ଜମାକାରୀଙ୍କ ଆକାଉଣ୍ଟରୁ କୋଟିଏରୁ ଊର୍ଦ୍ଧ୍ୱ ଉଠାଇନେଲେ

ଆଳି,୫ା୨(ବନମାଳୀ ସେନାପତି):ଲକ୍ଷେ ନୁହେଁ କି ଦୁଇ ଲକ୍ଷ ନୁହେଁ ପାଖାପାଖି କୋଟିଏରୁ ଊର୍ଦ୍ଧ୍ୱ ଟଙ୍କା ଜମାକାରୀଙ୍କ ଅଜାଣତରେ ସେମାନଙ୍କ ବ୍ୟାଙ୍କ ଖାତାରୁ ଠକି ନେଇଛନ୍ତି ବ୍ୟାଙ୍କ କର୍ମଚାରୀ। ଖାତାଧାରୀଙ୍କ ବିନା ଉପସ୍ଥିତିରେ କିପରି ସେମାନଙ୍କ ଆକାଉଣ୍ଟରୁ ଟଙ୍କା ଉଠିଲା ତାହାକୁ ନେଇ ଗ୍ରାହକମାନେ ଚିନ୍ତାରେ ପଡ଼ିଛି। ଠକେଇର ଶିକାର ହୋଇଥିବା ଗ୍ରାହକଙ୍କ ସଂଖ୍ୟା ବଢ଼ିବାରେ ଲାଗିଛି।
ସୂଚନା ଅନୁଯାୟୀ, କେନ୍ଦ୍ରାପଡ଼ା ଜିଲା ଆଳି ସିଙ୍ଗିରି ବଜାରଠାରେ ଇଣ୍ଡିଆନ ବ୍ୟାଙ୍କର ଶାଖା ରହିଛି। ଗ୍ରାହକମାନେ ସେଠାରେ ନିଜର କଷ୍ଟ ଉପାର୍ଜିତ ଧନ ସଞ୍ଚୟ କରିଥିବା ବେଳେ ବ୍ୟାଙ୍କର ପିଅନଙ୍କ ସମେତ ଅନ୍ୟ କର୍ମଚାରୀମାନେ ଜଣକ ପରେ ଜଣେ ଗ୍ରାହକଙ୍କ ଆକାଉଣ୍ଟକୁ କୌଶଳକ୍ରମେ ଖାଲି କରି ଚାଲିଥିଲେ। ଆଳି ଥାନା ଆନ୍ତର୍ଗତ ବନ୍ଧସାହି ବିଲିକଣା ଗଁାର ସୁରେନ୍ଦ୍ର କୁମାର ନାୟକ ବିଦେଶରେ ରହୁଥିବା ବେଳେ ଇଣ୍ଡିଆନ ବ୍ୟାଙ୍କରେ ତାଙ୍କର ୨ଟି ଆକାଉଣ୍ଟ ରହିଛି। ସେ ଗତ କିଛିଦିନ ପୂର୍ବେ ଜଣେ ବ୍ୟକ୍ତିଙ୍କୁ ବ୍ୟାଙ୍କରୁ ୧ ଲକ୍ଷ ଟଙ୍କା ଆଣିବାକୁ ଚେକ୍‌ ଦେଇ ପଠାଇ ଥିଲେ। କିନ୍ତୁ ବ୍ୟାଙ୍କ ଟଙ୍କା ଦେଉ ନ ଥିଲା। ବାଧ୍ୟ ହୋଇ ସେ ତାଙ୍କ ପୁତୁରାଙ୍କୁ ପଠାଇବା ପରେ ତାଙ୍କ ଆକାଉଣ୍ଟରେ ଟଙ୍କା ନ ଥିବା ଜାଣିବାକୁ ପାଇଥିଲେ। ଏ ନେଇ ସେ ଖବର ପାଇବା ପରେ ବ୍ୟାଙ୍କ ଯାଇ ତାଙ୍କ ନଂ.୨୧୮୬୪୨୫୯୧୩୭ ଓ ନଂ. ୨୧୮୬୪୨୦୦୦୬୮ ଦୁଇଟି ଆକାଉଣ୍ଟ ଚେକ୍‌ କରିବା ସହିତ ସ୍ତ୍ରୀ ସରସ୍ବତୀ ନାୟକଙ୍କ ଆକାଉଣ୍ଟ ନଂ. ୨୧୮୬୪୨୦୬୧୨୮, ଦୁଇ ପୁଅ ଶୁଭମ ନାୟକଙ୍କ ନଂ. ୫୦୩୪୨୭୮୨୭୫୭ ଓ ସତ୍ୟମ ନାୟକ ନଂ. ୫୦୪୦୨୧୨୧୦୭୪ ଆକାଉଣ୍ଟ ଚେକ୍‌ କରିବା ପରେ ୫ଟି ଆକାଉଣ୍ଟରୁ ୭୦ ଲକ୍ଷ ଟଙ୍କା ନ ଥିବା ସେ ଜାଣିବାକୁ ପାଇଥିଲେ। ଏହି ଟଙ୍କା ହଡ଼ପ ପଛରେ ବ୍ୟାଙ୍କର ପିଅନ ସତ୍ୟବାନ ଘଡେଇଙ୍କ ନାମରେ ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହିତ ପିଅନ ସତ୍ୟଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି। ଏପରିକି ପୋଲିସ ବ୍ୟାଙ୍କର କ୍ୟାସିୟର ଓ ପୂର୍ବତନ ମ୍ୟାନେଜରଙ୍କ ନାମରେ ମଧ୍ୟ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଜଣାପଡିଛି। ଏହି ଘଟଣା ପଦାକୁ ଆସିବା ପରେ ରାଇସରପୁର ଗଁାର ଅଞ୍ଜନ କୁମାର ମହାଳିକ ବିଦେଶରେ ରହୁଥିବାରୁ ତାଙ୍କ ସ୍ତ୍ରୀ ଶଶୀକଳା ବ୍ୟାଙ୍କକୁ ଯାଇ ତାଙ୍କ ଆକାଉଣ୍ଟ ନଂ. ୫୦୨୫୩୭୫୬୫୨୩ ଚେକ କରିବାରୁ ୨୦୨୩ ଜୁନ ୨୭ରେ ୫ ଲକ୍ଷ, ୩୦ ତାରିଖରେ ୩.୫୦ ଲକ୍ଷ, ଅଗଷ୍ଟ ୨୫ରେ ୧.୪୦ ଲକ୍ଷ ଓ ସେପ୍ଟେମ୍ବର ୧୫ରେ ୧ ଲକ୍ଷ ୨୫,୦୧୩ ମୋଟ ୪ଟି ପର୍ଯ୍ୟାୟରେ ୧୧ ଲକ୍ଷ ୧୫ ହଜାର ୧୩ଟଙ୍କା ତାଙ୍କ ଠକେଇ ହୋଇଥିବା ଜାଣିବାକୁ ପାଇଥିଲେ। ସେହିପରି ଅଳିହା ଗ୍ରାମର ସଦାନନ୍ଦ ପୃଷ୍ଟି ଜୁନ ୯ ତାରିଖରେ ୫ ଲକ୍ଷ ଟଙ୍କା ଫିକ୍ସ ଡିପୋଜିଟ୍‌ କରିବାକୁ ଯାଇଥିଲେ। ବ୍ୟାଙ୍କ ମ୍ୟାନେଜର ପିଅନ ସତ୍ୟଙ୍କୁ ଦେଖା କରିବାକୁ କହିବାରୁ ସେ ଏକ ଉଠାଣ ଫର୍ମରେ ୫ ଲକ୍ଷ ଟଙ୍କା ଉଠାଣ କରିବା ନିମନ୍ତେ ଦସ୍ତଖତ ଦେବା ପରେ ଜାନୁଆରୀ ୧୪ ତାରିଖରେ ସତ୍ୟ ତାଙ୍କୁ ବଣ୍ଡ ଦେଇଥିଲେ। ପରେ ସେହିଦିନ ଆଉ ୪ ଲକ୍ଷ ଟଙ୍କା ଫିକ୍ସ ଡିପୋଜିଟ କରିବାକୁ ସତ୍ୟଙ୍କୁ ଉଠାଣ ଫାର୍ମ ଭରି ଦେଇଥିବା ବେଳେ ଖାତାରୁ ଟଙ୍କା ଉଠିଯାଇଛି। ମାତ୍ର ଆଜି ପର୍ଯ୍ୟନ୍ତ ତାଙ୍କୁ ଟଙ୍କା ମିଳିଲା ନାହଁ କିମ୍ବା ବଣ୍ଡ ମଧ୍ୟ ମିଳିଲାନି। ତେଣୁ ସେ ଠକେଇର ଶିକାର ହୋଇଥିବା ନିଶ୍ଚିନ୍ତ ହୋଇଯାଇଥିଲେ। ସେହିପରି ବ୍ୟାଙ୍କରେ ଏକାଧିକ ଖାତାଧିକାରୀଙ୍କ ଖାତାରୁ ୫ ହଜାର, ୧ ଲକ୍ଷ, ଦେଢ଼ ଲକ୍ଷ ଭଳି ଟଙ୍କା ନ ଥିବା ନେଇ ଅଭିଯୋଗର ଲମ୍ବା ତାଲିକା ଏବେ ସାମ୍ନାକୁ ଆସିବାରେ ଲାଗିଛି। ଏ ନେଇ ଗ୍ରାହକମାନେ ଜାନୁଆରୀ ୨୦ରେ ଥାନାରେ ଅଭିଯୋଗ କରିଥିଲେ। ଏ ନେଇ ଆଳି ଥାନା ଆଇଆଇସି ସବ୍ୟସାଚୀ ଶତପଥୀଙ୍କୁ ପଚାରିବାରେ ନଂ. ୬୩/୨୪ରେ ମାମଲା ରୁଜୁ କରାଯାଇ ସତ୍ୟବାନଙ୍କୁ ଜାନୁଆରୀ ୨୨ରେ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଏ ନେଇ ଅଧିକ ତଦନ୍ତ ଚାଲିଛି। ଏଭଳି ଏକ ଠକେଇ ଘଟଣାରେ ବ୍ୟାଙ୍କର ପୂର୍ବତନ ମ୍ୟାନେଜର କିଭଳି ଭାବେ ଜାଣିପାରିଲେ ନାହିଁ ନା ତାଙ୍କ ଇସାରାରେ ଏଭଳି ଠକେଇ ହୋଇଛି ତାହାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ଗ୍ରାହକ। ଏଥିସହ ସେମାନଙ୍କ ଟଙ୍କା ଖୁବ୍‌ଶୀଘ୍ର ବ୍ୟାଙ୍କ ଫେରାଇ ଦେଉ ନଚେତ ଆଗାମୀଦିନରେ ଗ୍ରାହକମାନେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।

The post ଜମାକାରୀଙ୍କ ଆକାଉଣ୍ଟରୁ କୋଟିଏରୁ ଊର୍ଦ୍ଧ୍ୱ ଉଠାଇନେଲେ appeared first on Dharitri Odia News.