ଦ୍ୱିତୀୟ ପର୍ଯ୍ୟାୟ ମତଦାନବେଳେ ବିଜେପି ଘଟାଇଛି ବ୍ୟାପକ ହିଂସାକାଣ୍ଡ: ବିଜେଡି

ଭୁବନେଶ୍ୱର: ଓଡ଼ିଶାରେ ୫ଟି ଲୋକସଭା ଆସନ ଓ ୩୫ଟି ବିଧାନସଭା ଆସନ ପାଇଁ ଆଜି ଦ୍ବିତୀୟ ପର୍ଯ୍ୟାୟ ମତଦାନ ସରିଥିବା ବେଳେ ବିଜେପି କର୍ମୀଙ୍କ ଦ୍ୱାରା ହିଂସା କାଣ୍ଡ ଘଟାଯାଇଥିବାର ଖବର ମିଳିଛି। ବରଗଡ଼ ବିଧାନସଭା ନିର୍ବାଚନ ମଣ୍ଡଳୀରେ ଅଭିଯୁକ୍ତ ଅଶୋକ ମହାନନ୍ଦ ବିଶ୍ବନାଥ ମିର୍ଧାଙ୍କୁ ଛୁରାମାଡ଼ କରିଥିବା ଅଭିଯୋଗ ହୋଇଛି। ଏହି ଘଟଣା ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ନୁହେଁ ବରଂ ମଦ୍ୟପାନ କରି ଦୁଇ ଜଣଙ୍କ ମଧ୍ୟରେ ବ୍ୟକ୍ତିଗତ ଝଗଡ଼ା । କିନ୍ତୁ ବିଜେପି ଏହାକୁ ଏକ ରାଜନୈତିକ ପ୍ରସଙ୍ଗ କରିବାକୁ ଚାହୁଁଥିଲା ଏବଂ ସେହି ଢଙ୍ଗରେ ଏହାକୁ ଦର୍ଶାଇଥିଲା ବୋଲି କହିଛନ୍ତି ବିଜେଡି ସାଂସଦ ତଥା ରାଷ୍ଟ୍ରୀୟ ମୁଖପାତ୍ର ଡ.ସସ୍ମିତ ପାତ୍ର ।

ଡ.ପାତ୍ର କହିଛନ୍ତି ଯେ- ମିଳିଥିବା ସୂଚନା ଅନୁଯାୟୀ, ରୋକ୍ସା ଗ୍ରାମପଞ୍ଚାୟତ, ବୌଦ୍ଧ ବ୍ଲକ, କଣ୍ଟାମାଳ ବିଧାନସଭା ନିର୍ବାଚନ ମଣ୍ଡଳୀରେ ମହେଶ୍ୱରପିଣ୍ଡା ବୁଥ୍ ନଂ ୨୮ ଓ ଅମୁରଦା ବୁଥ୍ ନଂ ୦୯ ରେ ବିଜେପି ନେତା, କର୍ମୀ ଓ ବିଜେପି ବିଧାୟକ ପ୍ରାର୍ଥୀ ସରୋଜ କୁମାର ପ୍ରଧାନଙ୍କ ସମର୍ଥକମାନେ ବୁଥ୍ ଦଖଲରେ ଲାଗିଛନ୍ତି।

ସୁନ୍ଦରଗଡ଼ ପୌରପାଳିକା ୭ ନମ୍ବର ୱାର୍ଡ ବୁଥ୍ ନମ୍ବର ୨୧୩ ରେ ବିଜେପି ବିଧାୟକ ପ୍ରାର୍ଥୀ କୁସୁମ ଟେଟେ ତାଙ୍କ ସମର୍ଥକଙ୍କ ସହ ମିଶି ଭୋଟରଙ୍କୁ ଧମକ ଦେଇଛନ୍ତି ।

ଟିଟଲାଗଡ଼ର ବିଜେପି ବିଧାୟକ ପ୍ରାର୍ଥୀ ନବୀନ ଜୈନ ପରାଜୟ ଭୟରେ ବିଜେଡି କର୍ମୀଙ୍କୁ ଲଗାତାର ଧମକ ଦେଉଛନ୍ତି। ବିଜେପି ସପକ୍ଷରେ ଭୋଟ୍ ଦେବା ପାଇଁ ସେ ଲଗାତାର ଲୋକଙ୍କୁ ଭୟଭୀତ କରୁଛନ୍ତି ନଚେତ୍ ଭୟଙ୍କର ପରିଣାମ ଭୋଗିବାକୁ ପଡ଼ିବ।

ଅତାବିରା ନିର୍ବାଚନ ମଣ୍ଡଳୀରେ ଅନୁରୂପ ଘଟଣା ଦେଖିବାକୁ ମିଳିଛି । ସୁଆଳଖଣ୍ଡ ପଞ୍ଚାୟତ, ଯୋଗୀପାଲି ମତଦାନ କେନ୍ଦ୍ର, ବୁଥ୍ ନଂ ୨୨୧ରେ ସ୍ୱେଚ୍ଛାସେବୀ ବେଶରେ ବିଜେପି କର୍ମୀମାନେ ଭିନ୍ନକ୍ଷମ ଭୋଟରଙ୍କୁ ବିଜେପିକୁ ଭୋଟ୍ ଦେବାକୁ ବାଧ୍ୟ କରୁଛନ୍ତି।

ବରଗାଁର ଅଇଁପାଲି ପଞ୍ଚାୟତ, ବୁଥ୍ ନଂ ୨୧୨ ରେ ବିଜେଡି ଭୋଟର ଓ ବୁଥ୍ ଏଜେଣ୍ଟଙ୍କୁ ଧମକାଇଛନ୍ତି ବିଜେପି କର୍ମୀ।

ସାଲେପାଲି, ଅରିଗୁଡି ଜିପି, ବୁଥ୍ ନଂ ୨୪୬ରେ ବିଜେପି କର୍ମୀମାନେ ବିଜେଡି କର୍ମୀଙ୍କୁ ମାଡ଼ ମାରିଛନ୍ତି।

ଏଭଳି ହିଂସାକାଣ୍ଡ ଅତ୍ୟନ୍ତ ଉଦବେଗଜନକ ଏବଂ ଓଡ଼ିଶାରେ ନିର୍ବାଚନ ପ୍ରକ୍ରିୟାର ନିରପେକ୍ଷତାକୁ ନେଇ ଗଭୀର ସନ୍ଦେହ ସୃଷ୍ଟି କରିଛି। ନିର୍ବାଚନ ପ୍ରକ୍ରିୟାରେ ସମ୍ପୃକ୍ତ ସମସ୍ତ ବ୍ୟକ୍ତିବିଶେଷଙ୍କ ସୁରକ୍ଷା ପାଇଁ ତୁରନ୍ତ ପଦକ୍ଷେପ ନେବା ଜରୁରୀ। ଗଣତନ୍ତ୍ରର ନୀତିକୁ ବଜାୟ ରଖିବା ଏବଂ ଓଡ଼ିଶାରେ ଅବାଧ ଓ ନିରପେକ୍ଷ ନିର୍ବାଚନ ସୁନିଶ୍ଚିତ କରିବା ପାଇଁ ଆମେ ନିର୍ବାଚନ ଆୟୋଗଙ୍କୁ ଅନୁରୋଧ କରୁଛୁ। ଆଗକୁ ହିଂସା ରୋକିବା ପାଇଁ ଏବଂ ଦାୟୀ ବ୍ୟକ୍ତିମାନଙ୍କୁ ସେମାନଙ୍କ କାର୍ୟ୍ୟ ଲାଗି ସୁନିଶ୍ଚିତ ଉତ୍ତରଦାୟୀ କରିବା ପାଇଁ ଆମେ ଏହି ମାମଲାରେ ଆପଣଙ୍କ ତୁରନ୍ତ ହସ୍ତକ୍ଷେପ କରିବାକୁ ଅନୁରୋଧ କରୁଛୁ ।

ପଦ୍ମପୁର ବିଧାନସଭା ନିର୍ବାଚନମଣ୍ଡଳୀରେ ୨୦୨୪ ମେ ୨୦ ତାରିଖ ସକାଳେ ଏକ ଅଭାବନୀୟ ଘଟଣା ଘଟିଥିଲା। ପଦ୍ମପୁର ର ବିଜେପି ବିଧାୟକ ପ୍ରାର୍ଥୀ ଗୋବର୍ଦ୍ଧନ ଭୋୟଙ୍କ ସମର୍ଥକ ତଥା ଗ୍ରାମ ପଞ୍ଚାୟତ ସରଗିବାହାଲ ଗ୍ରାମର ଦୟାନିଧି ସୁନାଙ୍କୁ ବିଜେପି କର୍ମୀମାନେ ନିର୍ମମ ଭାବେ ଆକ୍ରମଣ କରିଥିଲେ। ପଞ୍ଚାଭୟା ବୁଥ୍ ନିକଟରେ ଏହି ଆକ୍ରମଣ ଘଟିଥିବା ବେଳେ ଶ୍ରୀ ସୁନା ଗୁରୁତର ଆହତ ହୋଇଛନ୍ତି। ଏଥିସହିତ ବିଜେପି କର୍ମୀମାନେ ତାଙ୍କୁ ଜୀବନ ପ୍ରତି ବିପଦପୂର୍ଣ୍ଣ ଚେତାବନୀ ଦେଇଛନ୍ତି। ଗଣତାନ୍ତ୍ରିକ ସମାଜରେ ଏଭଳି ହିଂସାକାଣ୍ଡ ସମ୍ପୂର୍ଣ୍ଣ ଗ୍ରହଣୀୟ ନୁହେଁ ଏବଂ ଅବାଧ ଓ ନିରପେକ୍ଷ ନିର୍ବାଚନ ନୀତିକୁ ଗୁରୁତର ଭାବେ କ୍ଷୁଣ୍ଣ କରୁଛି।

ଏହାବ୍ୟତୀତ ଭଟଲି ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ନେଗିମାଣ୍ଡା ଗ୍ରାମରେ ଘଟିଥିବା ଅପହରଣ ଓ ହିଂସାକାଣ୍ଡର ଏକ ଗମ୍ଭୀର ଘଟଣା ପ୍ରତି ଆମେ ତୁରନ୍ତ ଆପଣଙ୍କ ଦୃଷ୍ଟି ଆକର୍ଷଣ କରିବାକୁ ଚାହୁଁଛୁ। ଗାଁରେ ବିଜୁ ଜନତା ଦଳ କାର୍ୟ୍ୟାଳୟ ଖୋଲିବାକୁ ଉଦ୍ୟମ କରୁଥିବା ବେଳେ ଭଟଲିର ବିଜେପି ବିଧାୟକ ପ୍ରାର୍ଥୀ ଇରାଶିଷ ଆଚାର୍ଯ୍ୟଙ୍କ ସମର୍ଥକମାନେ ନେଗିମାଣ୍ଡା ଗ୍ରାମର ସାନନ୍ଦ ସାହୁଙ୍କୁ ଅପହରଣ କରି ନିର୍ମମ ଭାବେ ମାଡ଼ ମାରିଥିଲେ। ଏକ ରାଜନୈତିକ କାର୍ଯ୍ୟାଳୟ ପ୍ରତିଷ୍ଠା କରିବା ଏକ ବୈଧ ଏବଂ ଗଣତାନ୍ତ୍ରିକ କାର୍ଯ୍ୟକଳାପ । ତେବେ ଏହାକୁ ନେଇ ବିରୋଧୀ ପ୍ରାର୍ଥୀଙ୍କ ସମର୍ଥକମାନେ ହିଂସାକାଣ୍ଡ ଘଟାଇଥିବା ଡ.ପାତ୍ର ଦର୍ଶାଇଛନ୍ତି ।