ମୂଲ୍ୟାଙ୍କନ କରିବ। ଭାରତୀୟ ନୌସେନା ଏବଂ ସାମୁଦ୍ରିକ ସଂସ୍ଥାଗୁଡ଼ିକ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି। ଉଦ୍ଧାର ଏବଂ ରିଲିଫ କାର୍ଯ୍ୟ ପାଇଁ ପ୍ରୟାସ ଜାରି ରହିଛି।

ଆବଶ୍ୟକ ପ୍ରସ୍ତୁତି କରିବାକୁ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (KSDMA) ଏବଂ କୋଝିକୋଡର ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି କେରଳର ମୁଖ୍ୟମନ୍ତ୍ରୀ। ଯଦି ଜାହାଜର କ୍ରିୟୁ ସଦସ୍ୟମାନଙ୍କୁ କେରଳର ଉପକୂଳକୁ ଅଣାଯାଏ, ତେବେ ସେମାନଙ୍କୁ ତୁରନ୍ତ ଚିକିତ୍ସା ସୁବିଧା ଯୋଗାଇ ଦିଆଯାଇପାରିବ ତାହା ସ୍ପଷ୍ଟ କରିଛନ୍ତି ମୁଖ୍ୟମନ୍ତ୍ରୀ। KSDMA ସ୍ଥାନୀୟ ହସ୍ପିଟାଲ ଏବଂ ଜରୁରୀକାଳୀନ ସେବାକୁ ସତର୍କ କରାଇଛି। ଉପକୂଳବର୍ତ୍ତୀ ଅଞ୍ଚଳରେ ରହୁଥିବା ଲୋକମାନଙ୍କୁ ମଧ୍ୟ ସତର୍କ ରହିବାକୁ ପରାମର୍ଶ ଦିଆଯାଇଛି।