ପରମାଣୁ ଶକ୍ତି ଦିଗରେ ଭାରତ ନେଲା ବଡ଼ ପଦକ୍ଷେପ: ଟେନ୍‌ସନ୍‌ରେ ଚାଇନା-ପାକିସ୍ତାନ

ନୂଆଦିଲ୍ଲୀ,୧୪।୧: କେନ୍ଦ୍ର ସରକାର ପରମାଣୁ ଶକ୍ତି ଆୟୋଗ (ଏଇସି) ପୁନଃଗଠନ କରିଛନ୍ତି। ଏଥିରେ ଟିଭି ସୋମନାଥନ ଏବଂ ମନୋଜ ଗୋଏଲ ଅଛନ୍ତି। ଦୁହେଁ କ୍ୟାବିନେଟ ସଚିବ ଏବଂ ବ୍ୟୟ ସଚିବ ପଦବୀରେ କାର୍ଯ୍ୟ କରିଛନ୍ତି।

ଗତ ବର୍ଷ ଅକ୍ଟୋବର ୨୧ରେ ଜାରି ହୋଇଥିବା ଏବଂ ଜାନୁଆରୀ ୯ରେ ଗେଜେଟରେ ପ୍ରକାଶିତ ଏକ ବିଜ୍ଞପ୍ତି ଅନୁଯାୟୀ, ଏଇସିରେ ପଙ୍କଜ କୁମାର ମିଶ୍ରଙ୍କୁ ମଧ୍ୟ ଅନ୍ତର୍ଭୁକ୍ତ କରାଯାଇଛି, ଯିଏ ଗତ ବର୍ଷ ସଦସ୍ୟ (ଅର୍ଥ) ଭାବରେ ଦାୟିତ୍ୱ ନେଇଥିଲେ।
ପୁନର୍ଗଠିତ ଏଇସିର ଅଧ୍ୟକ୍ଷ ଅଛନ୍ତି ପରମାଣୁ ଶକ୍ତି ବିଭାଗର ସଚିବ ଅଜିତ ମହାନ୍ତି। ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ, ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପ୍ରମୋଦ କୁମାର ମିଶ୍ର, ବୈଦେଶିକ ସଚିବ ବିକ୍ରମ ମିଶ୍ରି, ସୋମନାଥନ ଏବଂ ଗୋଭିଲ କମିଶନର ପଦାଧିକାରୀ ସଦସ୍ୟ।

ଅନ୍ୟ ସଦସ୍ୟମାନଙ୍କ ମଧ୍ୟରେ ପୂର୍ବତନ ଏଇସି ଅଧ୍ୟକ୍ଷ ଏମ ଆର ଶ୍ରୀନିବାସନ ଏବଂ ଅନିଲ କାକୋଡକର, ପୂର୍ବତନ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ବିଭାଗର ସଚିବ ପି ରାମା ରାଓ, ପୂର୍ବତନ ପ୍ରମୁଖ ପରାମର୍ଶଦାତା (ଡିଏଇ) ରବି ବି ଗ୍ରୋଭର ଏବଂ ପୂର୍ବତନ ମହାକାଶ ଆୟୋଗ ଅଧ୍ୟକ୍ଷ କେ. କସ୍ତୁରିରଞ୍ଜନ ସାମିଲ ଅଛନ୍ତି। ଭାବା ଆଣବିକ ଗବେଷଣା କେନ୍ଦ୍ରର ନିର୍ଦ୍ଦେଶକ ବିବେକ ଭାସିନ ମଧ୍ୟ କମିଶନର ଜଣେ ପଦାଧିକାରୀ ସଦସ୍ୟ। ଏଇସି ପରମାଣୁ ଶକ୍ତି ବିଭାଗ ପାଇଁ ନୀତି ପ୍ରଣୟନ କରିବାରେ କାର୍ଯ୍ୟ କରେ।
ଉଲ୍ଲେଖନୀୟ ଯେ, ଆମେରିକା ଭାରତୀୟ ପରମାଣୁ ପ୍ରତିଷ୍ଠାନଗୁଡ଼ିକ ଉପରେ ଲାଗୁ ହୋଇଥିବା ପୁରୁଣା ପ୍ରତିବନ୍ଧକକୁ ହଟାଇବା ପ୍ରକ୍ରିୟା ଆରମ୍ଭ କରିଛି। ଏହା ଆମେରିକା ଏବଂ ଭାରତ ମଧ୍ୟରେ ଶକ୍ତି ସମ୍ପର୍କକୁ ଆହୁରି ମଜଭୁତ କରିବ। ଏହା ବ୍ୟତୀତ ୨୦ ବର୍ଷ ପୁରୁଣା ଐତିହାସିକ ପରମାଣୁ ଚୁକ୍ତିନାମାକୁ ନୂତନ ଗତି ମିଳିବ। ଆମେରିକାର ଜାତୀୟ ସୁରକ୍ଷା ପରାମର୍ଶଦାତା ଜ୍ୟାକ ସୁଲିଭାନ ତାଙ୍କ ନୂଆଦିଲ୍ଲୀ ଗସ୍ତ ସମୟରେ ଏହା ଘୋଷଣା କରିଥିଲେ।

ଏହି ସମୟରେ ସେ କହିଥିଲେ, ଆମେରିକା ସେହି ନିୟମଗୁଡ଼ିକୁ ହଟାଇ ଦେଉଛି ଯାହା ଭାରତ ଏବଂ ଆମେରିକୀୟ କମ୍ପାନୀଗୁଡ଼ିକ ମଧ୍ୟରେ ବେସାମରିକ ପରମାଣୁ ସହଯୋଗରେ ବାଧା ସୃଷ୍ଟି କରୁଥିଲା। ଏହାର ଔପଚାରିକତା ଖୁବ ଶୀଘ୍ର ସମାପ୍ତ ହେବ। ଏହା ଦୁଇ ଦେଶ ମଧ୍ୟରେ ପରମାଣୁ ସହଯୋଗ ଖୋଲିବ। ଏହା ଦେଖି ପାକିସ୍ତାନ ଏବଂ ଚାଇନାର ଟେନ୍‌ସନ୍‌ ବଢିଯାଇଛି।

The post ପରମାଣୁ ଶକ୍ତି ଦିଗରେ ଭାରତ ନେଲା ବଡ଼ ପଦକ୍ଷେପ: ଟେନ୍‌ସନ୍‌ରେ ଚାଇନା-ପାକିସ୍ତାନ appeared first on Dharitri Odia News.