ନଳକୂପରୁ ବାହାରୁଛି ଦୂଷିତ ପାଣି: ସମାଧାନ ନ ହେଲେ ଭୋଟ ଦେବୁନାହିଁ

ପାରଳାଖେମୁଣ୍ଡି,୧୫ା୨(ଗିରିଧାରୀ ପରିଛା): ଗଜପତି ଜିଲା ଗୋଶାଣୀ ବ୍ଲକ ଅଧୀନ ଲାବଣ୍ୟଗଡ଼ ପଞ୍ଚାୟତ କାନସଡା ଗ୍ରାମରେ ପାନୀୟ ଜଳ ସମସ୍ୟାକୁ ନେଇ ଗ୍ରାମବାସୀ ଭୋଟ ବର୍ଜନ କରିବାକୁ ନିଷ୍ପତ୍ତି ନେବା ସହ ଧାରଣା ଦେବାକୁ ଚେତାବନୀ ଦେଇଛନ୍ତି।

ଗ୍ରାମରେ ସ୍ବଚ୍ଛ ପାନୀୟ ଜଳ ପାଇବା ପାଇଁ ଗ୍ରାମବାସୀ ରାଜନେତାଠାରୁ ଆରମ୍ଭ କରି ପ୍ରଶାସନିକ ଅଧିକାରୀମାନଙ୍କୁ ବାରମ୍ବାର ଅଭିଯୋଗ କରିଥିଲେ ମଧ୍ୟ କେହି ଶୁଣୁ ନ ଥିବା ଅଭିଯୋଗ କରିଛନ୍ତି। ଫଳରେ ଗାଁରେ ଦୀର୍ଘ ଦିନ ହେଲା ଲୋକେ ସ୍ବଚ୍ଛ ପାଣି ମୁନ୍ଦାଏ ପାଇବାରୁ ବଞ୍ଚିତ ହେଉଥିବା ଗାମବାସୀ ପ୍ରକାଶ କରିଛନ୍ତି।

ଗ୍ରାମରେ ୮୦ରୁ ଊଦ୍ଧର୍‌ବ ପରିବାର ବସବାସ କରୁଥିବା ବେଳେ ୪୦୦ରୁ ଊଦ୍ଧର୍‌ବ ଜନସଂଖ୍ୟା ରହିଛି। ଗ୍ରୀଷ୍ମଋତୁ ଆସିଲେ ପୋଖରୀ, ନାଳ ଓ ନଳକୂପଗୁଡିକ ଶୁଖିଯାଉଛି। ଦୁଇଟି ନଳକୂପ ଅଛି, କିନ୍ତୁ ସେଥିରୁ ଲୌହଯୁକ୍ତ ପାଣି ବାହାରୁଥିବାରୁ ପିଇବା ପାଇଁ ଉପଯୁକ୍ତ ହେଉନାହିଁ। ତଥାପି ଉପାୟଶୂନ୍ୟ ହୋଇ ଲୋକେ ନଳକୂପ ପାଣି ପିଇ ବିଭିନ୍ନ ପ୍ରକାର ରୋଗରେ ଆକ୍ରାନ୍ତ ହେଉଥିବା ଗ୍ରାମବାସୀ ଅଭିଯୋଗ କହିଛନ୍ତି।

ଏନେଇ ଗ୍ରାମବାସୀ ସରପଞ୍ଚଠାରୁ ଆରମ୍ଭ କରି ଜିଲା ପ୍ରଶାସନ ଅଧିକାରୀଙ୍କ ଦ୍ୱାରସ୍ଥ ହୋଇଛନ୍ତି। କିନ୍ତୁ ବର୍ତ୍ତମାନ ସୁଦ୍ଧା ଏହାର କୌଣସି ସମାଧାନ ହୋଇପାରି ନାହିଁ। ଯଦି ଆଗାମୀ ଦିନରେ ଏହି ସମସ୍ୟାର ସମାଧାନ କରା ନ ଯାଏ ତେବେ ଭୋଟ ବର୍ଜନ କରିବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଏ ନେଇ ଉପବିଭାଗୀୟ ଅଧିକାରୀ ରବୀନ୍ଦ୍ର କୁମାର ଚୌଧୁରୀଙ୍କୁ ଯୋଗାଯୋଗ କରିବାରୁ ସେ କହିଛନ୍ତି, ଜଳସମସ୍ୟା ଗ୍ରାମ୍ୟ ଜଳ ଯୋଗାଣ ବିଭାଗ ନିକଟରେ ପହଁଚିବା ପରେ ନୂତନ ଭାବେ ଏକ ବୋରଓ୍ବେଲ ଖୋଳାଯାଇଛି। ଦୂଷିତ ପାଣି ବାହାରୁଥିବା ନଳକୂପକୁ ଅତିଶୀଘ୍ର ମରାମତି କରାଯିବ।

The post ନଳକୂପରୁ ବାହାରୁଛି ଦୂଷିତ ପାଣି: ସମାଧାନ ନ ହେଲେ ଭୋଟ ଦେବୁନାହିଁ appeared first on Dharitri Odia News.