ଖୁସି ଖବର: କୁନୋ ଜାତୀୟ ଉଦ୍ୟାନରେ ୫ ଶାବକଙ୍କୁ ଜନ୍ମ ଦେଲା ଚିତା ଗାମିନୀ

କୁନୋ,୧୦।୩: କୁନୋ ଜାତୀୟ ଉଦ୍ୟାନରୁ ଏକ ଖୁସି ଖବର ଆସିଛି। ଏଠାରେ ମହିଳା ଚିତା ଗାମିନୀ ୫ ଛୁଆ ଜନ୍ମ ଦେଇଛି। କେନ୍ଦ୍ର ପରିବେଶ ମନ୍ତ୍ରୀ ଭୁପେନ୍ଦ୍ର ଯାଦବ ଏହି ସୂଚନା ଦେଇଛନ୍ତି ଏବଂ ଛୁଆମାନଙ୍କ ଫଟୋ ସୋସିଆଲ ମିଡିଆରେ ମଧ୍ୟ ଶେୟାର କରିଛନ୍ତି। ଏହି ଫଟୋରେ, ଜଣେ ମହିଳା ଚିତା ତା’ର ଛୁଆମାନଙ୍କୁ ଗେହ୍ଲା କରୁଥିବା ଦେଖାଯାଉଛି।

ଭୁପେନ୍ଦ୍ର ଯାଦବ ତାଙ୍କ ପୋଷ୍ଟରେ କହିଛନ୍ତି ଯେ ୫ବର୍ଷୀୟା ମହିଳା ଚିତା ଗାମିନୀ ୫ଛୁଆ ଜନ୍ମ ଦେଇଛି। ଏହା ସହିତ ଭାରତରେ ଜନ୍ମ ହୋଇଥିବା ଚିତା ଛୁଆ ସଂଖ୍ୟା ୧୩କୁ ବୃଦ୍ଧି ପାଇଛି। ଦେଶର ମାଟିରେ ଆଣିଥିବା ଚିତାଙ୍କର ଏହା ହେଉଛି ଚତୁର୍ଥ ପରିବାର ଏବଂ ଦକ୍ଷିଣ ଆଫ୍ରିକାରୁ ଆସିଥିବା ଏହା ପ୍ରଥମ ପରିବାର।
ବନ ମନ୍ତ୍ରୀ କହିଛନ୍ତି ଯେ କୁନୋ ଜାତୀୟ ଉଦ୍ୟାନରେ ଛୁଆ ସମେତ ମୋଟ ଚିତାବାଘ ସଂଖ୍ୟା ୨୬ରେ ପହଞ୍ଚିଛି। ଚିତାବାଘ ପାଇଁ ଉପଯୁକ୍ତ ପରିବେଶ ସୁନିଶ୍ଚିତ କରିଥିବାରୁ ସେ ଜଙ୍ଗଲ ଅଧିକାରୀ, ପ୍ରାଣୀ ଚିକିତ୍ସକ ଏବଂ କ୍ଷେତ୍ର କର୍ମଚାରୀଙ୍କ ଦଳକୁ ଅଭିନନ୍ଦନ ଜଣାଇଛନ୍ତି।
ସୂଚନାଯୋଗ୍ୟ, ଦୁଇଟି ପର୍ଯ୍ୟାୟରେ ଦକ୍ଷିଣ ଆଫ୍ରିକା ଏବଂ ନାମିବିଆରୁ କୁନୋକୁ ସମୁଦାୟ ୨୦ଟି ଚିତାବାଘ ଅଣାଯାଇଥିଲା, ସେଥିମଧ୍ୟରୁ ୭ଜଣଙ୍କର ମୃତ୍ୟୁ ଘଟିଛି। ବର୍ତ୍ତମାନ କୁନୋରେ ଛୁଆ ସଂଖ୍ୟା ୧୩ କୁ ବୃଦ୍ଧି ପାଇଛି, ଯାହାକି ୧୭ସେପ୍ଟେମ୍ବର ୨୦୨୨ରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ଆରମ୍ଭ ହୋଇଥିବା ଚିତା ପ୍ରକଳ୍ପ ପାଇଁ ଏକ ବଡ଼ ସଫଳତା। ବର୍ତ୍ତମାନ କୁନୋ ଜାତୀୟ ଉଦ୍ୟାନରେ ୧୩ ବୟସ୍କ ଏବଂ ୧୩ ଛୁଆ ଉପସ୍ଥିତ ଅଛନ୍ତି। ଏହାର ଅର୍ଥ ବର୍ତ୍ତମାନ ସମୁଦାୟ ୨୬ ଟି ଚିତାବାଘ ଅଛି ।

The post ଖୁସି ଖବର: କୁନୋ ଜାତୀୟ ଉଦ୍ୟାନରେ ୫ ଶାବକଙ୍କୁ ଜନ୍ମ ଦେଲା ଚିତା ଗାମିନୀ appeared first on Dharitri Odia News.