ଝିଅର କିଡନୀ ଖରାପ, ଚିକିତ୍ସା ପାଇଁ ସହାୟତା ମାଗୁଛନ୍ତି ବାପା ମା’

ମନ୍ଦିର ପରିସରର ଗୋଟିଏ ଖୁଣ୍ଟକୁ ଆଉଜି ବସିଥାନ୍ତି ଜଣେ ମହିଳା । ମା’ଟିଏ ସେ ଶିଶୁକୁ କୋଳରେ ଧରି ବସି ଥାଏ l ଛଳ ଛଳ ଆଖିରୁ ଲୁହ ଝରି ପଡୁଥାଏ ତାଙ୍କର l ଆଉ ସେହି ଲୁହ ଧାରର ବ୍ୟଥା କେବଳ ଓଠ ହିଁ ବୁଝି ପରୁଥାଏ l ମା’ ଟି ସେହି ଲୁହ ଛଳ ଛଳ ଆଖିରେ ଟିକେ ମନ୍ଦିର ଆଡକୁ ଚାହୁଁ ଥାନ୍ତି l ହେଲେ ମନ୍ଦିର ପହଡ ପଡ଼ି ସାରିଥାଏ l ଯାହା ଲାଗୁଥାଏ ଏମା’ଟି ଆଖିର ଲୁହ ଜୀବନରେ କେବେ ଶୁଖିବ କି ନାହିଁ ସେ ନିଜେ ବି ଜାଣି ନାହାନ୍ତି l ଛୋଟ ଛୁଆଟିକୁ କୋଳରେ ଧରି ମା ମନ ମାରି ନିରାଶ ହୋଇ ବସିଥାନ୍ତି l

ମନ କଣ ହେଲା କେଜାଣି ଛୁଆଟିକୁ ଧରି ଉଠି ଯାଇ ମନ୍ଦିର ଦୁଆର ଆଗରେ ଛୁଆଟିକୁ ମୁଣ୍ଡିଆ ମାରିବାକୁ କହି ନିଜେ ପ୍ରଣାମ କରି ଦୁଃଖ ଜଣାଉ ଥିଲେ l ପୁଣି ଆସି ସେହି ସ୍ଥାନରେ ବସି ପଡିଲେ l ମଝିରେ କଣ ଟିକେ ଫୋନ୍ ରେ କଥା ହୋଇ ପୁଣି ନିଜ ଝିଅକୁ ପଣତ କାନିରେ ପୋଛି ଦେଇ ଗେଲ କରି ଦେଉଥିଲେ । ପୁଣି ନିଜ କୋଳରେ ଚାପି ଧରି ଗେଲ କରି ପକାଉ ଥାନ୍ତି l ନିଜ ଲୁହକୁ ନିଜ କାନିରେ ପୋଛି ପକାଉ ଥାନ୍ତି l ମା ଆଖିରେ ଲୁହ ଦେଖି ସେହି କୁନି ଝିଅଟି କୁନି କୁନି ହାତରେ ପୋଛିବାକୁ ଚେଷ୍ଟା କରୁଥାଏ l ସତରେ ସେ ଦୃଶ୍ୟ ଯିଏ ଦେଖିବ ତା ଆଖିରେ ବି ଲୁହ ରହିବନି ।ଏ ମା’ ଟି ଆଜି ମନ୍ଦିରରେ କାହିଁକି ? କାହିଁକି ଗୁମୁରି ଗୁମୁରି କାନ୍ଦୁଛି ?

ଏହି ମା’ର ଦୁଃଖ ଶୁଣିଲେ ଆପଣଙ୍କ ହୃଦୟ ବି କାନ୍ଦି ଉଠିବ । ସେ କହିବା ଅନୁଯାୟୀ ତାଙ୍କ ନାଁ ହେଉଛି ଉର୍ମିଳା, ଘର ଗଞ୍ଜାମ ଜିଲ୍ଲାରେ l ମା’କୋଳରେ ଥିବା ତାଙ୍କର ଏହି ଛୋଟ ଝିଅର ବୟସ ମାତ୍ର ତିନି ବର୍ଷ l ବିଧାତାର କି ବିଡମ୍ବନା କରିଛି କେଜାଣି ଏତେ ଛୋଟ ବେଳୁ ତାର ଦୁଇଟି ଯାକ କିଡନୀ ଖରାପ l ତାର ଚିକିତ୍ସା କରାଇ କରାଇ ଟଙ୍କା ପଇସା ଆଉ ନାହିଁ l ଏଠି ସେଠି ଦୌଡ଼ି ଦୌଡ଼ି ଆଉ ପାଦରେ ବଳ ବି ନାହିଁ l ଏବେ ଧାଇଁ ଆସିଥିଲେ ଭୁବନେଶ୍ୱର ଏହି ମନ୍ଦିର ନିକଟକୁ, କାହାକୁ ଜଣଙ୍କୁ ସାହାଯ୍ୟ ମାଗିବା ଲାଗି l ହେଲେ ନିରାଶ ହେବାକୁ ପଡ଼ିଲା । ଥକା ମାରି ମନ ଦୁଃଖରେ ବସି ଥିଲେ ଏହି ମନ୍ଦିରରେ l ମାଆ ଆଖିର ଲୁହ ଆଉ ମନର କୋହ ଏକାଠି କରି କହୁଥିଲେ ମୁଁ ନିଜେ କିଡନୀ ଦେଇ ଦେବି ହେଲେ ଝିଅଠାରେ କିଡନୀ ଲଗାଇବାକୁ କୁଆଡେ ତିରିଶି ଲକ୍ଷ ଟଙ୍କା ଖର୍ଚ୍ଚ ହେବ l ଏତେ ଟଙ୍କା ଆସିବ କୁଆଡୁ ? ଯଦି ଆପଣମାନେ ଚାହିଁବେ ମୋ ଝିଅ ଭଲ ହୋଇଯିବ । କେବଳ ଟିକେ ସାହାଯ୍ୟ ଦରକାର ।

ହେଲେ ଏଇ ମାଆଟିର କଥା ଶୁଣିବ କିଏ ଆଉ ଏତେଗୁଡ଼ାଏ ଟଙ୍କା ସହାୟତା ଦେବ ବା କିଏ ? ଆମେ ତାଙ୍କୁ ବୁଝାଇଥିଲୁ ନିଜ ଅଞ୍ଚଳକୁ ଯାଇ ଜନପ୍ରତିନିଧି ଆଉ ପ୍ରଶାସନକୁ ଗୁହାରୀ କରିବା ପାଇଁ । ହେଲେ ସେ ମାଆଟିଏ, ନିଜ ପିଲାର ଚିନ୍ତାରେ ଏମିତି ବୁଡ଼ି ରହିଛି ଯେ ଖାଲି କୁଟା ଖିଅଟିଏ ପାଇଲେ ଯେମିତି ଜାବୁଡ଼ି ଧରିବ। ଜଣା ନାହିଁ ଭଗବାନ ଏହି ତିନି ବର୍ଷର ଶିଶୁଟି ପାଇଁ କିଭଳି ଭାଗ୍ୟ ଲେଖିଛନ୍ତି ।

Also Read:ଜୟପୁରରେ ଅନ୍ତର୍ଜାତୀୟ ଯୋଗ ଦିବସ ପାଳିତ, ଯୋଗ ଦେଲେ ଉପଜିଲ୍ଲାପାଳ,ବିଧାୟକ

The post ଝିଅର କିଡନୀ ଖରାପ, ଚିକିତ୍ସା ପାଇଁ ସହାୟତା ମାଗୁଛନ୍ତି ବାପା ମା’ appeared first on KNews Odisha.