ଗତ ଦୁଇ ବର୍ଷରେ ସ୍ପେସ୍ ଷ୍ଟାର୍ଟଅପ୍ ସଂଖ୍ୟା ୨୦୦ ଗୁଣା ବଢିଛି, ୨୦୨୩ରେ ୧,୦୦୦ କୋଟିର ନିବେଶ

ନୂଆଦିଲ୍ଲୀ: ଭାରତରେ ଗତ ଦୁଇ ବର୍ଷରେ ସ୍ପେସ୍ ସେକ୍ଟର ସହ ଜଡ଼ିତ ଷ୍ଟାର୍ଟଅପ୍ ସଂଖ୍ୟା ୨୦୦ ଗୁଣା ବଢିଛି । ଏହି ବୃଦ୍ଧି ପଛର କାରଣ ମଧ୍ୟରୁ ଗୋଟିଏ ହେଉଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ସ୍ପେସ୍ ସେକ୍ଟରକୁ ଘରୋଇ କମ୍ପାନିଙ୍କ ପାଇଁ ଖୋଲାଯିବା । କେନ୍ଦ୍ରୀୟ ବିଜ୍ଞାନ ଏବଂ ପ୍ରଯୁକ୍ତି ଏବଂ ପୃଥିବୀ ବିଜ୍ଞାନ ରାଷ୍ଟ୍ରମନ୍ତ୍ରୀ (ସ୍ୱାଧୀନ), ଜିତେନ୍ଦ୍ର ସିଂଙ୍କ ପକ୍ଷରୁ ଏହି ସୂଚନା ଦିଆଯାଇଛି ।

କେନ୍ଦ୍ରମନ୍ତ୍ରୀ କହିଛନ୍ତି ଯେ ସରକାରଙ୍କ ଦ୍ୱାରା ସ୍ପେସ୍ ସେକ୍ଟରରେ ବ୍ୟାପକ ସ୍ତରରେ ଘରୋଇ ଏବଂ ସରକାରୀ କମ୍ପାନିଙ୍କୁ ସୁଯୋଗ ଦେଇଛନ୍ତି । ଏହି କାରଣରୁ ଗ୍ଲୋବାଲ୍ ସ୍ପେସ୍ ଇକୋନମି (Global Space Economy)ରେ ୨୦୨୧ ତୁଳନାରେ ୨୦୩୦ର ଭାଗିଦାରୀ ଚାରି ଗୁଣା ହୋଇଯିବ ।

ସ୍ପେସ୍ ଡିପାର୍ଟମେଣ୍ଟର ୧୦୦ ଦିନର ଆକ୍ସନ ପ୍ଲାନ୍ ଉପରେ ଉଚ୍ଚ ସ୍ତରୀୟ ବୈଠକରେ କେନ୍ଦ୍ରମନ୍ତ୍ରୀ ଭାରତର ସ୍ପେସ୍ ସେକ୍ଟରର ବର୍ତ୍ତମାନର ସ୍ଥିତି, ସୁଯୋଗ ଏବଂ ଭବିଷ୍ୟତର ସ୍ପେସ୍ ମିଶନର ସମୀକ୍ଷା କରିଛି । ଏହି ବୈଠକରେ ଇସ୍ରୋ ଅଧ୍ୟକ୍ଷ ଏସ୍ ସୋମନାଥଙ୍କ ସମେତ ରାଷ୍ଟ୍ରୀୟ ସ୍ପେସ୍ ଏଜେନ୍ସିର ଉଚ୍ଚ ପଦସ୍ଥ ଅଧିକାରୀ ମଧ୍ୟ ଉପସ୍ଥିତ ଥିଲେ ।

କେନ୍ଦ୍ରମନ୍ତ୍ରୀ କହିଛନ୍ତି ଯେ ୨୦୨୨ରେ ଦେଶର ସ୍ପେସ୍ ଷ୍ଟାର୍ଟଅପଙ୍କ ସଂଖ୍ୟା ଏକ ଥିଲା, ଯାହା ୨୦୨୪ରେ ବଢି ୨୦୦ରେ ପହଞ୍ଚିଛି । ୨୦୨୩ରେ ଭାରତର ସ୍ପେସ୍ ସେକ୍ଟରରେ ପ୍ରାୟ ୧ ହଜାର କୋଟି ଟଙ୍କାର ନିବେଶ ହୋଇଛି । ସେ କହିଛନ୍ତି ଯେ ସ୍ପେସ୍ ସେକ୍ଟର ପ୍ରାୟ ୪୫୦ ଏମ୍‌ଏସଏମ୍‌ଇ ସହ ମିଶି କାମ କରୁଛନ୍ତି, ଯାହା ପ୍ରଧାନମନ୍ତ୍ରୀଙ୍କ ଅମୃତକାଳର ଭିଜନ ସବକା ପ୍ରୟାସକୁ ସ୍ପଷ୍ଟ କରୁଛି । 

ଏହା ବ୍ୟତୀତ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ କହିଛନ୍ତି ଯେ ଗ୍ଲୋବାଲ ସ୍ପେସ୍ ଇକୋନମିରେ ଭାରତର ଯୋଗଦାନ ୨୦୨୧ରେ ୨ ପ୍ରତିଶତ ଥିଲା, ଯାହା ୨୦୩୦ ସୁଦ୍ଧା ୮ ପ୍ରତିଶତ ହେବାର ଅନୁମାନ ରହିଛି । ସେହିପରି ୨୦୪୭ ସୁଦ୍ଧା ଏହା ବଢି ୧୫ ପ୍ରତିଶତ ହୋଇଯିବ ।