ନାମାଙ୍କନପତ୍ର ଦାଖଲ କଲେ ଆନ୍ଧ୍ର ଉପମୁଖ୍ୟମନ୍ତ୍ରୀ ରାଜନା ଦୋରା

ପଟାଙ୍ଗି,୨୦ା୪(ଶରତ ଧଳ): ଲୋକ ସଭା ଓ ବିଧାନସଭା ନିର୍ବାଚନକୁ ନେଇ ପଡ଼ୋଶୀ ଆନ୍ଧ୍ର ରାଜ୍ୟ ଚଳଚଞ୍ଚଳ ହୋଇ ଉଠିଥିବା ବେଳେ ସମସ୍ତ ରାଜନୈତିକ ଦଳର ବିଧାୟକ ଏବଂ ଏମ୍‌ପି ପ୍ରାର୍ଥୀ ନିଜ ନିଜର ନାମାଙ୍କନପତ୍ର ଦାଖଲ କରି ପ୍ରଚାର ମଇଦାନକୁ ଓହ୍ଲାଇ ପ୍ରସ୍ତୁତି ଆରମ୍ଭ କରିଛନ୍ତି। ଓଡ଼ିଶାର କୋରାପୁଟ ଜିଲାର ପଟାଙ୍ଗି ବ୍ଲକ ଅଧୀନରେ ରହିଥିବା କୋଟିଆ ପଞ୍ଚାୟତର ଭୋଟରଙ୍କ ଭୋଟ୍‌ ହାତେଇବା ପାଇଁ ମୁଖ୍ୟ ଲକ୍ଷ୍ୟ ରଖିଥିବା ଜଣାପଡ଼ିଛି। ଏହିପରି ସ୍ଥିତି ଦେଖିବାକୁ ମିଳିଛି ଓଡ଼ିଶାର ଉକ୍ତ ଜିଲାର ପଟାଙ୍ଗି ବ୍ଲକ ସୀମାକୁ ଲାଗି ରହିଥିବା ଆନ୍ଧ୍ର ରାଜ୍ୟର ପାର୍ବତୀପୁରମ୍‌ ମାନ୍ୟାମ ଜିଲା ଅଧୀନରେ ରହିଥିବା ସାଲୁର୍‌ ବିଧାନସଭା ଏବଂ ଆରୁକୁ ଲୋକ ସଭା କ୍ଷେତ୍ରରେ।
ସୂଚନାନୁଯାୟୀ, ମେ’ ମାସର ପ୍ରଥମ ପର୍ଯ୍ୟାୟର ୧୩ ତାରିଖରେ ଦୁଇଟି ରାଜ୍ୟରେ ଗୋଟିଏ ଦିନରେ ନିର୍ବାଚନ ହେଉଥିବା ବେଳେ ଏହାକୁ ନେଇ ଓଡ଼ିଶାର କୋରାପୁଟ ଜିଲା ତଥା ପଟାଙ୍ଗି ବ୍ଲକ ପ୍ରଶାସନ ପାଇଁ ଗୁରୁତ୍ୱପୂର୍ଣ୍ଣ ରହିଛି। ସେପଟେ ଆନ୍ଧ୍ର ରାଜ୍ୟର ଉପରୋକ୍ତ ଜିଲା ତଥା ସାଲୁର୍‌ ବ୍ଲକ ପ୍ରଶାସନ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ରହିଥିବା ଜଣାପଡ଼ିଛି। ଯାହାକି ଏହି ଦୁଇ ରାଜ୍ୟର ଦୁଇଟି ଜିଲା ଓ ବ୍ଲକ ପ୍ରଶାସନ ଅଧୀନରେ କୋଟିଆ ପଞ୍ଚାୟତର ସୀମାନ୍ତ ଗ୍ରାମବାସୀ ନିର୍ଭର କରୁଥିବା ବେଳେ ଏହାକୁ ନେଇ ଉଭୟ ସୀମାନ୍ତବାସୀଙ୍କ ଭୋଟ୍‌ ହାତେଇବା ପାଇଁ ଏକପ୍ରକାର ଚ୍ୟାଲେଞ୍ଜ ସୃଷ୍ଟି କରିଛି।

ଅନ୍ୟପକ୍ଷରେ ଓଡ଼ିଶାର ପଟାଙ୍ଗି ନିର୍ବାଚନ ମଣ୍ଡଳୀ ନିମନ୍ତେ ଶୁକ୍ରବାର କଂଗ୍ରେସ ବିଧାୟକ ପ୍ରାର୍ଥୀ ରାମଚନ୍ଦ୍ର କାଡାମ ନିଜ ନାମାଙ୍କନପତ୍ର କୋରାପୁଟ ଜିଲା ପ୍ରଶାସନଙ୍କ ନିକଟରେ ଦାଖଲ କରିଥିବା ବେଳେ ବିଜେଡି ବିଧାୟକ ପ୍ରାର୍ଥୀ ପ୍ରଫୁଲ୍ଲ କୁମାର ପାଙ୍ଗି ୨୨ରେ ନିଜର ନାମାଙ୍କନପତ୍ର ଦାଖଲ କରିବାକୁ ପ୍ରସ୍ତୁତ ହେଉଥିବା ଜଣାପଡ଼ିଛି। ଭାଜପା ଦଳର ବିଧାୟକ ପ୍ରାର୍ଥୀ ଚୈତନ୍ୟ ନନ୍ଦିବାଲି ମଧ୍ୟ ୨୪ ତାରିଖ ପାଇଁ ପ୍ରସ୍ତୁତ ହେଉଥିବା ଜଣାପଡ଼ିଛି। ସେପଟେ କିନ୍ତୁ ଆନ୍ଧ୍ର ରାଜ୍ୟର ସାଲୁର୍‌ ନିର୍ବାଚନ ମଣ୍ଡଳୀ ପାଇଁ ଶୁକ୍ରବାର ଶାସକ ଦଳର ଓ୍ବାଇସିପି ବିଧାୟକ ପ୍ରାର୍ଥୀ ତଥା ଉପମୁଖ୍ୟମନ୍ତ୍ରୀ ରାଜନା ଦୋରା ନିଜ ସମର୍ଥକଙ୍କ ଗହଣରେ ସାଲୁର୍‌ ରିଟର୍ନିଂ ଅଧିକାରୀ ସି ବିଷ୍ଣୁ ଚରଣଙ୍କ ନିକଟରେ ନିଜର ନାମାଙ୍କନପତ୍ର ଦାଖଲ କରିଛନ୍ତି । ସେହିପରି ଟିଡିପି ଦଳର ସନ୍ଧ୍ୟାରାଣୀ ନାମାଙ୍କନପତ୍ର ଦାଖଲ କରି ନିଜର ଦଳୀୟ ପ୍ରଚାର ଓଡ଼ିଶାର କୋଟିଆ ପଞ୍ଚାୟତରୁ ଆରମ୍ଭ କରିବା ପାଇଁ ଯୋଜନା କରୁଥିବା ଜଣାପଡ଼ିଛି। ପାର୍ବତୀପୁରମ୍‌ ଜିଲା ପ୍ରଶାସନ ନିକଟରେ ସ୍ବାଧୀନ ଏମ୍‌ପି ପ୍ରାର୍ଥୀ ଏନ୍‌ ଜୟରାଜ, ପି. ରଞ୍ଜିତ କୁମାର, ସିପିଏମ୍‌ର ପି ଆପାଲା ନାର୍ସା ଏବଂ ଓ୍ବାଇସିପିର ଜି. ତନୁଜା ରାଣୀ ପ୍ରମୁଖ ନିଜ ନିଜର ନାମାଙ୍କନପତ୍ର ଦାଖଲ କରିଛନ୍ତି।

ସୂଚନା ଥାଉକି, ଗତ ୧୮ତାରିଖରେ ଆନ୍ଧ୍ର ରାଜ୍ୟର ପାର୍ବତୀପୁରମ୍‌ ଜିଲା ପ୍ରଶାସନ ନିର୍ବାଚନ ନିମନ୍ତେ ନୋଟିଫିକ୍ସନ ଜାରି କରି ପ୍ରସ୍ତୁତିକୁ ଜୋର୍‌ଦାର କରିଥିବା ସହ ୪ଟି ବିଧାନସଭା ଓ ୪ଲୋକ ସଭା ନିମନ୍ତେ ପ୍ରତ୍ୟେକ ନାମାଙ୍କନପତ୍ର ଦାଖଲ କେନ୍ଦ୍ର ୮ଟି ଡିଏସପି , ଏଏସ୍‌ଆଇ ପ୍ରମୁଖ ଅଧିକାରୀଙ୍କୁ ସୁରକ୍ଷା ଦାୟିତ୍ୱ ପ୍ରଦାନ କରାଯାଇଥିବା ଉକ୍ତ ଜିଲାର ଜିଲାପାଳ ଓ ଜିଲା ଆରକ୍ଷୀ ଅଧୀକ୍ଷକ ଖବରଦାତା ସମ୍ମିଳନୀରେ ସୂଚନା ପ୍ରଦାନ କରିଛନ୍ତି।

The post ନାମାଙ୍କନପତ୍ର ଦାଖଲ କଲେ ଆନ୍ଧ୍ର ଉପମୁଖ୍ୟମନ୍ତ୍ରୀ ରାଜନା ଦୋରା appeared first on Dharitri Odia News.