ଦେଶ ବାହାରକୁ ଡାଟା ପଠାଇ ପାରିବେ ନାହିଁ କୌଣସି କମ୍ପାନି, ସରକାର ଆଣିବେ ନିୟମ

ନୂଆଦିଲ୍ଲୀ: କମ୍ପାନିଗୁଡ଼ିକ ପାଇଁ କେନ୍ଦ୍ର ସରକାର ଖୁବଶୀଘ୍ର ଏକ ନିୟମ ଆଣିବାକୁ ଯାଉଛନ୍ତି । ଏହା ଅନୁସାରେ କୌଣସି କମ୍ପାନି ଦେଶର ଡାଟାକୁ ବାହାରକୁ ପଠାଇପାରିବେ ନାହିଁ । ଏହି ନିୟମ ଦେଶୀୟ କମ୍ପାନି ସହ ଦେଶରେ ଥିବା ବିଦେଶୀ କମ୍ପାନି ଉପରେ ବି ଲାଗୁ ହେବ । ଡିଜିଟାଲ୍ ପର୍ସନାଲ୍ ଡାଟା ପ୍ରୋଟେକ୍ସ (DPDP) ଆକ୍ଟର ବିଧେୟକ ଅନୁସାରେ ସରକାର ଦେଶର ଡାଟା ବାହାରକୁ ପଠାଇବା ଉପରେ ରୋକ ଲଗାଇବା ପାଇଁ ନିର୍ଦ୍ଦେଶ ଜାରି କରିପାରନ୍ତି । ଡ୍ରାଫ୍ଟର ଏହି ନିୟମ ଉପରେ ମତାମତ ପାଇଁ ଜାନୁଆରୀ ୩ରେ ସାର୍ବଜାନୀନ କରାଯାଇଛି ଏବଂ ଫେବ୍ରୁଆରୀ ୧୮ ସୁଦ୍ଧା ଏହା ଉପରେ ମତମତ ଦେବା ପାଇଁ କୁହାଯାଇଛି ।

ଡିଜିଟାଲ ପର୍ସନାଲ ଡାଟା ପ୍ରୋଟେକ୍ସନ ଆକ୍ଟର ଡ୍ରାଫ୍ଟ ନିୟମ ୧୪ ଅଧିନରେ ଭାରତ ବାହାରକୁ କୌଣସି ପ୍ରକାର ଡାଟା ଟ୍ରାନ୍ସଫର କେନ୍ଦ୍ର ସରକାରଙ୍କ ସ୍ୱତନ୍ତ୍ର ଆଦେଶ ଅଧିନରେ ଆସିବ । ଏହି ନିୟମ ଅନୁସାରେ ବ୍ୟକ୍ତିଗତ ସୂଚନାକୁ ଦେଶ ବାହାରକୁ ପଠାଇବାର ଅଧିକାର କେନ୍ଦ୍ର ସରକାରଙ୍କ ଅଧିନରେ ରହିବ । ତେବେ ଏହି ରୁଲ୍ ୧୪ କେଉଁ ଆଧାରରେ କସରକାର ଏପରି ଆଦେଶ ଜାରି କରିବେ ତାହା ସ୍ପଷ୍ଟ କରିନାହିଁ । ଉଲ୍ଲେଖଯୋଗ୍ୟ ଯେ ଡିପିଡିପି ଆକ୍ଟର ଧାରା ୧୭(୨) ସରକାରଙ୍କୁ ବିଶେଷ ପରିସ୍ଥିତିରେ ଡାଟା ଟ୍ରାନ୍ସଫର ଉପରେ ପ୍ରତିବନ୍ଧକ ଲଗାଇବା ପାଇଁ ଅନୁମତି ଦେଉଛି ।

ନିୟମ ୧୪ର ଆବଶ୍ୟକତା କଣ ?

ଡିପିଡିପି ଆକ୍ଟର ଗୋଟିଏ ଧାରା ଅନୁସାରେ ଡାଟା ଟ୍ରାନ୍ସଫର ଉପରେ ସରକାର ରୋକ ଲଗାଇପାରିବେ । କିନ୍ତୁ ନୂଆ ନିୟମ ସରକାରଙ୍କୁ ଅଧିକ କ୍ଷମତା ଦେବ । ଏହା ଜରିଆରେ ସରକାର ବିନା କୌଣସି ଦେଶର ବ୍ଲାକ୍ ଲିଷ୍ଟ ପ୍ରସ୍ତୁତ କରିବା ପୂର୍ବରୁ ହିଁ ଆଦେଶ ଜାରି କରି ଡାଟା ଟ୍ରାନ୍ସଫର ଉପରେ ରୋକ୍ ଲଗାଇପାରିବେ ।