ଚାଷଜମି ଦେଇ ବାଲିଚାଲାଣ

ଜଳେଶ୍ୱର, ୩୧ା୩(ରବିନାରାୟଣ ପାତ୍ର)ବାଲେଶ୍ୱର ଜିଲା ଜଳେଶ୍ୱର ତହସିଲ ଅନ୍ତର୍ଗତ ସୁବର୍ଣ୍ଣରେଖା ନଦୀର ବାଲି ସଇରାତଗୁଡିକୁ ଖଣିବିଭାଗ ଅଦ୍ୟାବଧି ନିଲାମ ଦେଇ ନ ଥିବାରୁ ବିଭିନ୍ନ ସ୍ଥାନରୁ ପ୍ରତିଦିନ ରାତିରେ ଶହ ଶହ ଟ୍ରାକ୍ଟର ବାଲି ଚୋରା ଚାଲାଣ ହେଉଛି। ଏଥିରେ ବାଲିମାଫିଆ ଟ୍ରାକ୍ଟର ମାଲିକ ଲକ୍ଷ ଲକ୍ଷ ଟଙ୍କା ରୋଜଗାର କରୁଥିବା ବେଳେ ସରକାରଙ୍କ ବ୍ୟାପକ ରାଜସ୍ବ କ୍ଷତି ଘଟୁଛି ା
ଅନ୍ୟପକ୍ଷରେ ଟ୍ରାକ୍ଟର ମାଲିକମାନେ ବାଲି ବୋଝେଇ ଟ୍ରାକ୍ଟର ଚାଷ ଜମି ଉପରେ ଜବରଦସ୍ତ ଚଳାଚଳ କରୁଛନ୍ତି। ଏହାକୁ ବିରୋଧ କରିବାରୁ ଜଣେ ଚାଷୀଙ୍କୁ ବାଲି ମାଫିଆମାନେ ଧମକ ଚମକ ଦେବା ସହ ଜୀବନରୁ ମାରିଦେବେ ବୋଲି କହିଛନ୍ତି ା ଚାଷୀ ଜଣକ ଜଳେଶ୍ୱର ଥାନାରେ ଲିଖିତ ଅଭିଯୋଗ କରିଛନ୍ତି।
ବିଭାଗର ଉଦାସୀନତା ଯୋଗୁ ବାଲି ଖାଦାନଗୁଡିକ ନିଲାମ ହୋଇପାରୁନାହିଁ। ବାଲିର ଆବଶ୍ୟକତା ଥିବାରୁ ଚୋରାଚାଲାଣକାରୀମାନେ ଆଦୌ ରାଜସ୍ବ ନ ଦେଇ ଟ୍ରାକ୍ଟର ପିଛା ୩ହଜାର ଟଙ୍କା ଲୁଟୁଛନ୍ତି ା ରାୟାଁରାମଚନ୍ଦ୍ରପୁର ଗାଁର ଏକତାଳି ଗାଁରେ ଏପରି ଏକ ଅଭାବନୀୟ ଘଟଣା ଘଟିଛି ା ଚୋରାଚାଲାଣକାରୀମାନେ ଜବରଦସ୍ତ ଚାଷଜମି ଉପରେ ବାଲି ବୋଝେଇ ଟ୍ରାକ୍ଟର ଚଳାଚଳ କରୁଛନ୍ତି। ମନ୍ମଥ ଦାସଙ୍କ ପୁଅ ଜଗବନ୍ଧୁ ଦାସ ଚୋରା ବାଲି ବୋଝେଇ ଟ୍ରାକ୍ଟରକୁ ତାଙ୍କ ଜମି ଉପରେ ଯିବା ଲାଗି ନ ଦେଇ ବାଡ କରିଥିବାରୁ ତାଙ୍କୁ ବିଭିନ୍ନ ଧମକ ଦିଆଯାଇଛି ା ଗାଁର ବିଜୟ ପାଳ, ଯୋଗେନ୍ଦ୍ର ପାଳ, ଶିବ ପାଳ, ସପନ ପାଳ, ଟେରା ଜେନା, କୁନା ସାହୁ, ରମାକାନ୍ତ ଦାସ, ଶଙ୍କର ସାହୁ, ପ୍ରଦୀପ ସାହୁ, ଅକ୍ଷୟ ସାହୁ, ଟୁଲୁ ଗିରି, ବାପି ଗିରି, ତପନ ବାରିକ, ଲକ୍ଷ୍ମୀଚରଣ ଜେନା, ନରହରି ପାଳ, ମାନସ ଜେନା, ଧଙ୍କିଆ ଜେନା ଓ ଲେଢା ଜେନା ପ୍ରମୁଖ ଜଗବନ୍ଧୁଙ୍କୁ ସଂଘବଦ୍ଧ ଭାବେ ଆକ୍ରମଣ କରିଥିଲେ। ଜଗବନ୍ଧୁଙ୍କ ପରିବାର ଲୋକେ ଏ ସମ୍ପର୍କରେ ଜଳେଶ୍ୱର ଥାନାରେ ଲିଖିତ ଅଭିଯୋଗ କରିଛନ୍ତି ା ସେହିପରି ଗୋପାଳପୁର, ମାକିଡିଆ, ବେହେରାସାହି, କୁଅଁରପୁର, ଦକ୍ଷିଣପ୍ରହରାଜପୁର, ଶ୍ରୀରାମପୁର, ଗୋବରଘଟା, ଶିଖରପୁର, ଭାନୁପୁର, ମହମ୍ମଦନଗରପାଟଣା, ସେକସରାଇ, ଜମାଳପୁର, କୋଟସାହି, କଣ୍ଟାପାଳ, ରେଳା ଓ ପଶ୍ଚିମବାର୍ଡ ଗଁା ନିକଟରୁ ବ୍ୟାପକ ବାଲି ଉତ୍ତୋଳନ ହେଉଥିବା ଜଣାଯାଇଛି ା

The post ଚାଷଜମି ଦେଇ ବାଲିଚାଲାଣ appeared first on Dharitri Odia News.