ପହିଲାରେ ଜମାହେବନି ୨୦୦୦ ଟଙ୍କିଆ

ଭୁବନେଶ୍ୱର,୨୯।୩(ଅନୁରାଧା ମହାରଣା): ୨୦୨୪ ଏପ୍ରିଲ ୧ରୁ ନୂତନ ଆର୍ଥିକ ବର୍ଷ ଆରମ୍ଭ ହୋବକୁ ଯାଉଛି। ନୂତନ ଆର୍ଥିକ ବର୍ଷର ପ୍ରଥମ ଦିନରେ ଭାରତୀୟ ରିଜର୍ଭ ବ୍ୟାଙ୍କ(ଆର୍‌ବିଆଇ)ର ଆଞ୍ଚଳିକ କାର୍ଯ୍ୟାଳୟ ଗୁଡିକରେ ୨୦୦୦ ଟଙ୍କିଆ ନୋଟ୍‌ ବିନିମୟ କିମ୍ବା ଜମା ସୁବିଧା ଉପଲବ୍ଧ ହେବ ନାହିଁ। ଏ ନେଇ ଆରବିଆଇ ପକ୍ଷରୁ ଏକ ପ୍ରେସ୍‌ ବିବୃତ୍ତି ଜାରି କରାଯାଇଛି। ଆରବିଆଇର ୧୯ ଟି କାଯ୍ୟାଳୟ ବାର୍ଷିକ କ୍ଲୋଜିଂ ଅଫ ଆକାଉଣ୍ଟସ କାର୍ଯ୍ୟରେ ବ୍ୟସ୍ତ ରହିବ। ତେଣୁ ସେହି ଦିନ ୨୦୦୦ ଟଙ୍କା ଜମା କିମ୍ବା ବିନିମୟ ହେବ ନାହିଁ।

ଏ ନେଇ ଆରବିଆଇ କହିଛି, ୨୦୨୪ ଏପ୍ରିଲ ୨ରୁ ୨୦୦୦ ଟଙ୍କା ନୋଟ ଜମା କିମ୍ବା ବିନିମୟ ହୋଇପାରିବ। ତେବେ ଏପ୍ରିଲ ୧ରେ ଭୁବନେଶ୍ୱର ସମେତ ଅହମଦାବାଦ, ବେଙ୍ଗାଲୁରୁ, ବେଲାପୁର, ଭୋପାଳ, ଚଣ୍ଡିଗଡ଼, ଚେନ୍ନାଇ, ଗୌହାଟୀ, ହାଇଦ୍ରାବାଦ, ଜୟପୁର, ଜମ୍ମୁ, କାନପୁର, କୋଲକାତା, ଲକ୍ଷ୍ନୌ, ମୁମ୍ବାଇ, ନାଗପୁର, ନୂଆଦିଲ୍ଲୀ, ପାଟଣା ଏବଂ ଥିରୁଭାନନ୍ତପୁରମ୍‌ ଆରବିଆଇ ଆଞ୍ଚଳିକ କାର୍ଯ୍ୟାଳୟରେ ୨୦୦୦ ଟଙ୍କିଆ ନୋଟ୍‌ ବିନିମୟ ହେବ ନାହିଁ। ଆରବିଆଇ ପକ୍ଷରୁ ମିଳିଥିବା ସୂଚନାନୁସାରେ, ୨୦୦୦ ଟଙ୍କିଆ ନୋଟକୁ ପ୍ରଚଳନ ପ୍ରତ୍ୟାହାର କରିବା ପରେ ବର୍ତ୍ତମାନ ପର୍ଯ୍ୟନ୍ତ ୨୦୦୦ ଟଙ୍କାର ମୋଟ ୯୭.୬୨% ରିଜର୍ଭ ବ୍ୟାଙ୍କକୁ ଫେରସ୍ତ ଆସିଛି।

୨୦୨୩ ମେ ୧୯ରେ ଆରବିଆଇ ଦେଶରୁ ୨୦୦୦ ଟଙ୍କା ନୋଟ ପ୍ରତ୍ୟାହାର କରିବାକୁ ଘୋଷଣା କରିଥିଲା। ୨୦୦୦ ଟଙ୍କିଆ ନୋଟ ପ୍ରତ୍ୟାହାର କରୁଥିବାବେଳେ ଆରବିଆଇ କହିଛି ଯେ ୨୦୨୩ ମସିହା ମେ ୧୯ ରେ ୩.୫୬ ଲକ୍ଷ କୋଟି ଟଙ୍କା ମୂଲ୍ୟର ୨୦୦୦ ଟଙ୍କିଆ ଦେଶରେ ପ୍ରଚଳିତ ଥିଲା। ୨୦୨୪ଫେବୃଆରୀ ୨୯ ସୁଦ୍ଧା ଏହି ସଂଖ୍ୟା ୮୪୭୦ କୋଟି ଟଙ୍କାକୁ ଖସି ଆସିଛି। ସୂଚନା ଥାଉକି, ୨୦୦୦ ଟଙ୍କା ନୋଟ ଆରବିଆଇର କାର୍ଯ୍ୟାଳୟଗୁଡ଼ିକରେ ଜମା କିମ୍ବା ବିନିମୟ କରାଯାଉଛି। ଏହା ବ୍ୟତୀତ, ଦେଶର ଯେକୌଣସି ଡାକଘରରୁ ୨୦୦୦ ଟଙ୍କା ନୋଟ ଇଣ୍ଡିଆ ପୋଷ୍ଟ ମାଧ୍ୟମରେ ଆରବିଆଇର କୌଣସି ଇସୁ କାର୍ଯ୍ୟାଳୟକୁ ପଠାଇ ଲୋକମାନେ ସେମାନଙ୍କ ବ୍ୟାଙ୍କ ଆକାଉଣ୍ଟରେ ଏହି ରାଶି କ୍ରେଡିଟ କରିପାରିବେ।

The post ପହିଲାରେ ଜମାହେବନି ୨୦୦୦ ଟଙ୍କିଆ appeared first on Dharitri Odia News.