ନୋଏଡାରେ ଭୁଶୁଡ଼ିଲା ବିଲ୍ଡିଂ, ଅନେକ ଲୋକ ଦବି ରହିଥିବା ଆଶଙ୍କା

ଉତ୍ତର ପ୍ରଦେଶର ନୋଏଡାରେ ଏକ ତିନି ମହଲା ବିଲ୍ଡିଂ ଭୁଶୁଡ଼ି ପଡ଼ିଛି । ଏଥିରେ ଅନେକ ଲୋକ ଭଗ୍ନାବଶେଷ ମଧ୍ୟରେ ଫସି ରହିଥିବା ଆଶଙ୍କା କରାଯାଇଛି । ବିଲ୍ଡିଂ ଭୁଶୁଡ଼ିବା ସମୟରେ ଘଟଣାସ୍ଥଳରେ ଲୋକମାନଙ୍କର ଆର୍ତ୍ତ ଚିତ୍କାର ଶୁଣିବାକୁ ମିଳିଥିଲା । ବର୍ତ୍ତମାନ ପୋଲିସ ଟିମ୍ ଏବଂ ଅନ୍ୟ ଉଦ୍ଧାରକାରୀ ଟିମ୍ ପହଞ୍ଚିଛନ୍ତି । ସମସ୍ତେ ଭଗ୍ନାବଶେଷ ହଟାଇବାରେ ଲାଗିପଡ଼ିଛନ୍ତି । କୁହାଯାଉଛି କି, ଏହି ବିଲ୍ଡିଂ ପାଖରେ ନିଅଁ ଖୋଳାଯାଉଥିଲା ।

ଏହି ଘଟଣା ସେକ୍ଟର ୬୩ ଥାନା ଅଞ୍ଚଳରେ ଘଟିଛି । ପୋଲିସ ଅଧିକାରୀ କହିଛନ୍ତି ଯେ ହନୁମାନ ମନ୍ଦିର ନିକଟ ବହଲୋଲପୁରରେ ଖାଲିଥିବା ଏକ ପ୍ଲଟରେ ନିଅଁ ଖୋଳାଯାଉଥିବା ବେଳେ ଏହି ଘଟଣା ଘଟିଥିଲା । ନିଅଁ ଖୋଳାଯିବା ସମୟରେ ପାଖରେ ଥିବା ଏକ ବିଲ୍ଡିଂର କାନ୍ଥ ହଠାତ୍ ଭୁଶୁଡ଼ି ପଡ଼ିଥିଲା । ଭଗ୍ନାବଶେଷ ମଧ୍ୟରୁ ୨ ଜଣଙ୍କୁ ବାହାର କରାଯାଇଛି ଏବଂ ସେମାନଙ୍କୁ ଚିକିତ୍ସା ପାଇଁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି ।

ପୋଲିସ ସୂଚନା ମୁତାବକ, ଭଗ୍ନାବଶେଷ ମଧ୍ୟରେ ଆହୁରି ଅନେକ ଲୋକ ଦବି ରହିଥିବା ଆଶଙ୍କା କରାଯାଉଛି । ସେମାନଙ୍କୁ ଖୋଜାଖୋଜି ଚାଲିଛି । ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରାଯାଉଛି । ଘଟଣାସ୍ଥଳରେ ବରିଷ୍ଠ ପୋଲିସ ଅଧିକାରୀମାନେ ଉପସ୍ଥିତ ଅଛନ୍ତି । ପୋଲିସ ଫୋର୍ସ ଏବଂ ଫାୟାର ୟୁନିଟ୍ ଦ୍ୱାରା ରେସକ୍ୟୁ କାର୍ଯ୍ୟ କରାଯାଉଛି ।

The post ନୋଏଡାରେ ଭୁଶୁଡ଼ିଲା ବିଲ୍ଡିଂ, ଅନେକ ଲୋକ ଦବି ରହିଥିବା ଆଶଙ୍କା appeared first on KNews Odisha.