ଭାଗ୍ୟ ବଦଳାଇ ଦେଲା ମହାକୁମ୍ଭ, ୪୫ ଦିନରେ ୩୦ କୋଟି ରୋଜଗାର କଲେ ନାବିକ ପରିବାର

କଥାରେ ଅଛି ଭଗବାନ ଯେବେ ଦିଅନ୍ତି ଛପର ଫାଡ଼ିକି ଦିଅନ୍ତି । ଏକଥା ସତ ହୋଇଛି ନିକଟରେ ସରିଥିବା ମହାକୁମ୍ଭ ମେଳାରେ । କିଏ ଦାନ୍ତକାଠି ବିକି ତ କିଏ ଚା’ ବିକ୍ରି କରି ଲକ୍ଷପତି ହୋଇ ଯାଇଛନ୍ତି । ହେଲେ ଗଙ୍ଗା ନଦୀରେ ଡଙ୍ଗା ଚଳାଉଥିବା ଗୋଟିଏ ପରିବାର କୋଟିପତି ହୋଇ ଯାଇଛନ୍ତି । ମାତ୍ର ୪୫ ଦିନରେ ରୋଜଗାର କରିଛନ୍ତି ୩୦ କୋଟି ଟଙ୍କା । ବିଶ୍ବାସ ହେଉନି ନା ? କଥାଟା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଏକଦମ୍ ସତ । କାରଣ ମାତ୍ର ୪୫ ଦିନରେ କୌଣସି ବି ବ୍ୟବସାୟ ୩୦ କୋଟି ଟଙ୍କା ଲାଭ ଦେବା ଆଦୌ ସହଜ କଥା ନୁହେଁ ।

କିନ୍ତୁ ଏଠି ସାମାନ୍ୟ ଡଙ୍ଗା ଚଳାଇ ଏତେ ଟଙ୍କା ରୋଜଗାର କରିଥିବା ଘଟଣା ଏବେ ସମସ୍ତଙ୍କୁ ଚକିତ କରୁଛି । ଏକଥା ଆମେ ନୁହେଁ ଖୋଦ୍ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି । ଉତ୍ତର ପ୍ରଦେଶର ପ୍ରୟାଗରାଜରେ ଅନୁଷ୍ଠିତ ମହାକୁମ୍ଭ ମେଳା ଏବେ ଶେଷ ହୋଇଛି । ସେହି ମେଳା ସମୟରେ ଶ୍ରଦ୍ଧାଳୁଙ୍କୁ ଡଙ୍ଗାରେ ନେଇ ଏଭଳି ରୋଜଗାର କରିଛି ଗୋଟିଏ ଡଙ୍ଗା ଚାଳକ ପରିବାର । ପ୍ରୟାଗରାଜର ମହାକୁମ୍ଭ କେବଳ ଏହାର ଆସ୍ଥା ଓ ବିଶ୍ୱାସ ଯୋଗୁଁ ଚର୍ଚ୍ଚାରେ ନଥିଲା ବରଂ ଏଠାରେ ଏକ ସଫଳତାର କାହାଣୀ ମଧ୍ୟ ନଜର ଆସିଥିଲା ।

କେତେ ଯେ ଲୋକଙ୍କୁ ରୋଜଗାରର ଖୋରାକ ଯୋଗାଇଛି ଏହି ମହାକୁମ୍ଭ ତାହା କହିବା ମୁସ୍କିଲ । ଅନେକଙ୍କୁ ମାଲାମାଲ କରିଦେଇଛି ମହାକୁମ୍ଭ । କିଏ ନିମ୍ବ ଦାନ୍ତକାଠି ବିକ୍ରି କରି ଲକ୍ଷ ଲକ୍ଷ ଟଙ୍କା ରୋଜଗାର କରିଥିଲେ ତ କିଏ ମାଳା ବିକ୍ରି କରି ଏବେ ଫିଲ୍ମ ଦୁନିଆରେ ପାଦ ଦେଇ ପାରିଛନ୍ତି । ଏହାରି ଭିତରେ ବର୍ତ୍ତମାନ ଏକ ଡଙ୍ଗା ଚାଳକ ପରିବାରର ସଫଳତା କାହାଣୀ ସବୁଠୁ ବେଶି ଚର୍ଚ୍ଚାରେ ରହିଛି । ଏହି ପରିବାର ମାତ୍ର ଦେଢ଼ ମାସ ଅର୍ଥାତ୍ ୪୫ ଦିନ ମଧ୍ୟରେ ରୋଜଗାର କରିଛି ୩୦ କୋଟି ଟଙ୍କା ।

ସେମାନଙ୍କ ସଫଳତାର କାହାଣୀ ନିଜେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉତ୍ତର ପ୍ରଦେଶ ବିଧାନସଭାର ବଖାଣିଛନ୍ତି । ବଜେଟ ଅଧିବେଶନ ସମୟରେ ବର୍ଣ୍ଣନା କରିଛନ୍ତି । ଏହି ପରିବାରର ବେଶ ପ୍ରଶଂସା ମଧ୍ୟ କରିଛନ୍ତି ଯୋଗୀ ଆଦିତ୍ୟନାଥ । ବିଧାନସଭାରେ ଅଭିଭାଷଣ ଦେଇ ଯୋଗୀ କହିଛନ୍ତି ଯେ, ପ୍ରୟାଗରାଜ ମହାକୁମ୍ଭ ଏକ ନାବିକ ପରିବାରର ଭାଗ୍ୟ ବଦଳାଇ ଦେଇଛି । ଡଙ୍ଗା ଚାଳକ ଜଣକ ହେଉଛନ୍ତି ପିଣ୍ଟୁ ମାହାରା । ତାଙ୍କ ପରିବାର ମାତ୍ର ୪୫ ଦିନରେ ରୋଜଗାର କରିଛନ୍ତି ୩୦ କୋଟି ଟଙ୍କା । ଯାହା କୌଣସି ବିସ୍ମୟକର ଘଟଣାରୁ କମ୍ ନୁହେଁ ।

୨୦୧୯ ମହାକୁମ୍ଭରେ ବୋଟ୍ ସଂଖ୍ୟା ୬୦ରୁ ୧୩୦କୁ ବଢ଼ାଇଥିଲେ ପିଣ୍ଟୁ । ପିଣ୍ଟୁ ଓ ତାଙ୍କ ସମ୍ପର୍କୀୟ ପରିବାରର ପ୍ରାୟ ୧୦୦ ଜଣ ଏହି କାମ କରନ୍ତି । ମୁଖ୍ୟମନ୍ତ୍ରୀ ଯୋଗୀ କହିଛନ୍ତି ଯେ ପ୍ରୟାଗରାଜର ଏହି ଡଙ୍ଗା ଚାଳକ ପରିବାର ମହାକୁମ୍ଭର ୪୫ ଦିନରେ ୧୩୦ଟି ଡଙ୍ଗା ଚଳାଇ ୩୦ କୋଟି ଟଙ୍କା ରୋଜଗାର କରିଛନ୍ତି । ଯଦି ଆମେ ପ୍ରତ୍ୟେକ ଡଙ୍ଗାର ହିସାବ ଦେଖିବା ତେବେ ଡଙ୍ଗା ପିଛା ଏହି ୪୫ ଦିନରେ ପ୍ରତିଦିନ ୫୦ ରୁ ୫୨ ହଜାର ଟଙ୍କା ରୋଜଗାର କରିଥିଲେ ପିଣ୍ଟୁ । ସେହି ଅନୁସାରେ, ନାବିକ ପରିବାର ପ୍ରତିଦିନ ୨୩ ଲକ୍ଷ ଟଙ୍କା ରୋଜଗାର କରିଛନ୍ତି ।

୧୪୪ ବର୍ଷ ପରେ ଏଭଳି ଏକ ଐତିହାସିକ ମୁହୂର୍ତ୍ତର ମୂକ ସାକ୍ଷୀ ହେବା ଲାଗି କୋଟି କୋଟି ଶ୍ରଦ୍ଧାଳୁ ପ୍ରୟାଗରାଜରେ ବୁଡ଼ ପକାଇଛନ୍ତି । ଏହି ୪୫ ଦିନରେ ୬୬ କୋଟି ଲୋକ ବୁଡ ପକାଇଛନ୍ତି ମହାକୁମ୍ଭରେ ଯାହା ଅନେକ ରେକର୍ଡ ଭାଙ୍ଗିଥିଲା । କେବଳ ଯେ ଲୋକଙ୍କ ସମାଗମ ତା ନୁହେଁ ଆର୍ଥିକ ଦୃଷ୍ଟିକୋଣରୁ ମଧ୍ୟ ଅନେକ ରେକର୍ଡ ସୃଷ୍ଟି କରିଛି ମହାକୁମ୍ଭ । ସେହିଭଳି ଏବେ ଏହି ନାବିକ ପରିବାର ମାତ୍ର ୪୫ ଦିନରେ ୩୦ କୋଟି ଟଙ୍କା ରୋଜଗାର କରିଥିବା ଘଟଣା ଏକ ଅନନ୍ୟ ରେକର୍ଡ ସୃଷ୍ଟି କରିଛି ଯାହା ସମସ୍ତଙ୍କୁ ଚକିତ କରିବା ସ୍ବାଭାବିକ ।

ତେବେ କାହାକୁ ଠକି ନୁହେଁ ନିଜ ପରିଶ୍ରମର ଉପାର୍ଜନ ଇଏ । ଏହି ପରିବାର ପ୍ରୟାଗରାଜର ଅରୈଲରେ ବସବାସ କରନ୍ତି । ଏମିତି ଏକ ବଡ ରୋଜଗାର ପରେ ମାହାରା ପରିବାର ଲୋକଙ୍କ ଖୁସି କହିଲେ ନସରେ । ସେମାନେ ପରସ୍ପରକୁ ମିଠା ଖାଇ ଖୁସି ମନାଉଛନ୍ତି । ଆଉ ରୋଜଗାର ଅର୍ଥରେ ଭବିଷ୍ୟତ ପାଇଁ ଯୋଜନା ବନାଉଛନ୍ତି । ତେବେ ପିଣ୍ଟୁ ଏକଥା ଜାଣି ନଥିବେ ଯେ ତାଙ୍କ ରୋଜକାରରୁ ତାଙ୍କୁ ଏବେ ୧୨ କୋଟିରୁ ଅଧିକ ଟଙ୍କା ଟିକସ ବାବଦରେ ଦେବାକୁ ପଡ଼ି ପାରେ ।

Also read: ପ୍ରେମିକାଙ୍କ କଥା ଶୁଣି ମହାକୁମ୍ଭରେ ବିକ୍ରି କରିଲେ ଦାନ୍ତକାଠି, ୪ ଦିନରେ ରୋଜଗାର କରିଲେଣି ୪୦ ହଜାର ଟଙ୍କା

The post ଭାଗ୍ୟ ବଦଳାଇ ଦେଲା ମହାକୁମ୍ଭ, ୪୫ ଦିନରେ ୩୦ କୋଟି ରୋଜଗାର କଲେ ନାବିକ ପରିବାର appeared first on KNews Odisha.