କାହିଁକି ଅଧିକ ବର୍ଷ ବଞ୍ଚନ୍ତି ଏହି ଲୋକେ

କିଛି ଗବେଷଣାରୁ ଜଣାପଡ଼ିଛି ଯେ,ଜାପାନର ଲୋକେ ଦୀର୍ଘ ବର୍ଷ ବଞ୍ଚନ୍ତି।ସେମାନଙ୍କ ଦୀର୍ଘାୟୁ ହେବା ପଛରକାରଣ କ’ଣ ଜାଣନ୍ତୁ ସେ ସମ୍ପର୍କରେ…
ଜାପାନର ଲୋକଙ୍କୁ ଦେଖି ସେମାନଙ୍କ ବୟସ ଅନୁମାନ କରିବା ସହଜ ନୁହେଁ। କାରଣ ଏଠାକାର ଅନେକ ବୟସ୍କ ଲୋକ ବହୁତ ୟଙ୍ଗ୍‌ ଓ ଫିଟ୍‌ ଦେଖାଯାଆନ୍ତି। ଆଉ ଏହାପଛର କାରଣ ହେଉଛି ସେମାନଙ୍କ ଲାଇଫ୍‌ ଷ୍ଟାଇଲ୍‌ ଓ ଫିଟ୍‌ନେସ୍‌ ସିକ୍ରେଟ୍‌। କିଛି ଗବେଷଣା କହେ ଏଠାକାର ପ୍ରାୟ ୫୦,୦୦୦ରୁ ଊର୍ଦ୍ଧ୍ୱ ଲୋକ ଏମିତି ଅଛନ୍ତି, ଯାହାଙ୍କ ବୟସ ୧୦୦ ବର୍ଷରୁ ଊର୍ଦ୍ଧ୍ୱ। ସାଧାରଣତଃ ଭାରତ ଓ ଅନ୍ୟ ଦେଶରେ ଲୋକଙ୍କ ହାରାହାରି ବୟସ ୬୦-୭୦ ବର୍ଷ ହୋଇଥାଏ। କିନ୍ତୁ ଜାପାନ ଲୋକ ଅଧିକ ବର୍ଷ ଜିଅନ୍ତି। ଏହା ପଛର କାରଣସବୁ ହେଉଛି…
ଡାଏଟ୍‌ ଉପରେ ଫୋକସ୍‌: ପାରମ୍ପରିକ ଜାପାନୀ ମିଲ୍ସରେ ତାଜା ଫଳ, ପନିପରିବା, ଲିନ୍‌ ପ୍ରୋଟିନ୍‌ ଓ ଶସ୍ୟ ଆଦିର ସନ୍ତୁଳନ ଥାଏ। ସେମାନେ ପ୍ରୋସେସ୍‌ଡ ଫୁଡ, ଟ୍ରାନ୍ସ ଫ୍ୟାଟ୍‌ ଓ ଚିନିର ବ୍ୟବହାର ବହୁତ କମ୍‌ କରନ୍ତି। ଆଉ ପୋଷକ ତତ୍ତ୍ୱରେ ଭରପୂର ଖାଦ୍ୟ ଅଧିକ ଖାଆନ୍ତି। ହେଲେ କାର୍ବୋହାଇଡ୍ରେଟ୍‌ସଯୁକ୍ତ ଖାଦ୍ୟ କମ୍‌ ଖାଆନ୍ତି।
ସି’ଫୁଡ୍‌ ବ୍ୟବହାର: ଜାପାନୀମାନେ ଯେମିତି ବି ହେଉ ସି’ ଫୁଡ୍‌କୁ ନିଜ ଡାଏଟ୍‌ରେ ସାମିଲ କରନ୍ତି। କାରଣ ସି’ଫୁଡ୍‌ରେ ଓମେଗା ୩, ଫ୍ୟାଟି ଏସିଡ୍‌ ସହ ଆହୁରି ଅନେକ ପୋଷକ ତତ୍ତ୍ୱ ଭରପୂର ଥାଏ। ଯାହା ଶରୀରକୁ ଅନ୍ୟ ମାଂସ ତୁଳନାରେ ୧୦ ଗୁଣ ଅଧିକ ଶକ୍ତି ପ୍ରଦାନ କରିଥାଏ। ତେଣୁ କୁହାଯାଏ ସି’ ଫୁଡ ଖାଇଲେ ଲୋକେ ୟଙ୍ଗ୍‌ ରୁହନ୍ତି।
ଗ୍ରୀନ ଟି: ଜାପାନ ଲୋକଙ୍କୁ ଚା’ ପିଇବା ବହୁତ ପସନ୍ଦ। ଏଠାରେ ୧୦୦ରୁ ଊର୍ଦ୍ଧ୍ୱ ପ୍ରକାରର ଚା’ ମିଳିଥାଏ। ହେଲେ ଏଠାକାର ଲୋକେ ଗ୍ରୀନ ଟି’ ପିଇବାକୁ ଅଧିକ ପସନ୍ଦ କରନ୍ତି। ଏହାବାଦ୍‌ ମାଚା ଗ୍ରୀନ ଟି’ର ବି ବହୁତ ବ୍ୟବହାର ହୁଏ। ଯେଉଁଥିରେ ପଲିଫେନାଲ୍ସ ଅଧିକ ମାତ୍ରାରେ ଥାଏ। ଏହା ଓଜନ କମାଇବାରେ ସାହାଯ୍ୟ କରେ। ତା’ସହ ଏହା ଶରୀରରୁ ଟକ୍ସିନ୍‌ ସଫା କରେ। ପେଟ ଓ ଲିଭର୍‌ର କାମକୁ ସହଜ କରେ। ଏହାବାଦ୍‌ ଏଠାକାର ଲୋକେ ଚା’ରେ କ୍ଷୀର ଓ ଚିନିର ବ୍ୟବହାର କରନ୍ତି ନାହିଁ। ତେଣୁ ତାଙ୍କ ଚା’ ହେଲ୍‌ଦି ହୋଇଥାଏ ଓ ସେମାନଙ୍କ ରୋଗପ୍ରତିରୋଧକ ଶକ୍ତି ବଢାଏ।
ଚାଲିବା ପସନ୍ଦ: ଜାପାନର ଲୋକେ ଗାଡ଼ି ଚଳାଇ ଯିବା ଅପେକ୍ଷା ନିକଟସ୍ଥ ସ୍ଥାନକୁ ଚାଲିକି ଯିବାକୁ ପସନ୍ଦ କରନ୍ତି। ସ୍କୁଲ, କଲେଜ, ଅଫିସ, ଲାଇବ୍ରେରୀ, ପାର୍କ, ଜିମ୍‌ ଆଦି ସ୍ଥାନକୁ ଯିବା ପାଇଁ ସାଇକେଲ ବ୍ୟବହାର କରନ୍ତି ଅବା ଚାଲିକି ଯାଆନ୍ତି। ଯାହାଦ୍ୱାରା ବ୍ୟାୟାମ ହୋଇଯାଏ, ଖାଦ୍ୟ ଆରାମରେ ହଜମ ହୁଏ ଏବଂ ଓଜନ ନିୟନ୍ତ୍ରଣରେ ରହେ।
ମିଠା ଖାଆନ୍ତି ନାହିଁ: ଜାପାନ ଲୋକ ଅଧିକ ବୟସ ବଞ୍ଚତ୍ବାର ମୁଖ୍ୟ କାରଣ ହେଉଛି ସେମାନେ ମିଠା ଆଦୌ ଖାଆନ୍ତି ନାହିଁ। ଫଳରେ ମେଦବହୁଳତା, ହୃଦ୍‌ରୋଗ ଭଳି ରୋଗ ହୁଏ ନାହିଁ।
ଫରେଷ୍ଟ ବାଥିଂ: ଜାପାନର ଲୋକେ ଫରେଷ୍ଟ ବାଥିଂ ଉପରେ ବହୁତ ବିଶ୍ୱାସ ରଖନ୍ତି। ଅର୍ଥାତ୍‌ ଜଙ୍ଗଲରେ ସମୟ ବିତାଇବା। ଜଙ୍ଗଲରେ ବୁଲିବା, ଚାଲିବା, ପ୍ରାକୃତିକ ଜିନିଷକୁ ଉପଭୋଗ କରିବା ଓ ତା’ର ଆନନ୍ଦ ନେବା ପ୍ରକୃତରେ ନେଚର ଥେରାପି ଅଟେ।
ଜାପାନକୁ ସୂର୍ଯ୍ୟ ଉଦୟର ଦେଶ ବୋଲି କୁହାଯାଏ। ଆଉ ଏଠି ଶୀଘ୍ର ଉଠିବା ଏକ ପ୍ରଥା। ଏଠାକାର ଅଧିକାଂଶ ଲୋକ ନିଜ ଦିନର ଆରମ୍ଭ ସୂର୍ଯ୍ୟୋଦୟ ଦେଖିବାରୁ ଆରମ୍ଭ କରନ୍ତି, ଯାହାକି ସେମାନଙ୍କୁ ଚାପମୁକ୍ତ ଜୀବନ ଜିଇବାରେ ସାହାଯ୍ୟ କରିଥାଏ।
ଛୋଟ ପ୍ଲେଟ୍‌ର ବ୍ୟବହାର: ଏଠାରେ ଖାଦ୍ୟ ଖାଇବା ଲାଗି ଛୋଟ ପ୍ଲେଟ୍‌ର ବ୍ୟବହାର କରାଯାଏ, ଯାହାକି ପ୍ରାୟ ଚାରିରୁ ଛଅ ଇଞ୍ଚ୍‌ ଆକାରର ହୋଇଥାଏ। ଏହା ମାଧ୍ୟମରେ ଜାପାନୀମାନେ ନିଜ ଖାଦ୍ୟର ମାତ୍ରାକୁ ସୀମିତ କରନ୍ତି। ଅର୍ଥାତ୍‌ ତାଙ୍କର ଚିନ୍ତାଧାରା ହେଉଛି କମ୍‌ ଖାଅ ଓ ଲମ୍ବା ସମୟ ପର୍ଯ୍ୟନ୍ତ ଜିଅ।

The post କାହିଁକି ଅଧିକ ବର୍ଷ ବଞ୍ଚନ୍ତି ଏହି ଲୋକେ appeared first on Dharitri Odia News.