ପୁରୀ ସାହିଯାତରେ ପ୍ରଚାରକଲେ ନେତା

ପୁରୀ,୨୮ା୪(ଅଜିତ୍‌ ମହାନ୍ତି)ଶ୍ରୀକ୍ଷେତ୍ରରେ ସାହିଯାତକୁ ନେଇ ପୁରୀ ସହର ଏବେ ଉତ୍ସବମୁଖର। ସାହି ଯାତରେ ଶ୍ରୀକ୍ଷେତ୍ରର ପାରମ୍ପରିକ ସମରକଳା ନୃତ୍ୟ ଦେଖିବାକୁ ମଳୁଛି। ଶୁକ୍ରବାର ବାଲିସାହି ପକ୍ଷରୁ ରାବଣ ବଧ ନୀତି ଆଗତ କରାଯାଇଥିଲା। ସେହିପରି ବାଲି ସାହିରୁ ବାଦଯାତ ବାହାରି ବାଦିସାହି ହରଚଣ୍ଡୀ ସାହିକୁ ଯାଇଥିଲା। ତେବେ ଯାତରେ ରାଜନୈତିକ ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିଥିଲା। ରାଜ୍ୟର ପ୍ରମୁଖ ତିନି ରାଜନୈତିକ ଦଳ ପକ୍ଷରୁ ପୁରୀ ବିଧାନସଭା ଓ ପୁରୀ ଲୋକ ସଭା ସଂସଦୀୟ କ୍ଷେତ୍ର ନିମନ୍ତେ ପ୍ରାର୍ଥୀ ହୋଇଥିବା ପ୍ରାର୍ଥୀମାନେ ସାହି ଯାତରେ ସାମିଲ୍‌ ହୋଇ ନିଜ ସପକ୍ଷରେ ଭୋଟରମାନଙ୍କୁ ଆକୃଷ୍ଟ କରୁଥିବା ଦେଖିବାକୁ ମିଳିଥିଲା, ଯାହାକି ବେଶ୍‌ ଚର୍ଚ୍ଚାର ବିଷୟ ହୋଇଛି। ସାହିଯାତ ସହ ପୁରୀବାସୀଙ୍କ ଭାବନା ଜଡ଼ିତ ଅଟେ। ତେଣୁ ସାହି ଯାତରେ ପୁରୀର ଆଠସାହିର ଲୋକ ସାମିଲ ହୋଇଥାନ୍ତି। ଏପରିକି ସହରର ଆଖପାଖ ତଥା ରାଜ୍ୟର ବିଭିନ୍ନ ପ୍ରାନ୍ତରୁ ଲୋକମାନେ ସାହି ଯାତ ଦେଖିବାକୁ ଆସିଥାନ୍ତି। ତେଣୁ ପୁରୀବାସୀଙ୍କ ମନ କିଣିବାର ମଉକାକୁ ନେତାମାନେ ହାତଛଡ଼ା କରିବାକୁ ଚାହୁଁ ନାହାନ୍ତି।
ଏହି ଅବସରରେ ବିଜେଡିର ପୁରୀ ଲୋକ ସଭା ପ୍ରାର୍ଥୀ ହୋଇଥିବା ଅରୂପ ପଟ୍ଟନାୟକ ଓ ରାଜ୍ୟ ସଭା ସାସଂଦ ଶୁଭାଶିଷ ଖୁଣ୍ଟିଆ ସାହି ଯାତ ବୁଲି ଦେଖିବା ସହ ଆଗାମୀ ନିର୍ବାଚନ ପାଇଁ ଲୋକଙ୍କଠାରୁ ଭୋଟ ଭିକ୍ଷା କରିଛନ୍ତି। ସେହିପରି ଭାଜପା ପ୍ରାର୍ଥୀ ତଥା ବିଧାୟକ ଜୟନ୍ତ ଷଡ଼ଙ୍ଗୀ ମଧ୍ୟ ରାତି ତମାମ ବୁଲି ବୁଲି ସାହିଯାତ ଦେଖିଥିଲେ। ଜୟନ୍ତଙ୍କ ସହ ଭାଜପା ସାଂସଦ ପ୍ରାର୍ଥୀ ସମ୍ବିତ୍‌ ପାତ୍ର ମଧ୍ୟ ବୁଲି ସାହି ଯାତ ଦେଖିବା ସହ ଲୋକମାନଙ୍କୁ ତାଙ୍କ ସପକ୍ଷରେ ଭୋଟ ଦେବାକୁ ନିବେଦନ କରୁଥିବା ଦେଖିବାକୁ ମିଳିଛି। ସେହିପରି କଂଗ୍ରେସ ମଧ୍ୟ ସାହିଯାତ ମଉକାକୁ ହାତଛଡ଼ା କରିବାକୁ ଚାହିଁ ନ ଥିଲା। ଦଳ ପକ୍ଷରୁ ପ୍ରାର୍ଥୀ ହୋଇଥିବା ସୁଜିତ ମହାପାତ୍ର ତାଙ୍କର କିଛି ସମର୍ଥକଙ୍କ ସହ ସାହି ଯାତ ବୁଲି ଦେଖିବା ସହ ବୟସ୍କ ଲୋକଙ୍କଠାରୁ ଆର୍ଶୀବାଦ ନେଉଥିବା ଦେଖିବାକୁ ମିଳିଥିଲା। ଭାଜପା ପ୍ରାର୍ଥୀ ଜୟନ୍ତ ଷଡ଼ଙ୍ଗୀ କହିଛନ୍ତି, ସାହିଯାତ କାହିଁ କେଉଁ କାଳରୁ ଚାଲି ଆସୁଛି। ଏହା ଶ୍ରୀକ୍ଷେତ୍ରର ପରମ୍ପରା ଅଟେ। କଳା ସଂସ୍କୃତିର ସହର ହେଉଛି ପୁରୀ। ଶ୍ରୀକ୍ଷେତ୍ର ସାହିଯାତ ଏକ ଅନନ୍ୟ ପରମ୍ପରା। ଏଥିରେ ସମସ୍ତେ ଭେଟ ହୋଇଥାନ୍ତି। ଏଣୁ ଏହି କାର୍ଯ୍ୟକ୍ରମରେ ସାମିଲ ହେବା ଏକ ଆନନ୍ଦର ବିଷୟ। ଆଗାମୀ ନିର୍ବାଚନରେ ସେ ପୁରୀ ବାସୀଙ୍କ ସମର୍ଥନ ପାଇ ବିପୁଳ ବିଜୟ ହାସଲ କରିବେ ବୋଲି ଜୟନ୍ତ କହିଛନ୍ତି। ସେହିପରି ଅରୁପ ପଟ୍ଟନାୟକ କହିଛନ୍ତି ପୁରୀର ସାହିଯାତ ଏକ ଅନନ୍ୟ ପରମ୍ପରା। ଏହାକୁ ଦେଖିବା ବେଶ୍‌ ଖୁସି ପ୍ରଦାନ କରୁଛି। ଲୋକମାନେ ତାଙ୍କୁ ବିପୁଳ ସ୍ନେହ, ଶ୍ରଦ୍ଧା ଦେଉଛନ୍ତି, ଯାହାର ଋଣ ସେ ସୁଝି ପାରିବେନି। ତେବେ ପୁରୀବାସୀଙ୍କ ଅକୁଣ୍ଠ ସହଯୋଗ ଓ ସମର୍ଥନ ରହିଛି। ତେଣୁ ଆଗାମୀ ନିର୍ବାଚନ ରେ ସେ ନିଶ୍ଚିତ ଜିତିବେ ବୋଲି କହିଛନ୍ତି। ସେହିପରୀ ରାଜ୍ୟ ସଭା ସାଂସଦ ଖୁଣ୍ଟିଆ କହିଥିଲେ, ପୁରୀକୁ ମୁଖ୍ୟମନ୍ତ୍ରୀ ସାରା ବିଶ୍ୱରେ ଏକ ନମ୍ବର୍‌ ସହର କରିବା ପାଇଁ ଅନେକ କାର୍ଯ୍ୟ କରୁଛନ୍ତି। ଏଣୁ ପୁରୀ ଭୋଟର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହାତ ମୁଠା ଟାଣ କରିବା ସହ ଅରୂପ ପଟ୍ଟନାୟକଙ୍କୁ ବିଜୟୀ କରିବେ।

The post ପୁରୀ ସାହିଯାତରେ ପ୍ରଚାରକଲେ ନେତା appeared first on Dharitri Odia News.