ଦ୍ୱିତୀୟଥର ବିବାହ ବନ୍ଧନରେ ବାନ୍ଧିହେଲେ ଜୋମାଟୋ ସିଇଓ ଦୀପିନ୍ଦର ଗୋୟାଲ, ମେକ୍ସିକୋ ମଡେଲଙ୍କୁ କଲେ ଜୀବନସାଥୀ

ନୂଆଦିଲ୍ଲୀ୨୨/୦୩ :  ଅନଲାଇନ୍ ଫୁଡ୍ ଡେଲିଭରୀ ସଂସ୍ଥା ଜୋମାଟୋର ସହ-ପ୍ରତିଷ୍ଠାତା ତଥା ସିଇଓ ଦୀପିନ୍ଦର ଗୋୟଲ ଦ୍ୱିତୀୟ ଥର ବିବାହ କରିଛନ୍ତି।   ଖବର ଅନୁସାରେ ସେ ମେକ୍ସିକୋର ଜଣେ ମଡେଲକୁ ବିବାହ କରିଛନ୍ତି  ଏବଂ ନିକଟରେ ସେ ହନିମୁନରୁ ଫେରିଛନ୍ତି। ରିପୋର୍ଟ ଅନୁଯାୟୀ, ଦୀପିନ୍ଦର ଗୋୟଲ ମେକ୍ସିକୋର ମଡେଲ ଗ୍ରେସିଆ ମୁନୋଜଙ୍କୁ ବିବାହ କରିଛନ୍ତି। ସୂତ୍ରରୁ ପ୍ରକାଶ ଯେ ଗୋୟଲ ଏବଂ ମୁନୋଜ ଫେବୃଆରୀ ମାସରେ ଭ୍ୟାକେସନରେ ଯାଇ ଏବେ ଫେରିଛନ୍ତି। ଏହା ଗୋୟଲଙ୍କ ଦ୍ୱିତୀୟ ବିବାହ । ତାଙ୍କର ପ୍ରଥମ ବିବାହ ଆଇଆଇଟି-ଦିଲ୍ଲୀର ସହପାଠୀ କାଞ୍ଚନ ଯୋଶୀଙ୍କ ସହ ହୋଇଥିଲା।

ଗ୍ରେସିଆ ମୁନୋଜ ଜଣେ ମଡେଲ୍।  ମେକ୍ସିକୋରେ ତାଙ୍କର ଜନ୍ମ। ସେ ଜଣେ ଟେଲିଭିଜନ ହୋଷ୍ଟ ମଧ୍ୟ । ସେ 2022 ମସିହାରେ ଆମେରିକାରେ ମେଟ୍ରୋପଲିଟାନ ଫ୍ୟାଶନ ସପ୍ତାହର ବିଜେତା ହୋଇଥିଲେ ।  ସେ ବର୍ତ୍ତମାନ ଭାରତରେ ଅଛନ୍ତି, ଯାହା ବିଷୟରେ ସେ ଇନଷ୍ଟାଗ୍ରାମରେ ସୂଚନା ଦେଇଛନ୍ତି। ଜାନୁଆରୀ ମାସରେ ମଧ୍ୟ ସେ ଭାରତର ଅନେକ ଚିତ୍ର ସେୟାର କରିଥିଲେ। ସେଥିରେ  ଦିଲ୍ଲୀର ପ୍ରସିଦ୍ଧ ପର୍ଯ୍ୟଟନ ସ୍ଥାନଗୁଡ଼ିକର ଚିତ୍ର ଅନ୍ତର୍ଭୁକ୍ତ। ବର୍ତ୍ତମାନ ସେ ଇନଷ୍ଟାଗ୍ରାମରେ ତାଙ୍କ ବାୟୋରେ ଉଲ୍ଲେଖ କରିଛନ୍ତି ଯେ ବର୍ତ୍ତମାନ ଭାରତରେ ତାଙ୍କ ଘର। 

ଦୀପିନ୍ଦର ଗୋୟଲଙ୍କୁ 41 ବର୍ଷ । ସେ ନୂଆ ପିଢ଼ିର ଅଗ୍ରଣୀ ଭାରତୀୟ ଉଦ୍ୟୋଗୀମାନଙ୍କ ମଧ୍ୟରୁ ଜଣେ। ସେ 2008 ରେ ଜୋମାଟୋ ଆରମ୍ଭ କରିଥିଲେ । ଏହାପୂର୍ବରୁ ଗୋୟଲ ବେନ୍ ଆଣ୍ଡ କମ୍ପାନୀରେ କାମ କରୁଥିଲେ। ଜୋମାଟୋ ହେଉଛି ଷ୍ଟକ୍ ଏକ୍ସଚେଞ୍ଜରେ ଏକ ତାଲିକାଭୁକ୍ତ କମ୍ପାନୀ । ବଜାର ଅନୁଯାୟୀ କମ୍ପାନୀର ମୂଲ୍ୟ ବର୍ତ୍ତମାନ 1.5 ଲକ୍ଷ କୋଟି ଟଙ୍କା। ଏହିପରି, ଜୋମାଟୋ ପ୍ରମୁଖ ଭାରତୀୟ ଷ୍ଟାର୍ଟଅପ୍ କମ୍ପାନୀଗୁଡିକ ମଧ୍ୟରେ ଗଣାଯାଇଥାଏ । 

ନିକଟରେ ଜୋମାଟୋ ମଧ୍ୟ ବିବାଦରେ ଛନ୍ଦି ହୋଇଥିଲା। ପ୍ରକୃତରେ,  କମ୍ପାନୀ ଶାକାହାରୀ ଲୋକଙ୍କ ପାଇଁ  ଭେଜ୍ ବିତରଣ ସେବା ଆରମ୍ଭ କରିବା ବିଷୟରେ କମ୍ପାନୀ ସୂଚନା ଦେଇଥିଲା । କମ୍ପାନୀର ଏହି ପଦକ୍ଷେପ ଇଣ୍ଟରନେଟରେ ଶାକାହାରୀ ଓ ମାଂସାହାରୀ ବ୍ୟକ୍ତି ବିଶେଷଙ୍କ ମଧ୍ୟରେ ଆରମ୍ଭ ହୋଇଯାଇଥିଲା ବିତର୍କ।